وەزارەتا دەرڤەیا ئیراقێ: ئاگربەستا د ناڤبەرا ئیرانێ و ئیسرائیلێ دا پێنگاڤەكا ئەرێنییە
وەزارەتا دەرڤەیا ئیراقێ پێشوازی ل دەستپێشخەرییا ئەمریكا بۆ ئاگربەستا د ناڤبەرا ئیرانێ و ئیسرائیلێدا كر، هەروەسا دیاركر ژی، ئاگربەست پێنگاڤەكا ئەرێنییە بۆ كێمبوونا ئالۆزییان و پاراستنا ئارامییا دەڤەرێ.
دوهی سێشەمبی 24/6/2025، وەزارەتا دەرڤەیا ئیراقێ راگەهاند، پێشوازیێ ل دەستپێشخەرییا ئەمریكا دكەت بۆ ئاگربەستا د ناڤبەرا ئیرانێ و ئیسرائیلێدا، هەڤدەم ب پێنگاڤەكا ئەرێنی هەژمارت بۆ كێمبوونا ئالۆزییان و پاراستنا ئارامییا دەڤەرێ.
وەزارەتا دەرڤەیا ئیراقێ گوت ژی» سوپاسییا قەتەر دكەین بۆ بزاڤێن وێ یێ دیپلۆماسی و ناڤبریێ كو رۆل هەبوو د رێككەفتنێدا و راگەهاندنا ئاگربەستێ و زڤراندنا ئارامییا هەرێمایەتی».
وەزارەتا دەرڤەیا ئیراقێ ب پێدڤی ژی زانی هەموو ئالیی پێگیری ئاگربەستێ ببن و وەكو خوە بهێتە بجهئینان بۆ وێ چەندێ دووبارە دانوستاندن دەست پێ بكەن.
سێشەمبی 24/6/2025، دۆنالد ترەمپ، سەرۆكێ ئەمریكا د تویتەكێدا ئاگربەست د ناڤبەرا ئیرانێ و ئیسرائیلێدا راگەهاند و دیاركر، جیهان پێشوازیێ ل ڤێ بڕیارێ دكەت، هەڤدەم پیرۆزباهی ل جیهانێ، ئیرانێ، ئیسرائیلێ و رۆژهەلاتا ناڤین ژی كر.
دۆنالد ترومپ باس ل وێ چەندێ ژی كر كو پشتی 24 ساتێن دی ئیران و ئیسرائیل ب فەرمی دێ شەڕی راگرن.
گوت ژی» نێزیك بوو ژ ئەگەرێ وی شەڕێ هەموو رۆژهەلاتا ناڤین وێران ببیت».
دیاركر ژی كو ئیران دێ دەستپێشخەریێ كەت و شەش ساتێن ئێكێ دێ شەڕی راگریت و دێ ئاگربەستێ راگەهینیت، هەڤدەم ئیسرائیل پاشی دێ شەڕی راگریت و ئاگربەستێ راگەهینیت.
