شاندێ کوردی یێ رۆژئاڤایێ کوردستانێ بێ رۆل مایە
ئەندامەکێ شاندێ کوردی ل سووریێ دیار دکەت حوکمەتا سووریێ ناخوازیت کورد پرسێن هەی د ناڤبەرا خوە دا چارەسەر بکەن و شاندێ هەڤپشک یێ کوردان ژی تنێ وەکو ناڤ مایە و ئەو یەک دێ کاریگەریا خوە یا خراب بۆ کوردان ل سووریێ هەبیت.
ئەحمەد سلێمان جێگرێ سکرتێرێ پارتا پێشڤەرو یا دیموکرات یا کورد ل سووریێ و ئەندامێ شاندێ کوردی یێ رۆژئاڤایێ کوردستانێ دیار کر، مخابن رەوشا رۆژئاڤایێ کوردستانێ باش نینە، بەری نها شاندێ کوردی هاتبوو ئاڤا کرن، لێ شاند تنێ وەکو ناڤ مایە و دو مەهن شاندێ کوردی یێ رۆژئاڤایێ کوردستانێ چو کۆمبوون نەکرینە و گۆت: (بێگومان حوکمەتا نها یا شامێ ب چو رەنگەکێ ناخوازیت کورد ئێکگرتی بن، وان دڤێت کورد هەردەم ئاریشەیێن خوە هەبن دا نەگەهنە مافێن خوە، مخابن رەوشا نها ژی گەلەک خرابە، چونکی شاندێ هەڤپشک یێ کوردان ل رۆژئاڤایێ کوردستانێ هەتا نها چو نەکریە و ئەو یەک د دەمەکێ دایە کو نها رەوش گەلەک هەستیارە).
ناڤهاتی ئەو یەک ژی دیار کر، پێدڤیە هەموو هێزێن کوردی یێن رۆژئاڤایێ کوردستانێ پێکڤە بەرەڤانیێ ل مافێن رەوا یێن گەلێ کورد ل سووریێ بکەن، شاندێ کوردی ژ بەر ڤێ یەکێ هاتە ئاڤا کرن، لێ مخابن شاندێ کوردی تنێ وەکو ناڤ مایە و نەشیایە ب رۆلێ خوە رابیت، ئەو یەک دێ بیتە ئەگەر پێگەهێ کوردان ل سووریێ گەلەک لاواز بیت، دڤێت کورد پێکڤە کار بکەن، ئەو یەک گەلەک گرنگە، هەکە تشتەک وەسا نەهێتە کرن دێ رەوشا کوردان ل سووریێ خرابتر لێ هێت.
ناڤهاتی د بەردەوامیا ئاخڤتنا خوە دا ئاماژە ب ڤێ یەکێ ژی دیار کر، پێدڤیە ب جهێ پارتێن سیاسی شاندێ کوردی ل گەل حوکمەتا سووریێ دانوستاندنان بکەت، نابیت هەر هێزەک ب سەرێ خوە ل گەل شامێ دانوستاندنان بکەت، چونکی شاندێ کوردی نوونەراتیا هەموو کوردێن سووریێ دکەت، لێ مخابن پیلانا شامێ وەسا بوو کو شاندێ کوردی دانوستاندنان نەکەت و شامێ هەر ژ دەستپێکێ ژی بابەت کرە سەربازی و دانوستاندن ل گەل هەسەدێ هاتنە کرن، هەسەدێ ژی نەشیا وێ پیلانا شامێ ژناڤ ببەت و هەتا نها ژی دانوستاندن ب رێیا هەسەدێ دهێنە کرن و شاندێ کوردی ژی بێ رۆل مایە و ئەو یەک ژی بێگومان بوویە جهێ دلگرانیا هەموو کوردان ل سووریێ.
ئەحمەد سلێمان د دووماهیا ئاخڤتنا خوە دا ئەو یەک ژی دیار کر، شامێ دڤێت ب کێمترین ماف کوردان رازی بکەت، ژ بەر ڤێ یەکێ ژی دڤێت هەسەدە و هەموو ئالیێن دی هشیار بن و دڤێت ب هەموو رەنگەکێ کار بهێتە کرن دا کورد ل سووریێ بگەهنە مافێن خوە، بابەتێ مافێن گەلێ کورد ل سووریێ بابەتەک سەربازی نینە بەلکو بابەت هەموو مافێن نەتەوەیی یێن گەلێ کوردە و دڤێت کورد بگەهنە هەموو مافێن خوە.
