هەتا نوكە نوزانم نامەیا من بۆ پێشمەرگەی هنارتـی چاوا ئاشكـرا بوو
سالار محەمەد دۆسكی:
1 – 2
عەلی تاهر حسێن عیسی یێ بەرنیاس ب عەلی بەرۆشكی ل سالا 1961 ل گوندێ بەرۆشكا سەعدونی ل دەڤەرا دۆسكی یا ژ دایك بوویە، خواندنا سەرەتایی و ناڤنجی ب دووماهی ئینایە و ل پەیمانگەها خواندنێن ئیسلامی دهێتە رێكخستن، پێشمەرگاتی ل هەر دو شۆڕەشێن ئیلۆن و گولانێ كریە و پشتی ئاشكرابوونا نامەكا وی بۆ پێشمەرگەی دهێتە دەستەسەركرن و سێ سالان ل زیندانا ئەبو غورێب دەرباز دكەت، دوڤدا چەكێشەرەفێ هەلدگریت و دبیتە پێشمەرگە و چەندین سالان ل ئاوارەیێ دمینت.
عەلی بەرۆشكی، بەحسێ مێژوویا چوونا خوە دكەت بۆ ناڤ رێكخستنێن پارتی دیموكراتی كوردستان و گۆت: رێكەفتی 1/5/1979 چوویمە ناڤ رێكخستنێن پارتی دیموكراتی كوردستان دا وی دەمی ئەم قوتابی بووین ل پەیمانگەها ئیسلامی ل دهۆكێ وێ سالێ ئەم ل پشكێن نافخویی بووین مە دخواندن و پشكێن نافخوویی ل تاخێ گرێباسێ بوون نێزیك (ئەسواق رەبیع) ب رێكخا هەڤالەكی بناڤێ (خالد محەمەد سەعید بێشیلی) هاتمە رێكخستن و پشتی باوەری ب من هاتی ب رێكا وی هەڤالی چوومە ناڤ رێزێن پارتی دا، بیرا من و ریكخراوێ ناهێت لێ گرێدانا مە ب (وەسفی سەلمان بێدوهی) ڤە هەبوو و دوڤدا هاتمە ڤەگوهاستن بۆ لژنا دهۆك و گەهشتمە شەهید (جەمیل بێسفكی) وەك رێكخستن ل گەل بووم، هێشتا قوتابی ل قوناغا دووێ ل پەیمانگەها ئیسلامی ئەز وێ سالێ كەفتم و من دەست ژ خواندنێ بەردا و ناڤێ من بۆ چوونا لەشكریێ هات و ئەڤە سالا 1982 و پشتی دوێ و سێ هەیڤان من لەشكری ل كەركوكێ كری و من دیت كاودان نەخوشن و شەرێ ئیراق و ئیرانێ یە و من بریار دا ژ لەشكریێ دور كەڤم و پێلم و من هارب كر و پشتی ماوەكی من بریار دا ڤەگەرمە لەشكریێ ڤە دووبارە و پشتی ڤەگەریایم و لێبورین هاتیە دەركرن جارەكا دی هاتمە رەوانەكرن بۆ دەڤەرا (باتیفا) وەك لەشكر و رەبیەكا لەشكرێ ئیراقێ هەبوو و ئەز ژی ئێك ژ ئەندامێن وێ رەبیێ بووم و دەمێ هاتیمە دەستیردانێ و هزرا چوونا ناڤ پێشمەرگەی بوومن دروست بوو و من دەست ب نڤێسینا نامەكێ كر و كاودانێن وی سەردەمی ل رەبیێ من بۆ سەركردە (محو گەودا) دناڤ پێشمەرگەی هەمی شەرۆڤەكرن دنامێ دا و من ئەو نامە داف كەسەكی كو بگەهینتە (محو گەودا) دنامێ دا من ئاماژە پێكر بوو كو دێ ل خالەكا دیاركری و دێ نیشیانەكێ دیاركەم كو وی دەمی زێرەڤان بم هوون وەك پێشمەرگە دشێن هێرشی رەبیێ بكەن و دێ ل گەل هەوە هێمە ناف هێزێن پێشمەرگەی، پشتی من نامە هنارتی و ژ دەستیردانێ زڤریمە ئەركێ خوە ل ربیا (باتیفا گولیا) جاڤەرێی بجه ئینانا پلانا خوە بووم ئەو من نامێ دا ئاماژە پێكری بۆ (محو گەودا) و هێشتا نەبوویە زێرەڤانیا من پەیوەندیەك بۆ بەرپرسێ رەبیا مە هات و بتنێ دگۆتنێ (نعم ، نعم) دوڤدا گۆتە من ورە هەرە فلان خالا زێرەڤانیێ ئەو جهێ من نامێ دا دیاركری كو دێ نیشیان بیت دناڤبەرا مە هەر دوكان دا ئەوی ئەفسەرێ رەبیێ گوهارت و گۆت ل