ئەسیل نوجەیفی: نیشانێن هەلوەشاندنا حەشدا شەعبی دیاربوون
پارێزگارێ پێشتر یێ نەینەوا راگەهاند: ئەو گرفتێن گرێدای ب مەزاختنا مووچەیێ هێزێن حەشدا شەعبی، دەستپێكا پرۆسەیا هەلوەشاندنا گرۆپێن چەكدارە و تێكهەلكرنا وان ل گەل دەزگەهێن ئەمنی، ئەڤە ژی وەك پشكەك ژ گوهۆڕینێن چاڤەڕێكرینە بەری هەلبژارتنێن داهاتی یێن جڤاتا نوونەرێن ئیراقێ.
ئەسیل نوجەیفی، پارێزگارێ پێشتر یێ نەینەوا ل تۆرا جڤاكییا فەیسبووكی بەلاڤكر» كێشەیا مەزاختنا مووچەیێ هێزێن حەشدا شەعبی، ئاماژەیە بۆ دەستپێكا پرۆسەیا هەلوەشاندنا وان گرۆپان، كو دبیت بەری هەلبژارتنێن داهاتی یێن جڤاتا نوونەرێن ئیراقێ ئەو چەندە روو بدەت».
نوجەیفی ئاماژە ب وێ چەندێ ژی كر» ئەو بەدیلێن هاتینە پێشنیازكرن، وەك دروستكرنا سەكۆییەكێ نوو بۆ بەلاڤكرنا مووچەیان یان ب كاش، د دەمكی نە، چونكە ئەو ئالیێن پارەیێ وان سەكۆیان ددەن، وەك وەزارەتا دارایی یان بەنكا ناڤەندی، مەترسییا سزایێن ئەمریكی ل سەرە».
ئەسیل نوجەیفی رۆهنكر ژی» تنێ چارە هەلوەشاندنا گرۆپێن حەشدا شەعبییە و دوورئێخستنا وان كەسایە یێن سزا ژێ دگرن، هەروەسا تێكهەلكرنا وان گرۆپان ل گەل لەشكری و پۆلیسان».
پارێزگارێ پێشتر یێ نەینەوا گوت ژی» ئەڤ پرۆسەیە ل گەل هەلبژارتنان دێ ب لەزتر بیت، دبیت ل جڤاتا نوونەرێن داهاتی هەژموون و كاریگەرییا گرۆپێن چەكدار كێم ببیت».
هەروەسا دیاركر» حوكمەتا ئیراقێ ئاگەهداری ڤێ سیناریۆیێ یە، بەلێ وێ پێ باشترە بێ دەنگ بیت، د دەمەكیدا چاڤەڕێی سەرۆكێ گرۆپێن چەكدار دكەت بۆ وێ چەندێ باوەریێ پێ بینیت ئەڤە گونجایترین و سەلامەتترین چارەسەرییە».
ل رۆژا 26 مەها بۆری، ژێدەرێن ئاگەهدار ئاشكراكر كو مووچەیێ حەشدا شەعبی ب ئەگەرەكێ نەدیار هاتیە راگرتن. ئەڤێ چەندێ ژی نەرازیبوونا چەكدارێن حەشدا شەعبی ل دووڤ خوە ئینا.
ل دووڤ پەرلەمانتار موعین كازمی، فشارێن سیاسی و ئابۆری یێن ئەمریكا ل سەر حوكمەتا ئیراقێ و بەنكا ناڤەندییا ئیراقی و بەنكێن دی، كاریگەری ل سەر راگرتنا مووچەیێ حەشدا شەعبی هەبوو.
