وەلاتیێن بیانی بلەز ئیرانێ بجهـ دهێلن
ژ بەر شەڕێ نها د ناڤبەرا ئیرانێ و ئسرائیلێ دا، ب تایبەتی ژی پشتی هۆشداریا ترامپی یا بۆ چۆلکرنا تەهرانێ، ب سەدان کارمەندێن نەتەوەیێن ئێکگرتی ب رێیا ترۆمبێلێن تایبەت دەربازی تورکیا و وەلاتێ ئازەربایجانێ بووینە و هەروەسا گەلەک وەلاتیێن بیانی ژی ل ئیرانێ ب رێیا ئەردی بەرێ خوە داینە تورکیا و ئازەربایجانێ و ب تایبەتی ژی نها ل هەموو دەرگەهێن سنوری یێن د ناڤبەرا ئیرانێ و تورکیا دا قەرەبالغیەکا زۆر هەیە.
ل ئالیێ دی ژ بەر شەڕی چەندین وەلاتان بالیۆزخانەیێن خوە ل ئیرانێ داخستینە و داخواز ژ کارمەندێن خوە کرینە کو د زووترین دەم دا ژ ئیرانێ دەرکەڤن و د هەمان دەمی دا گەلەک وەلاتێن جیهانێ داخواز ژ وەلاتیێن خوە ژی کرینە، کو ژ بەر رەوشا نها یا ئالۆز ژ ئسرائیلێ ژی دەرکەڤن، چونکی ژ بەر موشەکێن ئیرانێ دبیت مەترسی ل سەر ژیانا وان دروست بیت.
