مە پێدڤی ب هنارتنا پەترۆلا كوردستانێ بۆ بازاڕێن جیهانێ هەیە
ئەو ژڤانێ بۆ هنارتنا پەترۆلا هەرێما كوردستانێ هاتیە دیاركرن ب دووماهی هات، بێی كو پەترۆل بهێتە هنارتن, جێگرێ سەرۆكێ لژنەیا پەترۆل و غازی ل جڤاتا نوونەرێن ئیراقێ ژی دبێژیت: مە پێدڤی ب وێ چەندێ هەیە پەترۆلا هەرێما كوردستانێ بۆ بازارێن ئۆرۆپا بهێتە هنارتن».
حەیان عەبدولغەنی، وەزیرێ پەترۆلێ و جێگرێ سەرۆك وەزیرێن ئیراقێ، ل رۆژا شەشێ ڤێ مەهێ د كۆنفرانسەكێ رۆژنامەڤانیدا راگەهاندبوو» ئەڤرۆ یان سوباهی دێ دەست ب وەرگرتنا 80 هزار بەرمیلێن پەترۆلێ بەهەمئینای ل زەڤیێن پەترۆلی یێن هەرێما كوردستانێ كەین و ب رێكا كۆمپانییا سۆمۆ دێ هنێرینە بەندەرێ جەیهان یێ توركی».
دوهی شەمبیێ 9/8/2025، زێدەتر ژ 48 ساتان ل سەر وی ژڤانێ وەزیرێ پەترۆلا ئیراقێ دەرباز دبن كو بۆ دەستپێكرنا هنارتنا پەترۆلا هەرێما كوردستانێ دیاركربوو، بێی كو هیچ رێژەیەكا پەترۆلا هەرێما كوردستانێ ب رێكا كۆمپانییا سۆمۆ هاتبوو هنارتن بۆ بەندەرێ جەیهان یێ توركی.
كۆمپانییا سۆمۆ د بەیاننامەیەكا فەرمیدا راگەهاندیە» هەموو بەرهەڤی بۆ هنارتنا پەترۆلا هەرێما كوردستانێ ئەنجامداینە، گرێبەست ل گەل كۆمپانیێن بەرهەمئینانا پەترۆلێ تمامكریە و چاڤەڕێی وەرگرتنا رێژەیا پەترۆلێ بەرهەمئینای ل هەرێما كوردستانێ دكەت تاكو دەست ب هنارتنێ بكەت، بێی كو هیچ ژڤانەكی دیار بكەت».
سەبارەت وی بابەتی، عەلی مەشكور، ئەندامێ لژنەیا پەترۆل و غازێ ل جڤاتا نوونەرێن ئیراقێ گوت» دەمەكێ درێژە هنارتنا پەترۆلا هەرێما كوردستانێ بۆ دەرڤە هاتییە راگرتن و ئیراق وێ رێژەیا پەترۆلێ ئەوا ل زەڤیێن بەسرا پركریە. ب باوەرییا من د ڤێ قۆناغێدا دێ هەردو ئالی (هەولێر و بەسرا) ل سەر هنارتنا پەترۆلێ رێككەڤن».
ژ ئەگەرێ زۆربوونا كرێیا بەرهەمئینانێ و ڤەگوهاستنێ، وەزارەتا پەترۆلا ئیراقێ دخوازیت ئەو 80 هزار بەرمیلێن پەترۆلێ ئەوێن بڕیارە ژ هەرێما كوردستانێ وەربگریت، بۆ پێدڤییا ناڤخوەیی بهێتە بكارئینان. د بەرانبەر دا، رێژەیا هنارتنا پەترۆلا بەسرا دێ زێدەتر لێكەت، گرفتەك كو نوكە ئیراق روو ب روو بووی، ئەوژی نووكرنا گرێبەستا بۆرییا پەترۆلا جەیهانە ژ ئالیێ توركیا ڤە. ئیراق دخوازیت ب هەر بهایەكێ بیت گرێبەستێ نوو بكەت تاكو پەترۆلا هەرێما كوردستانێ و پشكەك ژ پەترۆلا كەركووگێ ب وێ رێكێ بگەهینیتە بازارێن جیهانێ».
ژ ئالیێ خوەڤە، عەدنان جابری، جێگرێ سەرۆكێ لژنەیا پەترۆل و غازێ ل جڤاتا نوونەرێن ئیراقێ گوت» مە پێدڤی ب هنارتنا پەترۆلا هەرێما كوردستانێیە بۆ بازارێن ئۆرۆپا ب رێكا بەندەرێ جەیهان یێ توركی. وەلاتێن ئۆرۆپا نەشێن پەترۆلا ئیراقێ ب رێكا وەلاتێن كەنداڤی و بەندەرێ بەسرا ژ بەر دوورییا د ناڤبەرا وەلاتاندا، وەربگرن. بەندەرێ جەیهان یێ توركی، نێزیكترین جهە بۆ وەلاتێن ئۆرۆپا، لەوما ئیراق ناخوازیت كڕیارێن ئۆرۆپی ژ دەست بدەت».
هەكە هنارتنا پەترۆلا هەرێما كوردستانێ ژی دەست پێ بكەت، ل تەمووزا سالا داهاتی گرێبەستا د ناڤبەرا ئیراقێ و توركیا دێ ب دووماهی هێت و بۆ بەردەوامیدانێ ب هنارتنا پەترۆلێ، پێدڤییە هەردو ئالی گرێبەستەكا نوو ئیمزا بكەن.
