یاریزانێن ئامێدیێ ئەنجامێن دلخوەشكەر ب دەستڤە ئینان
یاریزانێن تیما یانەیا ئامێدیێ بۆ یارییا كیك بۆكسینگێ شیان ڕێزێن ئێكێ هەتا سێیێ ل سەر كێشێن خوە یێن جەستەیی د قارەمانییا ئیراقێ بۆ یاریزانێن پێشكەڤتی بهێن ئەوا هەڤڕكیێن وێ ل سەر سیستەمێن Full Contact و Low Kick. ب پشكدارییا 250 یاریزانان ژ 30 یانەیێن ئیراقێ و هەرێما كوردستانێ ل باژێرێ سلێمانیێ هاتینە كرن.
ئەنجامێن یاریزانێن یانەیا ئامێدیێ بڤی شێوەیی بوون،
ئەلند عەبدولرەحمان بۆ كێشا گران ڕێزا ئێكێ هات سیستەمێ لۆكیك.
ئاماد سەگڤان بۆ كێشا 51 كگم ڕێزا ئێكێ هات سیستەمێ فۆل كۆنتاك.
ئەلند نەزیر بۆ كێشا 54 كگم رێزا دویێ هات سیستەمێ لۆكیك.
بەهزاد سالح بۆ كێشا 71 كگم رێزا سێیێ هات سیستەمێ لۆكیك.
ل دۆر ڤێ یەكێ عەبدولرەزاق سەعید شێخۆ ڕاهێنەرێ تیما یانەیا ئامێدیێ بۆ رۆژنامەیا ئەڤرۆ گۆت: دەستخوەشیێ ل هەموو یاریزانێن خوە دكەم كو شیان ئەنجامێن دلخوەشكەر بینن و ئۆمێدێن مە بۆ ئەنجامێن مەزنتر بینن ل سەر ئاستێ قارەمانیێن جودا، ئەڤ ئەنجامە بەلگەیە كو پلانێن مە د سەركەڤتی نە، سەرباری بتنێ مە ب پێنچ یاریزانان پێشكدار كربوو لەوما ژی ل سەر ئاستێ گشتی خالێن یانەیێ تێرا هندێ نە دكر رێزبەندیێن ئێكێ یا گشتی وەربگرین بەرۆڤاژی هندەك یانەیان زێدەتر 10 یاریزانان پشكداربوون.
هەروەسان ناڤهاتی گۆت: وەكو یانەیا ئێكانە ل پارێزگەهێ ئەم شیاین ئەڤان ئەنجامان بینن و ئەڤە ژی وێ چەندێ دگەهینیت كو ئەم یێ كارەكێ دروست و پلانێن باش دانین، سۆپاسییا یانەیا ئامێدیێ ژی دكەین دگەل مە هەڤكارن و ئەم ڕژدن ل سەر باشتر و دەستڤەئینانا ئەنجامێن پێشیێ، لێ بۆ هەر پێنگاڤەكێ پێدڤی ب پشتەڤانیێ نە.
