رەوشەنبیر و دروستكرنا هشیاریێ
سۆلین لەوەند
رەوشەنبیر ئەوە یێ خودان زانین و دیتنێن بەرفرەه بیت. ئەو كەسە یێ كو ل رێیا خواندن و نڤیسین و ڤەكۆلینان شیایە خۆ ب گەهینیتە ئاستەكێ بلند ژ تێگەهەشتنا جیهانێ. ئەڤجا، رەوشەنبیر نە بتنێ زانایە، بەلكو بەرپرسیارە ژی. بەرپرسیارە ژ وێ چەندێ، كو زانینێن خۆ بگەهینیتە خەلكی و هاریكاریا وان بكەت بۆ پێشكەفتن و گەهشتنا هشیاریێ.
هشیاری پێنگاڤەكا گرنگە د گەشەكرنا هەر جڤاكەكێ دا. هشیاری یا راستەقینە دهێتە ئاڤاكرن ب رێیا رەخنەگرتنا هزرێن كەڤن یێن كو نە دگونجای بن بۆ سەردەمێ نووی. ئەڤ چەندە ژی ب رێیا رەوشەنبیران دهێتە ئەنجامدان، ژبەر كو ئەو خودانێن هزر و گۆتنێن ئازادن، و ژ لایێ نەریتی و جڤاكی یێن كەڤن ئازادن.
د سەردەمێ نها دا، رەوشەنبیر پێدڤییە هەبیت بۆ هەر جڤاكەكی. ئەو دشێت هاریكاریا خەلكی بكەت بۆ تێگەهەشتنا گوهۆرینێن مەزن یێن كو دهێنە سەر جیهانێ، نەخاسمە ب رێیا تەكنۆلۆژیا نووی. هەروەسا، ئەو كەسە یێ كو دشێت كاریگەریێ لسەر هزرێن خەلكی بكەت، و وان هان بدەت بۆ فێربوون و بەرەڤ پێش چوونێ.
هندەك جاران، رەوشەنبیر دبیتە دەنگێ وان كەسان یێن كو دەنگێ وان ناهێتە بهیستن. ئەو دشێت بەرگریێ ژ ماف و ئازادیان بكەت، و دژی نەحەقی و ستەمكاریێ راوەستیت. ئەڤە ژی تشتەكێ گەلەك گرنگە بۆ ئاڤاكرنا جڤاكەكێ سەركەفتی و پێشكەفتی.
هشیاری ژی گەلەك گرنگە بۆ پاراستنا ناسنامە و چاندا مللەتان. ئەو یا گرێدایە تێگەهەشتنا دیرۆك و كەلتوور و زمانێ هەر مللەتەكی. رەوشەنبیر ژی رۆلەكێ بنگەهین دگێریت د پاراستن و بەلاڤكرنا ڤان تشتان دا.
پێدڤییە ئەم بزانین، كو رەوشەنبیر و هشیاری دو تشتێن گرێدای ئێكن. هەر رەوشەنبیرەكی ئەركەكێ مەزن هەیە لسەر ملێ خۆ، كو ئەو ژی دروستكرنا هشیاریێ یە د ناڤ خەلكی دا. ب رێیا نڤیسین، ئاخفتن، هونەر، مۆزیك و هەر شێوەیەكێ دەربرینێ، رەوشەنبیر دشێت هزرێن خەلكی بگوهۆریت و هشیاریەكا نووی ئاڤا بكەت. هشیاریەكا، كو یا بنیات نایە لسەر زانین و رەخنە و دیتنەكا بەرفرەه لسەر جیهانێ. ئەڤە ژی دێ بیتە ئەگەرێ پێشكەفتنا جڤاكی و بەرەب پێش چوونێ.
