دڤێت پەرلەمانێ تورکیا ببیتە ناڤەندا چارەسەرکرنا پرسا کوردی
ئەندامەکێ پەرلەمانێ تورکیا دیار دکەت، پێکئینانا کۆمسیۆنا ئاشتیێ ل پەرلەمانێ تورکیا گەلەک گرنگە و وەکو پارتا کۆماری وان دڤێت پرسا کوردی ل پەرلەمانێ تورکیا بهێتە چارەسەرکرن و گرنگە هەموو هێزێن دی یێن ل پەرلەمانی ژی هاریکار بن.
سەزگین تانری کولو ئەندامێ پەرلەمانێ تورکیا سەر ب فراکسیۆنا پارتا کۆماری دیار کر، پێکئینانا کۆمسیۆنا پەرلەمانی ژ بۆ قووناغا ئاشتیێ گەلەک یا گرنگە، وەکو پارتا کۆماری وان بەری نها ژی دیار کرینە، کو دڤێت پرسا کوردی ل پەرلەمانێ تورکیا بهێتە چارەسەرکرن، مخابن هندەک هێزین سیاسی هەتا نها ژی دخوازن بابەتێ پرسا کوردی ژ بۆ بەرژەوەندیێن خوە بکار بینن و ئەو یەک ژی بوویە ئاریشەکا گەلەک مەزن و گۆت: (مخابن هێشتا ژی دەزگەهێن راگەهاندنا تورکیا ب تایبەتی ژی ئەو دەزگەهێن سەر ب دەستهەلاتێ نە، زمانەکێ توند ل دژی کوردان بکار دئینن، نها هەر کەس بەحسێ ئاشتیێ دکەت، وی دەمی دڤێت سڤکاتی ب کوردان و دەم پارتی نەهێتە کرن، ئاشتی وەسا دروست نابیت، دڤێت زەمینە بۆ ئاشتیێ و پێکڤەژیانێ بهێتە دروست کرن، ژ بەر ڤێ یەکێ ژی وەکو پارتا کۆماری ئەم داخواز دکەین بەرپرسێن دەولەتێ دەست ژ هندەک داخویانیێن توند بەردەن).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، ب شەڕی و توندوتیژیێ چو دەمەکێ پرسا کوردی و پرسێن دی یێن ل تورکیا ناهێنە چارەسەرکرن، پرسا کوردی پرسەکا گەلەک گرنگە ل تورکیا، نها زەمینەیەک دروست بوویە، ئەم دبێژین دڤێت هەموو هێزێن سیاسی ب تایبەتی ژی بەرپرسێن ئاکپارتیێ هەست ب بەرپرسیاریا خوە یا دیرۆکی بکەن و نەبنە ئەگەرێ ژناڤچوونا قووناغا ئاشتیێ، چونکی بەری نها ژی ل تورکیا قووناغەکا ئاشتیێ هەبوو، لێ ئاکپارتیێ ژ بۆ بەرژەوەندیێن خوە یێن تەنگ ئالۆزی دروست کرن و ژ بەر ڤێ یەکێ ژی قووناغا ئاشتیێ یا بەری نها نەگەهشتە چو ئەنجامەکێ و گۆت: (وەکو پارتا کۆماری مە ئاشتی دڤێت، مە دڤێت پرسا کوردی ل پەرلەمانێ تورکیا بهێتە چارەسەرکرن، مە دڤێت ئاکپارتی ژی راستیێن هەی بۆ خەلکی ئاشکرا بکەت، نابیت ژ بۆ چارەسەرکرنا پرسا کوردی هندەک تشت ب نهێنی بهێنە کرن، ئەو یەک دێ بیتە ئەگەرێ ئالۆزیێن مەزن).
سەبارەت ب پێکئینانا کۆمسیۆنا پەرلەمانی ژی ناڤهاتی دیار کر، ٥١ پەرلەمانتار ئەندمێن کۆمسیۆنێ نە، ژ پارتا کۆماری ژی ١٠ کەس ئەندامن و ئەز ژی ئەندامێ کۆمسیۆنێ مە، دێ ڤێ حەفتیێ کۆمبوونەکێ کەین و بێگومان دڤێت بەرنامێ کۆمسیۆنێ ژی دیار بیت، گرنگە ئاکپارتی و هەموو پارتێن دی یێن ل پەرلەمانێ تورکیا ب دلسۆزی کار بۆ چارەسەرکرنا پرسا کوردی بکەن، بێگومان هەتا نها کار ب رەنگەکێ باش بەردەوام دکەت، لێ گرنگە چو ئاستەنگی ل هەمبەر قووناغا ئاشتیێ نەهێنە دروست کرن.