فدراسیۆنا فوتبۆلا ئیراقێ كەمترخەمی كرییە و دێ سكالایێ تۆمار كەین
د داخویانیەكێ دا د. عەبدوللا جەلال سەرۆكێ یانەیا دهۆك بۆ رۆژنامەیا ئەڤرۆ دیار كر فدراسیۆنا فوتبۆلا ئیراقێ ئەگەرێ سەرەكی یە یانەیا دهۆك ژ قارەمانییا ئاسیا بێ بەهركرییە و كەمتر خەم بوویە و دێ سكالایێ ل دادگەها كاس دژی فدراسیۆنێ تۆماركەن.
زێدەتر ناڤهاتی گۆت: بابەت نە یێ ئەڤ سالە و مە سالا بۆری ژی وەرنەگرتییە ژبەركو ئەم پێدڤی ب ڕێپێدانا ئاسیایی نەبووین و پشكدارییا مە د كۆپا كەنداڤی دا یا پێدڤی ڕێپێدانێ نەبوو، لێ ئەڤ سالە ئەم ماینە سەرسۆرمان كو بادەكا مە ژلایێ فدراسیۆنا ئاسیا ڤە نە هاتبوو وەرگرتن، ل دووڤ ڕێنمایێن ئاسیایی دماوەیێ 15ێ مەها ئادارێ هەتا 15ێ نیسانێ هەر یانەیەكا ئیراقێ مافێ هەیی بادەكا ڕێپێدانێ پێشكێشی فدراسیۆنا فوتبۆلا ئیراقێ بكەت ئەوێن ژلایێ خوە دێ پێشكێشی فدراسیۆنا ئاسیا كەن ژبۆ وەرگرتنا ڕێپێدانێ، وەكو یانەیا دهۆك بادەكا خوە ب شێوەیێ یاسایی هنارتینە و هەموو خالێن وێ تایبەت یێن ژێرخانەیا وەرزشی دروست بووینە.
هەروەسان د. عەبدوللا جەلال گۆت: ئەگەرێ سەرەكی یێ نە وەرگرتنا مە ب ڕێپێدانا ئاسیایی فدراسیۆنا فوتبۆلا ئیراقێ و ڕێڤەبەرییا ڕیپێدانا ئیراقییە، ژبەركو مە پەیوەندی ب فدراسیۆنا فوتبۆلا ئاسیا كرییە ئەوان ئاشكەراكرییە كو ئەوان نەك ڕازیبوون نە دایە بۆ ڕێپێدانێ بەلكو ژلایێ فدراسیۆنا ئیراقێ بوویە بێ هیچ ئەگەرەكی، لەوما ژی مە تیمەكا پارێزەران ل دەرڤە بەرهەڤكرییە و دێ سكالایێ ل دادگەها كاس یا نێڤدەولەتی دژی فدراسیۆنا فوتبۆلا ئیراقێ كەین ژبەركو ئەو كەمتەر خەم بووینە.
ناڤهاتی گۆت ژی: هەموو بادەكێن مە یێن تایبەت ب ڕێپێدانێ د بەرهەڤ بوون و بێ كێماسی و ئاریشە و دماوەیێ یاسایی دا هاتینە هنارتن و مە گەلەك ئاگەهدار كرینە ژبۆ دووڤچوون و هنارتنا بادەكا یانەیێ بۆ فدراسیۆنا ئاسیا و مە بەلگە ژی هەنە، ب مخابنیڤە پشتی دەمێ یاسایی ب دووماهی هاتی و دەمێ زێدەكری ژی یێ تەمییزێ ئەم ئاگەهدارنەكربوون بوو ئەگەر ئەم بێ بەهركرین ژ پشكدارییا دەرڤە.
ژلایەكێ دوووڤە سەرۆكێ یانەیا دهۆكێ ئەوچەندە ژی گۆت: گۆمان یا هەیی بەرپرسێ ڕێپێدانێ ل فدراسیۆنا ئیراقێ ب دروستی كارێ خوە نە ڕابوویە و مە پەیوەندی ب سەرۆكێ فدارسیۆنا ئیراقێ كرییە و بەلگە ژی بۆ هنارتینە، مخابن بێسەرۆبەریەكا دناڤ فدراسیۆنێ دا و نێزكبوونا هەلبژارتنانە، لێ ئەم بێدەنگ نامینین و دێ سكالایا خوە تۆماركەین و فدراسیۆنا فوتبۆلا ئاسیا ئەم ب ماف داناینە سكالایا خوە تۆماربكەین، ئەم دێ هەموو بزاڤان كەین و هیڤیێن خوە ڤەگەڕینن.
