رۆندكێن سه‌فه‌ره‌كا دویر
ئیبراهیم دێرگژنیكی
رۆندكا ببارینه
رۆندكین ته د كویرن
ژ نالینا سه‌فه‌ره‌كا دویرن
ئه‌و نالینێن
ژ جه‌رگێ ته د وه‌شن
دزانم چ ئاگره‌كێ ب دویڤ ڤه!
ئه‌و دیمه‌نێ ته نه‌دڤیا ببینی
و هێشتا یێ ب گۆمان بووی
لێ ده‌مێ ته‌زانی
ئه‌ڤا چاڤێن ته دبینیت
راسته نه‌خه‌ونه
ب هه‌ردو ده‌ستا
چاڤا ژ وان دیمه‌نا دگری
ل بێده‌نگیا عه‌سمانێ پری ستێر
و بزاڤا شلخا مرۆڤان
سه‌رمایێ هه‌می تشت
یێن بێده‌نگ كرین..
بتنێ برینێن ته
ل سه‌قایه‌كێ سار دگه‌رم بوون
بێده‌نگی دشكاند!
جاران ته دڤیا
دویر بچی و بكه‌یه هه‌وار!
و بێژی «نه نه نه ئه‌ڤه نه‌بوویه«
و چاڤا ژ راستیێ ڤه‌شێری
ته دڤیا رۆندكان بكه‌یه باران
لێ د سینكێ ته‌دا په‌نگیان
و هشك بوون.. نه‌هاتنه ده‌ر
هه‌روه‌كی ژیان خه‌ونه
ته‌ڤنه‌كێ ئالۆزه
شه‌ربه‌ته‌كا ته‌عله
دویركه‌تنا خۆشتڤیانه
لێ چه‌رخا به‌رده‌وامه
هند به‌رزه دبن..
نوی په‌یدا دبن
چه‌نده‌ك دی ژی..
ژبیركرینه
یێن ل بیر ژی
ب بۆرینا رۆژان
دهێنه ژبیركرن.
