پشتی هەڤالەكێ مە خیانەتكری ئەز دانەكێ رۆژێ ب پانكێ ڤە هلاویستم
دیدار: سالار محەمەد دۆسكی
5 – 7
ئەم هەموو د ناڤێكڕا بوون. خەو دیاریەك گەلەك مەزن بوو بۆ وی یێ جارەكێ ب دورستی دخەو چۆبا. ئەم د ڤێ ڕەوشا پیس دا بوون، ئەز و گەلەكێن دی پتری نەهـ مەهان ماینە د وێ كونجا تەنگ و بێهنتەنگ دا. ئەڤە ژ بلی سپه و ڕشك و كێچا، ب تایبەت سپها خوینا مە ب هەروەیی دمێت كو خوە شووشتن و ڤەشووشتن نەبوو و تنێ سێ دانان دەرگەهێ زیندانێ دهاتە ڤەكرن و دەمەكێ كورتێ دەسنیشانكری دا ڤیابا مرۆڤ چۆ با دەستئاڤێ ز چاڤێن خوە شووشت بان و ب لەز زڤریبا جهێ خوە بەری بكەڤتە بەر سزادانێ.
هەر چەوا بت، چیڕۆك ددرێژن، ل ڕۆژا 27-2-1986 ئەم برینە دادگەهێ و (مودەعی ئەلعام) داخواز ژ دادگەهێ كر كو ب توندترین شێوە بهێینە سزادان. هەمی مولك و مالێ ل سەر ناڤێ مە ژی بهێتە دەستەسەركرن. ژلایێ خوەڤە ژی پارێزەرێ دەولەتێ نەرمتر ئاخفت و دیاركر كو هندەك ژ وان د بن هەژدە سالیێ دانە و ڤێت دادگەهـ ب چاڤێ دلۆڤانیێ لێ بنێرت و گەنجن و ب خۆشخۆشكێن (عەساتا) یێن سەرگەرم بووین و هاتینە سەردا برن. ئەو بوو دادگەهێ حوكمێ مە خواند و ل دووڤ ماددەیێ (175/1) ب نڤیسارا دادگەها (الثورە) یا هەژمار (910) سالا 1986 ئەز ب (10) سالان هاتمە حوكمكرن و هەڤالێ من (سەدیق) ب (15) سالان و هەردو یێن دی، (ئەحمەد) و (ع) (موئەبەد) بوون.
پاشی ئەو بوو هەر د وێ سالێ دا لێبۆرینەك هات دەركرن. ئەم ژی ب وێ لێبۆرینێ ژ ناڤا دیوارێن زیندانێ ڕزگاربوون. لێ ژ بەركو ئەز دبن هەژدە سالیێ دا بووم، كاغەز و بەلگەیێن من ل چاكسازیا سنێلەیان (قوتابخانا سنێلان) یا بەغدایێ بوون، لەوا پشتی بۆرینا (4) هەیڤان ژ لێبۆرینێ ژنوو هاتمە بەردان و بڕێكا تەسفیراتا ژ (ئەبۆ غرێب) بۆ ناڤەندا پۆلیسێن گشتی ل بەغدایێ هاتمە ڤەگۆهاستن. پشتی بۆرینا حەفتیەكێ بۆ بنگەهێ پۆلیسێن مووسلێ هاتمە ڕەوانەكرن و پاشی ژ وێرێ بۆ بنگەهێ پۆلیسێن دهۆكێ و وان ژی ژ لایێ خوە ڕادەستی ئەمنا دهۆكێ كرم. ل ڤێرە ئەفسەر(ئەبۆ نەشوان) گۆتە من، تو ب شەرەفا خوە ڕاست بێژە، هوون عەمیلێن پارتی بوون یان نۆ؟ نزانم چەوا من گۆتێ:(سەیدی یا چۆیی، چۆ). ڕاستی ئەو تێكچۆ و هندەك تشت ب ئەرەبی گۆتن، لێ ئەز تێنەگەهشتم. تنێ من زانی گۆت:(سینگێ حوكمەتا شۆڕەشێ چەندێ مەزن و فرەهە، لێبۆرین دای. هەكە دڤیابا هوون هەمی كوشت بان.). ئەز وێ كێلیكێ گەلەك ترسیام، لێ من هەست ب كوباریەكێ ژی كر كو من وە گۆتی. پشتی گازی خێزانا من كرین و ئیمزایەك ژێ وەرگرتین، ژنوو ئەز بەردام.
دەمێ ئەز بەردایم، من بزاڤ كر ب زڤرم و خواندنا خوە تەمام بكەم هینگێ ل شەشێ ئامادەیی بووم، لێ رێڤەبەرێ قوتابخانێ مەسەلە هەمی دزانی، لەوا كاغەزەك دا دەستێ من و گۆتە من بخوینە، بڕیارەك بوو هۆسا وەكو ڕێڤەبەرێ خواندنگەهێ نیشا من دای و گۆتیە من، خوە بێدەنگ بكە و كەس نەشێت تە بزڤڕینتە بەر خواندنێ.
