ئەڤرۆ سالڤەگەڕا جینۆسایدا شنگالـێ یە
دهۆك، لەزگین جۆقی:
وەكو ئەڤرۆ 3/8/2014 تیرۆرستێن داعشێ شنگال داگیركر و ب هزارەها كەسێن سڤیل گرتن و كوشتن و پتر ژ دو هزار زارۆك بوونە ئێتیم.
حسین قائیدی، بەرپرسێ نڤیسینگەها رزگاركرنا رەڤاندیێن ئێزدی بۆ رۆژناما ئەڤرۆ دیار كر، رەڤاندیێن ئێزدی د ناڤ خێزانێن داعشێ دا ماینە، تیرۆرستێن داعشێ ل سالا 2017 وەكو چەكدار نەماینە و هێشتا چارەنڤیسێ پتر ژ دو هزار رەڤاندیێن ئێزدی دیارنینە، كو پتریا وان ل سووریا، ب تایبەت كەمپا هۆلێ دا ماینە.
حسین قائیدی گۆت: «د جینۆسایدا شنگالێ دا شەش هزار و 417 كەسێن ئێزدی ژ لایێ تیرۆرستێن داعشێ ڤە هاتبوونە رەڤاندن، هەتا نوكە ئەم شیاینە سێ هزار و 590 كەسێن ئێزدی ژ هەردو رەگەزان رزگار بكەین و كار بەردەوامە بۆ رزگاركرنا هەمی رەڤاندیێن ئێزدی».
گۆتژی: «هەتا نوكە پتر ژ دو هزار رەڤاندیێن ئێزدی د ناڤ خێزانێن داعشێ دا ماینە، ئەڤە وێ دگەهینیت، كو چو جوداهی د ناڤبەرا داعشێ و خێزانێن داعشان دا نینە، راستە تیرۆرستێن داعشێ وەكو چەكدار نەماینە، لێ هزرا توندرەوا داعشێ د ناڤ خێزانێن داعشان دا مایە، ئەڤە بوویە ئەگەر هەتا نوكە گەلەك رەڤاندیێن ئێزدی نەهاتبنە رزگاركرن».
