فره‌نسا: دڤێت مافێن کوردان د دستوورێ سووریێ دا بهێنە گەرەنتیکرن
پشتی کۆمبوونا نوونەرێن ئەمریکا و فرەنسا ل گەل وەزیرێ دەرڤە یێ سووریێ ل پاریسێ وەزیرێ دەرڤە یێ فرەنسا د پەیوەندیەکا تەلەفۆنی دا ل گەل فەرماندارێ هەسەدێ دیار دکەت، دێ د سووریا نوو دا هەموو مافێن گەلێ کورد هێنە گەرەنتیکرن و دێ کورد گەهنە هەموو مافێن خوە.
ل پاریسێ جان نۆیێل بارۆ وه‌زیرێ ده‌رڤه یێ فره‌نسا ل گه‌ل تۆماس باراک نوونه‌رێ سه‌رۆکێ ئه‌مریکا بۆ کاروبارێن سووریێ و ئه‌سەد شه‌یبانی وه‌زیرێ ده‌رڤه یێ حوکمه‌تا سووریێ کۆمبوو. د کۆمبوونێ دا بەحسێ ره‌وشا هه‌رێما سوه‌یدا، په‌یوه‌ندیێن حوکمه‌تا سووریێ ل گەل رێڤه‌به‌ریا خوه‌سه‌ر ئانکو رۆژئاڤایێ کوردستانێ هاتە کرن، هه‌ر سێ ئالیان پشتی کۆمبوونێ راگه‌هاندن کو ئه‌مریکا و فره‌نسا دووڤچوونا پێشهاتێن ل سوه‌یدایێ و رۆژئاڤایێ کوردستانێ دکەن و هەر سێ ئالیان دیار کرینە دڤێت توندوتیژیا ل سووریێ ب دووماهی بهێت و دڤێت ئێکپارچەیا ئاخا سووریێ ژی بهێتە پاراستن.
هەروەسا هاتە راگەهاندن، کو د کۆمبوونێ دا بەحسێ رێککەفتنا بەری نها یا د ناڤبەرا فەرماندارێ هەسەدێ و ئەحمەد شەرعی دا هاتیە کرن و ئەمریکا و فرەنسا داخواز ژ سووریێ کرینە کار بۆ بجهکرنا رێککەفتنا ل گەل هەسەدێ بکەت، چونکی بێی رێککەفتنا ل گەل رێڤەبەریا خوەسەر و هەسەدێ پرسێن نها ل سووریێ ناهێنە چارەسەرکرن، دڤێت هەر دو ئالی ب رێیا دانوستاندنان پرسێن هەی چارەسەر بکەن و رێ نەدەن رەوشا سووریێ ئالۆزتر لێ بهێت.
ل ئالیێ دی پشتی کۆمبوونا هه‌ر سێ به‌رپرسێن ئه‌مریکا، فره‌نسا و سووریێ، وەزیرێ دەرڤە یێ فرەنسا ژی ب رێیا تەلەفۆنێ ل گەل مەزلوم عەبدی فەرمانداری گشتی یێ هێزێن سووریا دیموکرات ئاخڤی و دیار کر، گرنگە شەڕێ ل دژی داعشێ و گرۆپێن دی یێن تیرۆرستی ل سووریێ بەردەوام بیت و نابیت رێ بهێتە دان جاەرکا دی تیرۆرست رەوشا سووریێ ئالۆز بکەن و سەبارەت ب رۆژئاڤایێ کوردستانێ ژی وەزیرێ دەرڤە یێ فرەنسا دیار کریە، وەکو فرەنسا ئەو د رژدن، کو دڤێت د سووریا نوو دا کورد خوه‌دان هه‌موو مافێن خوه یێن سیاسی، نه‌ته‌وەیی و که‌لتوری بن و رێڤه‌به‌ریا کوردان گه‌ره‌نتیا سووریا نوو یە و دڤێت هەموو مافێن گەلێ کورد د دستوورێ نوو یێ سووریێ دا بهێنە گەرەنتیکرن و فرەنسا پشتەڤانێ مافێن گەلێ کوردە ل سووریێ.
د پەیوەندیا تەلەفۆنی دا فەرماندارێ گشتی یێ هەسەدێ ژی دیار کریە، وەکو هێزێن سووریا دیموکرات د رەوشا نها دا ئەو دەست ژ چەکێن خوە بەرنادەن و دڤێت بابەتێ پشکداریا وان د لەشکرێ نوو یێ سووریێ دا ژی ل گۆر تایبەتمەندیا هێزێن سووریا دیموکرات بیت و سوپاسیا هەلوەستێ فرەنسا یێ بۆ پشتەڤانیا مافێن گەلێ کورد ل سووریێ کر.
