ل هەرێما كوردستانێ نێزیكی شەش هزار رێكخراوان مۆلەت وەرگرتییە
دلۆڤان ئاكرەیی
ل سالا 2013 حوكمەتا هەرێما كوردستانێ بودجەیەكا دیاركری بۆ پشتەڤانیكرنا رێكخراوێن سڤیل تەرخان كربوو و د ڤی ماوەیدا ژمارەیەكا زۆرا رێكخراوان د بیاڤێن جودا ل هەرێمێ هاتنە دامەزراندن و ب گشتی ژمارەیا رێكخراوێن كۆ ژێ سالا 2013 هەتا نۆكە ل هەرێمێ هاتینە تۆماركرن نێزیكی 6360 رێكخراوانە كۆ 760 ژ ڤان رێكخراوان نێڤدەولەتینە و 50 ژێ ڤان رێكخراوان ئیراقینە.
فەلاح حەسەن سەرۆكێ فەرمانگەها رێكخراوێن نە حوكومی ل هەرێما كوردستانێ بۆ رۆژنامەیا ئەڤرۆ دیار كر، پشتی سالا 2014 و شەرێ تیرۆرستێن داعشێ هاریكاری بۆ ڤان رێكخراوان ژلایێ حوكمەتا هەرێمێ ڤە هاتنە راگرتن و ژمارەیا ڤان رێكخراوان د گەل بورینا دەمی كێمتر بوون و د نۆكەدا ب تنێ 1000 رێكخراو ل سەر ئاستێ كوردستانێ د 16 سێكتەرێن جودا جودا دا كار دكەن.
ل دۆر چەوانییا تۆماركرنێ و دامەزراندنا رێكخراوان گۆت: هەر ڕێكخراوەكا ل حوكمەتا ئیراقێ هاتبیتە تۆماركرن دشێت ل هەرێمێ كار بكەت، بەلێ مخابن حوكمەتا ئیراقێ دانپێدانێ ب رێكخراوێن هەرێمێ ناكەت و پێدڤییە رێكخراو ل بەغدا خۆ تۆمار بكەن و بۆ تۆماركرنێ چەندین ئاستەنگان دروست دكەت، بۆ چارەسەركرنا ڤێ پرسگرێكێ مە وەك هەرێم گونجاندن هەیە و كار ئاسانییێ بۆ رێكخراوان دكەین و ل ماوەیێ بوری ب رێكا شیرەتكارێ سەرۆك وەزیرێن ئیراقێ مە كۆنوسەك گەهاندییە حكومەتا فیدرال و د نۆكەدا ئەو داخوازی دبن هویربینی یێ دایە ل بەغدا.
سەبارەت ب چاوانیا كاركرنا رێكخراوان خویا كر، پێدڤییە رێكخراو ل دووڤ رێنمایێن فەرمانگەها ناڤبری و یاسا و بەندێ ژمارە 1 یا سالا 2011 یا ل پەرلەمانێ كوردستانێ دەركەفتی تایبەتە ب رێكخراوانڤە رەفتارێ بكەن و ل دووڤ دابونەریتێن دەڤەرێ پرۆژە و چالاكییان ساز بكەن و جودا ژێ دانا مۆلەتێ ب رێكخراوێن سڤیل د هەمان دەمدا ژی رێ ل هندەك بیاڤان گرتییە مینا دامەزراندن و پشتەڤانیكرن ل هەڤ رەگەزخوازان كۆ ب چ شێوەیەكی رێ ناهێتە دان و ل دووڤ یاسایێ ل هەرێما كوردستانێ و ئیراقێ دێ ئەو لایەن و رێكخراو ب رێكا دادگەهێ ب 15 سالان هێتە حوكمكرن، هەر رێكخراوەكا دوور ژ ناڤەرۆكا مۆلەتا خۆ كار بكەت دێ بۆ جارا ئێكێ هێتە ئاگەهداركرن و جارا دوویێ دێ ڕوو ب روو دادگەهێ بیت و رەنگە مۆلەت ژێ بهێتە وەرگرتن.
سەبارەت رۆلێ رێكخراوێن بیانی ل هەرێما كوردستانێ گۆت: رێكخراوێن هەر ئێك ژێ وەلاتێن ئەمریكا و نەرویج و ئەلمانیا و دانیمارك ل هەرێما ل بیاڤێن جودا كارێن باش كرینە كۆ ل رێزا ئێكێ وەلاتێ ئەمریكا دهێت كۆ كارێن مرۆڤایەتی یێن زۆر ئەنجامداینە و زێدەتر گۆت: د نۆكە دا ئەو كاری دكەن كو ئەڤ رێكخراوێن ل هەرێمێ هەین بهێنە لوبیكرن و كار و ئەركێن وان بهێنە دیاركرن و ب رێكا بەژداریكرنا وان ل خۆلاندا چ ل سەر ئاستێ نافخو یان دەرڤە بهێنە ئامادەكرن دا سەرهەلی كارێن رێكخراوەیێ ببن ب شێوەیەكێ زانستی و ل دووماهییێ ئاشكرا كر، وان لبەرە ل ماوەیەكێ نێزیك سەرەدانا پارێزگەها دهۆكێ بكەن و كۆمبون بهێنە ساز كرن و پاشان ل هەولێرا پایتەخت ل گەل هەمی رێكخراوان سڤیل یێن كو دبیاڤێن جودا دا كار دكەن كوم ببن.
