جاسم شەعبان: روودان ژ نشكەكێ ڤە چێبوو و هەموو یاریزان ب سلامەتن
پشتی ب دووماهی هاتنا یارییا تیما لاوێن یانەیا تەناهی دگەل یانەیا ئاكرێ ژ چارچووڤەیێ گەڕا شەشێ ژ خولا كوردستانێ یا فوتبۆلێ ل سەر ئاستێ لاوان، د دەمێ ڤەگەڕیانێ دا بۆ باژێرێ دهۆكێ ترۆمبێلا ڤەگۆهاستنا شاندێ تیما تەناهی تووشی روودانەكا ژ نشكەكێ ڤە چێبوو و یاریزان ب سلامەتن.
ل دۆر ڤێ یەكێ و دداخویانیەكێ دا جاسم شەعبان سەرۆكێ یانەیا تەناهی بۆ رۆژنامەیا ئەڤرۆ گۆت: ل دووڤ خشتەیێ یاریێ دوشەمبییا بۆری شاندێ تیما مە یا لاوان بەر ب باژێرێ ئاكرێ بڕێكەڤت بوو ژبۆ ئەنجامدانا یارییا خوە یا گەڕا شەشێ ژ خولا فوتبۆلا كوردستانێ، لێ پشتی ئەم ڤەگەڕیان و گەهشتینە دوریانا گۆندێ رۆڤیا ژ نشكەكێ ڤە ترۆمبێلەكا تایبەت ڤیكترا خوە ل لایەكێ ترۆمبێلا شاندێ تیما مە دا ژ جورێ كوستەر كو هەموو یاریزانێن مە تێدا بوون، دیسان ئەو روودانە دوبارە بووڤە هەتا بوویە ئەگەر تائێرەكا ترۆمبێلێ پەقین تێدا چێبوو، ل سەر هوشیارییا شۆفێرێ ترۆمبێلێ شیا كونترۆلا ترۆمبێلێ بكەت و نەهێلیت وەرگریێت، هەرچەندە زیانێن ماددی هەبوون و برینێن بچووك ب هندەك یاریزانان كەڤت لێ سۆپاس بۆ خودێ هەموو یاریزان ب سلامەتن.
ژلایەكێ دووڤە ناڤهاتی گۆت: براستی روودانەكا دل ئێش بوو و ترس ئێخستە د دلێ مە و هەموو یاریزان و شاندنێ تیمێ دا ژبەركو ل پێشچاڤێن مە بوو و هەروەسان هەموو یاریزان بەرپرسیارەتییا مەنە، سۆپاس بۆ خودێ روودان مەزن نەبوویی و هەموو یاریزان ب سەلامەتن و دوبارە ڤەگەرنە ڕاهێنانێن خوە
