ژبـەر سێ گرامێن زێڕی دلمانی د نـاڤبەرا بـووك و زاڤـایـەكـی دا چێبوو
زاخۆ، دلۆڤان هالۆ:
زێڕینگرەکێ بازاڕێ زاخۆ بۆ ڕۆژنامەیا ئەڤرۆ دیار کر کو بهایێ زێڕی بەرامبەر سالا بۆری ب ڕێژەیا ٥٠٪ گرانتر لێهاتیە و گۆت: د نوکە دا ئێك گراما زێڕی ب 137 هزار دینارانە، ئەڤێ چەندێ ژی کارتێکرن ل پێكئینانا ژیانا هەڤژینیێ کرییە.
هشیار ئەحمەد زێڕینگرە، دیار کر، گرانبوونا زێڕی ئەگەرەکێ سەرەکییە کو ڕێژا پێکئینانا ژیانا هەڤژینیێ کێم ببیت، چونکی بەری نوکە هەیڤانە 7 یان ٨ بووکان ژ بۆ کڕینا زێڕی قەستا زێرینگرەکێ دکر، لێ د نوکە دا هەیڤێ بووکەك قەستا زێڕینگری دکەت و ئەو ژی بتنێ جۆتەکێ گۆهارکان و گۆستیرکەکێ دکڕیت.
زێڕینگری د بەردەوامیا ئاخفتنێن خۆدا گۆت: « ژبەر کڕینا زێڕان ئاریشە و دلمان بۆ گەلەك بووک و زاڤایان چێبووینە، بۆ نموونە ڤان رۆژا حالەتەك لدەف مە چێبوو ئەو ژی مالا بووکێ و زاڤای پێکڤە هاتن زێڕی بکڕن، پێشتر بووکێ گۆتبوو مالا زاڤای من 100 غرامێن زێڕی دڤێن، لێ پشتی هاتینە زێڕینگری زاڤای ژ سێ غرامان کێمتر زێڕ بۆ چێکرن، ب جڕە چوون و دلمان دناڤبەرا واندا چێبو هەتا بابەت گەهشتە ژێکڤەبۆنێ ژی لێ باش بو پێکهاتن. هشیارێ زێڕینگر، د بەردەوامیا ئاختتنێن خۆدا گۆت: «پێدڤییە بووک بارێ مالا زاڤایی گران نەکەت و گەلەك غرامێن زێڕی ژێ داخواز نەکەت، بەلکو یا د شیانێن وی دا ژێ داخواز بکەت، داکو ئەڤ چەندە نەبیته ڕێگر ل بەرامبەر پێکئینانا ژیانا هەڤژینیێ.»