فلان جهی زێرەڤانیا خوە بكە و بێی ئاخفتنەكا دی بێژیتە من و ل دانێ سپێدێ هەمان ئەفسەر كەسەك دا ل گەل من گۆت تو فلان كەس هەرنە فەوجا (دێمكا) گازێ ئەم چووینە سەر جادا گشتی و زیلەك هات و چووینە فەوجێ و پشتی گەهشتین گۆتنە من هەرە ژورا (توجیه سیاسی) شنی بوو من دیار بوو كو گاز و ئەڤ ژورە ژ ئێكدوورن و من شك برن و پشتی رونشتیمە خوار و دو ئەفسەر هاتن و گەلەك پرسیارێن كەسوكی ژ من كر گوند ژ هۆز مال كیڤە ؟ چەند برا؟؟ و گەلەك پرسیار كرن و ل دوماهیێ نەشیا نە خوە و دەرگەهێ ژوورێ گرت و گۆت تو مخربی من گۆتێ نە مخربم و گۆت جنسیا خوە و من چەوا كاغەزە نڤێسی بوو و هوسا ئەفسەری چیرۆك هەمی ب هویری گۆت تە ئەڤ پلانە بۆ هاتنا موخەربا دانابوو دا بهێن رەبیێ بستین و نەچار بووم من داپیدان ب ئەفێ پلانێ و نامێ كر، و ئێكسەر بۆ زاخۆ هاتمە ڕەوانەكرن و دوڤدا ب ترۆمبێلەكێ ل گەل كەسەكێ شنگالی وەك زێرەڤان ڕەوانەی مویسل كر هەتا ب شەڤ مام و دوڤدا ل گەل ئێكی برمە بەغدا و هەتا ڤێرە بتنێ قوتانا من خواری ل گەل ئەفسەران بوویە ئەوێ، ل دەسپێكێ دیفچوونا بابەتی كرین.
هێشتا گۆت: پشتی گەهشتیمە (بەغدا) ئەز هاتمە رەوانەكرن بۆ (حارسی یە)، دوڤدا سپێدێ هاتمە رەوانەكرن بۆ وەزارەتا بەرەڤانیێ و جهەكێ دی و هەر هەمی ئەفسەر بوون و گەلەك قەرەبالغ بوو، و دوڤدا بۆ مەغرەب و گۆتن كێ پێدڤی ب دەست ئاڤێ یە من گۆتێ من پێدڤی پێ هەیە و بچم، برمە هەوالگێریێ ژوورا پێنچێ و رویسكرم و هەیڤا ئێك بوو، و دوڤدا برمە ڤەكولینێ و حەفت هەیڤان مامە ل وی جهی و هەتا نوكە خێزانا من چ من نەزانی و ل كیڤە مە و چوونا دەست ئاڤێ ل وی جهی گەلەك بزحمەت بوو و یا دیاركری، بوو ئانكو دا دەمژمیرێ بووتە گریت و دڤێت ماوەكێ گەلەك كورت با تە خوە قورتالكربا و ئەگەر نە هەر زووی دا ناڤێتە خوینت و ڤێت تو ب دوماهی هاتبای، رۆژەكێ من پێدڤی بوو بچمە دەست ئاڤێ و دەركەفت زێرەڤان كورد و خەلكێ زاخو و گەلەك كەیفا من هات هەر چ نەبیت زمانێ من زانی و ئەوی رێك دامن بچمە دەست ئاڤێ و گۆت ب دلێ خوە وەرە و پشتی حەفتیەك دەربازبووی و كاودان گەلەك نەخوش ئەز هاتمە رەوانەكرن بۆ مەعەسكەرێن رەشین و زیندانا هەژمارا ئێك وئەڤ زیندانە یا بەرنیاس بوو ل سەرانسەری ئیراقێ، ئەو حەفت هەیڤ هەبوو من سەرێ خوە نەشیشتی هندی هاتمێ سابینێ لەشێ خوە بدەم سابینێ كەف نەدا و نەچاربووم ب تاهێتێ سەرێ خوە ب شووم و ریهێن من هوسا هاتبوون و سپیه كەفت بوونە سەرێ من هوسا مرادا من خەو بوو و هەتا بن كەڤشكێ سپیه لبن بوون و ب چ رەنگان نەشیام خوە ژ سپیهان قورتال بكەم و پشتی حەفت رۆژان بەردەوام من سەرێ خوە شیشتی هێشتا سپیه لبن كەڤشكێ مابوون و هەیڤا حەفت بوو ل بەغدا و گەلەك گەرم بوو و ل زیندانەكێ دا بووم بتنێ و هەتا ڤێگاڤێ ژی ئانكو 4/1/1983 هێشتا مالا مە چ ژمن نەدزانی، و دوڤدا هاتمە ڤەگوهاستن دگۆتنە وی جهی ب (معمل) ئەم حەفت كەس ب رێز كرین و هەر كەسەكێ ناڤێ وان دخاند ڤە دگوهاست.
