«پەیڤ» هەمبێزەكا بەردەوام
عەبدولخالق سولتان
كۆڤارا (پەیڤ) یا كو ل دەسپێكا سالێن هەشتیان ژ سەدێ بیستێ بۆ جارا ئێكێ ژ ئالیێ ئێكەتیا نڤیسەرێن كورد لقێ دهوك دەركەفتی، و بەری چەند رۆژان ژمارە 100 ژێ هاتە چاپكرن وبەلاڤكرن، ب راستی ئەڤێ كۆڤارێ تایبەتمەندیا خوە یا هەی ویا جێوازە ژ كۆڤارێن دی ئەوێن ل پارێزگەها دهوكێ دەردكەتین، ژبەركو ئەڤێ كۆڤارێ ئاراستەیەكێ دیار هەر لدەسپێكا دەركەفتنا وێ ب خوەڤە گرتیە تا دویماهیك ژمارە، ئەو ژی هەمبێزكرنا بەرهەمێن نڤیسەر و ئەدیبێن پارێزگەها دهوكێ، و یێن كورد ب شێوەكێ گشتی ل هەر جهەكێ هەبن، ئانكو جهـ نە بوویە ئاستنگ ومەرج بۆ بەلاڤكرنا بەرهەمان د ئەڤێ كۆڤارێ دا، لەورا بەرهەمێن ب دیالكتێن جودا یێن كوردی تێدا دهێنە دیتن، و نڤیسەرێن كورد ژ باكور وباشوور و رۆژئاڤا و رۆژهەلات و نڤیسەرێن كوردێن دوورە وەلات ژی خۆ تێدا دبینن.
ئەڤێ كۆڤارێ بەردەوام خوە ل بەرهەمێن ئەدیب و نڤیسەرێن كورد یێن هەمی قۆناغان وخودان هزرێن جودا كریە خودان، ئانكو نڤیسەرێن كەڤن و كلاسیك دگەل نڤیسەرێن نویخواز و نڤیسەرێن چەپ و نڤیسەرێن رادیكالی و یێن گەنج و دانعەمر هەمی تێدا دهێنە خویاكرن، وبەردەوام بەرهەمێن كەسانێن مینا مامۆستا حەجی جەعفر و رەشید فندی و ئەنوەر محەمەد تاهر و مۆئەیەد تەییب و محسن قۆچان و فازل عەمەر و جەلال مستەفا و چەندین نڤیسەرێن دیار یێن كو هەر ژ دەسپێكا دەركەفتنا كۆڤارا پەیڤ تێدا نڤیسین دگەل چەندین ناڤێن نوی كو د ئەڤان سالان دا دەست بنڤیسینێ كرینە دهێنە دیتن.
ئەڤ هەمبێزا كۆڤارا پەیڤ بۆ خامە وپەیڤێن نڤیسەران، بوویە چرایەك گەش و گەرم، كو بەردوام نڤیسەر ل دۆر كۆم ببن، وەلێكریە «پەیڤ» نە تنێ كۆڤارەكا ئەدەبی ب مینیت، بەلكو مینا كارگەهەكێ بیت و بەردەوام نڤیسەرێن نوی تێدا بەرز ببن، و كۆڤار ئەوان بۆ جەماوەری ب دەتە نیاسین، لەورا بوویە چەترەك و كەسانێن داهێنەر هەمبێز دكەت، و هۆسا بەردەوامیێ ددەتە كاروانێ نڤیسنێ و ئەدەبیاتێ ل دەڤەرا بەهدینان.
د پیڤاژۆیا خو دا ، كۆڤارا پەیڤ، ب ئەركەكێ قورس وگران رابوویە، ئەو ژی پاراستنا پەیڤ و رێزمانا زمان كوردیە، ب تایبەتی دیالكتا بەهدینان، نەخاسمە ل سالێن هەشتیان و نۆتان ژ چەرخێ بۆری كو دەرگەهێن تایبەت ب بەلاڤكرنا بابەتێن كرمانجی ل ئیراقێ د كێمبوون، لەورا پرانیا نڤیسەرێن مە نەچاردبوون پەنایێ ببنە بەر رۆژنامە وكۆڤارێن ب زارێ سورانێ دەردكەفتن، لێ دەركەفتنا كۆڤارا پەیڤ رێك بۆ نڤیسەرێن پارێزگەها دهوك پەیداكر كو خۆ ماندی بكەن و پتر بنڤیسن.
هەروەسا كۆڤارا پەیڤ ب رێكا بەلاڤكرنا چەندین گۆتار و نڤیسینێن ل دۆر هونەرێ شێوەكاری وشانۆیێ ومۆزیكێ خزمەتەكا مەزن گەهاندیە ئەڤان كەرتێن هونەری، و د 100 ژمارەیێن بۆریدا ب دەهان بەرهەم بەلاڤكرینە چ وەكو دەقێن رەخنەیی یان تێكستێن داهێنانێن شانۆیی یان دانەنیاسینا كەسانێن شێوەكار و شانۆڤان و مۆزیكژەن.
ل دووماهیێ فەرە دەستخوەشی ل دەستەیێن رێڤەبەریا ئێكەتیا نڤیسەران بكەین كو شیایین سەرای كاودانێن سەخت یێن دەڤەرا مە تێدا بۆری بەردەوامیێ بدەنە دەرئێخستنا ئەڤێ كۆڤارا گرنك و ماقیل.
