پێدڤییە حوكمەتا ئیراقێ رێگریێ ل میلیشیا و گرۆپێن چەكدار بكەت
بالیۆزخانەیا ئەمریكا ل ئیراقێ، هێرشێن درۆنی ل سەر زەڤیێن پەترۆلی ل هەرێما كوردستانێ شەرمزاركرن و راگەهاند: پێدڤییە حوكمەتا ئیراقێ رێگریێ ل میلیشیا و گرۆپێن چەكدار بكەت.
دوهی سێشەمبی 15/7/2025، بالیۆزخانەیا ئەمریكا ل ئیراقێ د پەیامەكێدا، هێرشێن درۆنی ل سەر زەڤیێن پەترۆلی ل هەرێما كوردستانێ شەرمزاركرن.
بالیۆزخانەیا ئەمریكی د پەیاما خوە دا دبێژیت» ئەمریكا وان هێرشێن درۆنی ل ڤێ دووماهیێ ل سەرانسەری ئیراقێ، ب هەردو هێرشێن درۆنی 14 و 15 ڤێ مەهێ ل سەر ژێرخانەیا گرنگ یا زەڤیێن پەترۆلی ل خوورمەلە و سەرسنك ل هەرێما كوردستانێ، شەرمزار دكەت».
بالیۆزخانەیا ئەمریكا دیاركر ژی» پێدڤییە حوكمەتا ئیراقێ دەستهەلاتا خوە بكاربینیت بۆ رێگریكرنێ ل ئالیێن چەكدار بۆ ئەنجامدانا وان هێرشێن ل سەر وان جهان د ناڤخوەیا وەلاتیدا، ژ وان ژی ئەو جهێن كو كۆمپانیێن ئیراقی و نێڤدەولەتی وەبەرئێنان ل پاشەڕۆژا ئیراقێ كریە».
دیاركر ژی» ئەو هێرشە د قەبوولكری نینن و گەفن ل سەر سەروەرییا ئیراقێ و ئاستەنگان دئێخنە پێشبەری بزاڤێن ئیراقێ بۆ سەرنجڕاكێشانا وەبەرئێنانا دەرەكی».
هەروەسا بەلاڤكر» داخواز ژ حوكمەتا ئیراقێ دكەین ڤەكۆلینێ بكەت تاكو بزانیت كی ل پشت وان هێرشایە و روو ب روویێ بەرپرسیارەتیێ بكەت».