و ل بنی نڤیسی بوو ( مجلس قیادە الثورە) و یا ئیمزا كری بوو. هوسا ئەز فەسل بووم. بابێ من واستە ژی گرتن و وی واستەیی ئەز برمە ئەمنا دهۆكێ و برمە هۆبا ( شۆون الگلبە)، ئەفسەرەك ل وێرێ بوو و گۆتە واستێ من هەما تو هەڕە و انشاللە دێ شولا وی چێكەم. پشتی واستەیێ من دەركەتی، ئەو ژی وی ئەفسەری خورتی لێكر هەتا ئەز هێلایمە بتنێ كو جامێری ئەوی پلەیەكا مەزن دناڤ لەشكەرێ ئیراقێ دا هەبوو، لێ هەر چەوا بیت ئەو دەركەت پشتی گۆتیە من نەترسە دێ ژ دەرڤە ل هیڤیا تەبم. وی ئەفسەرێ ئەمنێ ب رۆهن و ئاشكرایی گۆتە من(هەڕە بۆ نە شەبەكەكا رێكخستیێن نهێنی ئاشكرا كە پاشی وەرە موعەزز موكەررم هەرە قەتابخانا خوە). ئەز ب وان سەرو دلێن شكەستی ڤە هاتمە مال و ئەڤا چێبوویی من بۆ بابێ خوە گۆت. ئێكسەر گۆتە من( نەعلەت ل وا و مەدرەسا وان بن، هەما ل مالا خوە روینە نەچە چ مەدرەسا و نە ئەم كەسێ تووشی بەر دەستێ وان زالمان دكەن). هەتا پشتی سەرهلدانا بهارا 1991 ێ و ئیدارە بۆ كوردان ماین، دوبارە من ب رێكا خواندنا دەرەكی خواندنا خوە تەمام كر.
من دڤێت باسی تشتەكی گەلەك بالكێش بكەم، ل بارەگایێ ئەمنا دهۆكێ، ئەز و سەدیق و ئەحمەد و (ع) برینە ژوورەكێ و ئەفسەر (ئیبراهیم، ئەبۆ نەشوان)، ئەفسەرێ ڤەكۆلینێ یێ ل وێرێ بوو. فەرمانكر چاڤێن مە ڤەكەن و كەلامچەیا ژی ژ دەستێن مە ڤەكەن. گۆتە مە فەرمۆن ڕوونن. زیندانیان دگۆت، ئەو كوردە و ب زاراڤێ سۆرانی دئاخفت. لێ وەسا نەبوو، ئەو ب ڕەگەز ئەرەب بوو و ژنا وی كورد بوو. لەوا هندەك كوردی ژی دزانی.
ئەم ل سەر قەنەپا ڕوونشتین. وی مسجلەك ئینا و كاسێتەك هاڤێتە بەر و كابكا وێ دەوساند. دەنگێ هونەرمەند شڤان پەروەر هات و دگۆت:(خانما من، وەرە با من، ڕۆنیا هەردو چاڤێن من). بۆ دەمێ خولەكەكێ ستران هاتە گۆتن. دووڤڕا، دەنگەك هات بوو تۆماركرن كو دەنگێ كۆمبوونەكێ بوو و ئێك دئاخفت و هندەك پەیڤێن داڕشتی ل سەر ڕەوشا دەڤەرێ و هێزێن پێشمەرگە و ڕێكخستیێن نهێنی دگۆتن. هندەكان ژی پرسیار ژێ دكرن، كا پێشمەرگە و هێزێن كوردی چەند دشێن ببنە هاریكار بۆ ئەنجامدانا كریارێن نهێنی ب ڕێكا ڕێكخستیێن نهێنی ل ناڤ باژێڕان. ئەوێ دئاخفت، هندەك ڕێنما و شیرەت دكرن. ڕەوشا وەلاتێ ئیراقێ یا سیاسی ب خەبەر دئینا، كو هەر چەندە ئیراق خوە سەركەفتی دبینت، لێ دناڤخۆیا خوە دا كێشە هەنە و فشارا مە ژی هەر بۆ هندێیە مافێن خوە بستینن و ڕژێما ئیراقێ ناچار بكەین كو ب مەرجێن شۆڕشا كوردی ڕازی بیت و ئێدی ئەڤ زولم و زۆرداریە ل سەر ملەتێ مە ڕابت و نەمینت. وەلاتیێ كورد ژی، وەكو هەر وەلاتیەكێ دی، ب ماف و ناسنامەیا خوە شاد بیت و نەمینت وەلاتیێ پلە دو.
(ئەبۆ نەشوان) ئێكسەر گۆتی:(ئەڤە دەنگێ كێ یە؟ ل كیڤە هاتیە تۆماركرن؟). هەر وی گۆت:(ئەڤ كۆمبوونە ل گوندێ كێڤلا یا هاتیە كرن و تلا خوە درێژكرە (ع) و گۆتێ:(ئەڤە دەنگێ كێ یە هەی بێ شەرەف؟ ڕێكخستیێن نهێنی كینە؟ ئەڤە كی یە دئاخڤت؟.). تبلا خوە ل كابكا ڤەمراندنێ دا و دەنگگر بێدەنگ كر. گۆتی:(ئەو خەلەكا بەرزە د ڤێ دۆسیێ دا، مە ئەو ژی یا دیتی) و گۆنە (ع):( تە نهێنیێن خوە كربوونە د سندۆقەكێ دا و كلیل هاڤێتبوو بنێ دەریایەكێ، لێ من ئینا دەر). هینگێ بۆ من یا ڕۆن نەبوو كا مەرەم ژ ڤێ ئاخفتنێ چ بوو. لێ پشتی هینگێ دیار بوو كو كەسەك دی ژی گرتبوون و ئەو ژی هەر ب تومەتا دۆسیا مەبوو.
