پێدڤییە ئالیێن سیاسی یێن كوردستانی د شەڕێ ئیسرائیلێ و ئیرانێ دا د بێلایەن بن
دیدار: نەرمین رێكانی:
شرۆڤەكارەكێ سیاسی راگەهاند: بێگومان ئیراق یا بوویە پارچەیەك ژ شەڕێ د ناڤبەرا ئیرانێ و ئیسرائیلێ دا ، بەلێ هێشتا نە گەهشتییە عەردی، ئانكو هێزێن لەشكری كو ئەو ژی یا پێشبینیكرییە ، هەروەسا دیاركر هەكە ئەم بنێرینە ئەسمانێ ئیراقێ دێ بینین یێ بوویە مەیدانا شەڕی د ناڤبەرا ڤان هەردوو دەولەتاندا كو هەتا نوكە هەردو دەولەت ئەسمانێ ئیراقێ بكار دئینن و هەموو فرۆكەیێن شەڕكەرێن ئیسرائیلێ ب ئەسمانێ ئیراقێ دەربازی ئیرانێ دبن بۆ تەپبارانكرنا ئارمانجێن خوە هەروەسا مووشەكێن دوورهاڤێژێن ئیرانی ژی ب رێكا ئیراقێ دەربازی ئیسرائیلێ دبن.
د. هەوار نێروەیی، شرۆڤەكارێ سیاسی بۆ رۆژنامەیا (ئەڤرۆ) گوت» ب بۆچوونا من ئیسرائیل د دەمەكێ كورتدا نەشێت وان هەموو بارەگەهێن گرێدایی چەكێ ئەتۆمی یێن ئیرانێ ژ ناڤببەت، چونكی هەر ژ سالێن شێستان ژ چەرخێ بۆری ل سەردەمێ رژێما شاهی ئیرانێ بزاڤ دكرن چەكێ ئەتۆمی دروست بكەت ، ب تایبەتی كۆمارا ئیسلامی هاتە سەر دەستهەلاتێ و د شەڕێ هەشت سالیێ د ناڤبەرا ئیرانێ و ئیراقێدا وپاشی ل سالێن نوتان و وێڤە كۆمارا ئیسلامییا ئیرانێ ب ملیاران دۆلار خەرجكرن بۆ وێ چەندێ ئەڤی چەكی ب دەستخوڤە بینیت، لەوما ب بۆچوونا من ئەڤ شەڕە دێ بەرفرەهتر لێ هێت».
گوت ژی» ب دیتنا من هەرێما كوردستانێ د نوكەدا یا پێدڤی ل سەر ئەوە بكەت ، دا كو نەبیتە پارچەیەك ژ ڤی شەڕی، لایەنێن سیاسی یێن كوردستانێ، ب تایبەتی یێن سەرەكی ئێكەتی و پارتی ب لەز كۆمبوونەكێ ئەنجام بدەن بۆ چەوانییا پاراستنا بەرژەوەندیێن ستراتیژی یێن هەرێما كوردستانێ وەك نیشتمان و وەك نەتەوە، هەروەسا خالەكا دی ئەوە كو حوكمەتا هەرێما كوردستانێ و ئالیێن سەرەكی یێن سیاسی ، هندی بشێن سیاسەتەكا بێلایەن دەستنیشان بكەن، نەكو راستەوخوە پشتگیرییا كۆمارا ئیسلامییا ئیرانێ یان ژی یا ئیسرائیلێ بكەن، بەلكو سیاسەتەكا بێلایەن بكاربینن ، هەروەسا حوكمەتا هەرێما كوردستانێ ب رێكا حكومەتا فیدرال ب شێت هەڤسەنگیەكێ ب پارێزیت كا چەوا هەرێما كوردستانێ دوور بكەت ژ ڤان گرژی و ئالوزیێن ل سەر ئاستێ رۆژهەلاتا ناڤین».
