مێركاتۆیا ستێرێن ئیراقێ گەرم بوویە
پرانییا یانەیێن ئیراقێ ئەوێن پشكدار د خولا ستێرێن ئیراقێ دا یا فوتبۆلێ دا لڤینێن نهێنی و ئاشكەرایی ژبۆ دەستڤەئینانا یاریزانێن پیشەكار و نافخوە دكەن خوە بەرهەڤكرن بۆ وەرزێ نوو یا خولێ ژ وانا یانەیێن كوردستانی نە.
ل دووڤ ژێدەرێن جودا و دەنگۆباسێن دهێنە بەلاڤكرن، یانەیا دهۆك پێشوەخت و نە فەرمی دگەل هەر ئێك ژ رێوان ئەمین، ئەحمەد زێرۆ ژ یانەیا شورتە، ئەحمەد عەلی یاریزانێ ڕەڤەندا كورد ل ئۆرۆپا، سەعد ناتق یاریزانێ یانەیا تەلەبە گەهشتینە ڕێكەڤتنێ، د بەرانبەردا چوونا گۆلپارێزێ وان محەمەد سالح بۆ یانەیا جەوییە ئێكلابوویە، هەروەسان دانۆستاندن دناڤبەرا ستێرێ دهۆكێ هارۆن ئەحمەد و پیشەكارێ وێ یانیك زاكیری دگەل یانەیا شورتە بەردەوامبن، هەروەسان هاتییە زانین هەر ئێك ژ مۆسێس لۆكاس، لۆكاس هێنریك بەر ب وەلاتێ خوە بەرازیل بچن لێ دبیت مۆسێس ژی بچینە یانەیا شورتە، د بەرانبەر دا یانەیا دهۆك بزاڤێن ئینانا كۆمەكا یاریزانێن خودان شیان دكەت.
ژلایێ خوەڤە یانەیا زاخۆ د وەرزێ ئەڤ سالە دا دبیت گوهۆرینێن بەرچاڤ بكەت تایبەت پشتی نەمانا ڕاهێنەرێ وێ عەبدولغەنی شەهد و نەشیایی چو ناسناڤان ببەت، ل دووڤ ژێدەرێن جودا، دبیت پشتی هەلبژارتنێن دەستەیا نوو یا كارگێریێ پێلەكا گوهۆڕینێ پەیدا بیت، هەرچەندە یاریزانێ وێ ئەحمەد یاسین بفەرمی چوونا خوە ژ ئیراقێ ڕاگەهاند، دبیت ژێلوان حەمە، محەمەد عەل عەبۆد، یێ یەمەنی ناسر محەمەدوه، پاتریك مارسێلۆ و گۆستاڤۆ هێنریك بۆ وەرزێ بهێت نەمینە ل یانەیێ.
ژلایێ خوەڤە یانەیا ئەلگەرمە هوشداری دایە هەموو یانەیێن ئیراقێ بۆ وەرزەكێ ئاگرین ئەوێن گرێبەستا چەند یاریزانێن باش كرییە ژ وانا ئەحمەد مكنزی، شەهاب رەزاق، یێ نێجیری یوسف ئۆمارۆ، یێ ئوردنی ئیبراهیم ئەلسەعادە، دیسان بزاڤ دهێنە كرن ئەمجەد عتوان ستێرێ یانەیا زاخۆ ڕازیبكەت بۆ ئیمزاكرنا گرێبەستێ.
