بارانێن ڤێ دووماهیێ دێ پتریا بەرهەمێن دێم ژناڤبەن
ئەڤرۆ، هەرهین محەمەد:
كەرتێ چاندنێ ژ وان كەرتێن هەرە گرنگە یێن بهێزكرنا ژێرخانەیا ئابوری یا هەر وەلاتەكی و دەمێ كەرتێ چاندنێ یێ لاوازبیت دێ كارتێكرنێ ل ژێرخانەیا ئابوری كەت و ئەڤ سالە ژی ژ ئەگەرێ كێم بارانا بارانێ گەنم ب ئاڤا بیران و مرەشەیان دهێتە ئاڤدان.
وەلید سلێڤانەی، رێڤەبەرێ چاندنێ ل باتێلێ بۆ رۆژنامەیا ئەڤرۆ گۆت: د ئەڤێ حەفتیێ دا 92ملم بارانێ هاتینە و ئەڤێ بارانێ ژی كارتێكرنێن خوە ل سەر هندەك بەروبوومان هەنە ب تایبەتی بەرهەمێ دێم ودشێم بێژم 90% بەرب نەمانێ دچیت، چونكو باران ب رێژەیەكا باش نەهاتیە و دیسان د دەمێ خوە ژی دا نە هاتیە و گەنم گەلەكێ لاواز و بێ سەروبەرە و ئەو بارانێن دهێن ژی وێ كارتێكرنێ ناكەن كو گەشەیەكا باش بكەن بگەهیتە ئاستێ دروینێ و بەرهەمی ب تنێ كەسكاتیە و ئەو گەنمێ نوكە هاتیە چاندن ب ئاڤا بیرا و رەشا ن و رویباران دهێتە ئاڤدان.
زێدەتر گۆت: ئەڤ بارانا هاتی بۆ وان گەلەك یا باش بوو و هاریكاریە بۆ وان جوتیاران یێن ئاڤدانێ دكەن ب رێیا ماتۆران و كارەبێ و ب ڤێ چەندی تێچوو كێمتر دبیت، هەموو دەمان پلان هەنە و جوتیار ژی د ئازادن د چاندنا گەنمی دا و كا ئەو چەند رووبەرێ ئەردی گەنمی بچینن ئەم دەستنیشان ناكەین. ل دەستپێكا چاندنێ ژی كەس نزانیت كا دێ وێ سالێ باران هێن یان نە، ب تنێ پێشبینی دهێنەكرن كا دێ چەند باران باریت و هەكە وان زانی با باران دێ ب ڤی رەنگی هێن دبیت وان نەچاند بان.
ناڤبری گۆت: نەدانا پارەی و نەوەرگرتنا گەنمی هەموو دەمان ئیراق ڤی كەرتی ب ململانا سیاسی ڤە گرێدەت و ژ وان ناهێتە وەرگرتن، هەكە سەحكەینێ ژی گەلەك جاران ژی ئیراق دێ گەنمی ژ وەلاتێن بیانی كریت، بەلێ گەنمێ ناڤخۆ چەند كیلومەتران ژێ دوورە و ئاستەنگان بۆ چێدكەت و ب ئەوێ ململانا سیاسی ڤە گرێدەت و گرنگە گەنمێ جوتیارێن مە ژی وەكو هەموو جوتیارێن دی یێن باشورو ناڤەراستا عیراقێ بهێتە وەرگرتن، گەنمێ مە ژی نمرە ئێكە و بكێر ئاری دهێت و سالوخەتێن باش یێن تێدا، بەلێ هەموو گاڤان ئیراق رێگریێ ل بەر هەمێ مە یێ ناڤخۆ دكەت.
خویاژی كر، ئەڤێ چەندێ ژی ب مەسەلەیێن سیاسی ڤە گرێدەت و یا جوتیار و وەكو كەرتێ مە و وەزارەتا چاندنێ ب تنێ ئەم بەرهەمێ خوە رادەست دكەین و نەوەرگرتن و نەبوونا بازاری ب تنێ ل سەر ملێن وەزارەتا چاندنێ نینە و دڤێت وەزارەتا پلاندانانێ و وەزارەتا بازرگانی و پێشەسازی وەزارەتا دارایی هەموو خوە ل ئەڤی بەرهەمی بكەنە خودان و هەموو وەزارەتێن دی ژی كارگەه و كارخانە و بازاران بۆ ئەڤی بەرهەمی بینن و هەموو دەمان ژی ئەم وان شیرەتا ل جوتیاری دكەین دەست ژكارێ خوە بەرنەدەن، چونكو كەرتێ چاندنێ گرێدای ژیانا مرۆڤانە.
ئەو چەندە ژی گۆت: نەبوونا پلانێن ستراتیژی و نەخەمخوریا ل سەر كەرتێ چاندنێ هەی و ژبەر ئەڤێ چەندێ ئاستەنگ بۆ بەرهەمێ مە چێدبن و جوتیارێ مە تووشی زیانەكا مەزن دبن و ئەو جهێن ژێدەرێن ئاڤێ حكومەت لێ بكەتە خودان و ئاڤێ بۆ جوتیاری بگەهینتە دناڤ ئەردێ وی دا كو بشێت بەردەوامیێ بدەتێ و دسالێن وەسا دا دا بشێن خوە ژ كێم بارانیێ قورتال بكەین.
