کا بێـژە مـن

رەمەزان ئیسماعیل گەرەگوهی

کا بێژە من..
کێ وەکی من
ل سەر خاترا تە و
جوانییا دو چاڤێن تە
ئەڤینداری و ئەشق کریە؟!
کا بێژە من..
کێ تەمەت من
تەڤ دەمێ خوە
ژ بو دیتنا تە
ژ ئێڤاری هەتا سپێدێ
ل سەرێ ڕێکا بۆراندی یە و
ل بەندەمان و ژڤانێن تـە
ژ پێرڤە مایە و هلتویتریە؟!
کا بێژە من..
کی هندی من
ب درێژییا زڤستانێ
ل شەڤێن تاری و تلچاڤانێ
ل سەرێ کۆلانێن ڤی گوندی و
ل ڤی تاخی
ل پێشوازیا تە ڕاوەستیایە و
پشتی هاتی
ڕۆژا پاشتر ژ کەیفادا
تێر دیلان و سەما کریە؟!
کا بێژە من..
کێ هندی من
ل دەمێ خەما و
تە هەدار و سەبر دنەما
کۆڤانێن تە هەلگرتینە و
بیریا ئەشقێ بۆ تەکریە و
دێمێ تەیێ سۆر و سپی
ژ ڕۆندکا ڤەمالیە و زوهاکریە؟!
کا بێژە من..
کێ تەمەت من
دلێ تەیێ تژی کەسەر
سینگێ تە یێ تێکدا کەدەر
ژ نەخوەشییان چارە کریە و
ژ ئێشان و
خەمێن گران تەناکریە؟!
کێ گەمیـیا
هەمی ئومێد و هیڤییا
ژ دەریا یا
هزار هزار زڤڕۆک تێدا
ژ سەمتا ڕێکا مەترسییا و
سەد گرفت و ئاستەنگ دڕێدا
بو سەر لێڤ و
بەرب جهێن ئارام بریە و
ب دەستێن خوە
زەندا تە یا سپی گرتیە و پەیاکریە؟!
کا بێژە من.. کا بێژە من..

کۆمێنتا تە