بۆچی بەغدا نەڤێت هنارتنا پەترۆلا هەرێمێ دەست پێ بكەت و كێشە چارەسەر ببن؟
ب دیتنا چاڤدێرێ سیاسی و ئابۆری هنارتنا پەترۆلا هەرێما كوردستانێ دێ بیتە ئەگەرێ زێدەبوونا داهاتێ ئیراقێ و ژ داهاتێ وێ پەترۆلا هەرێمێ ئەوا دێ هێتە فرۆتن، دێ مەهانە بۆ مووچەیێ فەرمانبەرێن هەرێما كوردستانێ هێتە بكارئینان ودووماهی ب وێ كێشەیێ دێ هێت، بەلێ بەغدا دڤێت كێشە بەردەوام بیت و هنارتنا پەترۆلا هەرێما كوردستانێ ب بڕیارا تاكلایەنە و ئەو بڕیارە بیت كو ئەو ب خوە بدەت، ب ڤێ چەندێ ژی بەردەوامیێ ب كێشەیێ ددەت.
هنارتنا پەترۆلا هەرێما كوردستانێ، كو بەهانەیەكا بەغدایە بۆ نە هنارتنا مووچەی، ب بڕیارا چارلایەنیڤە گرێدایە كو پەیوەندیدارن ب پەترۆلا هەرێما كوردستانێ، ئەوژی حوكمەتا هەرێما كوردستانێیە و كۆمپانیێن بەرهەمئێنەرێن پەترۆلێ نە و توركیا و ئیراقە، لەوما ب چارەسەركرنا وێ كێشەیێ دێ دووماهی ب بەهانەیا بەغدایێ هێت، كو دەمێ زێدەتر ژ دو سالایە ب هەرێمێ دگریت و ژ ئەگەرێ وێ چەندێ مووچەیێ فەرمانبەرێن هەرێما كوردستانێ هەموو مەهان گیرۆ دبیت و نزكە نێزیكی سێ مەهایە مووچە نەهاتیە دان.
نەجوا كاكەیی، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان گوت» هنارتنا پەترۆلا هەرێما كوردستانێ د بەرژەوەندییا هەرێمێ و پاشی یا ئیراقێدایە و ئێدی ئەو كێشەیا هەموو مەهەكێ روو ددەت نامینیت و بارگرانی ل سەر بەغدایێ ژی نامینیت و داهاتێ پەترۆلێ دێ بیتە مووچەیێ فەرمانبەران، بەلێ ئەڤە ب رێككەفتنا د ناڤبەرا هەردو ئالییاندایە نەك ئەوا بەغدا بڤیت ئەو ب خوە تاكلایەنە بڕیارێ بدەت و هەموو تشتەكی ب فەرمانا خوە ب سەپینیت».
نەجوا كاكەیی رۆهنكر ژی» هەرێما كوردستانێ بەرهەڤی نیشادایە و ل دەمێ بۆری ژی كێشە بۆ زەڤیێن پەترۆلی ل هەرێما كوردستانێ دروست بوون، بەلێ هەرێمێ نەرمییەكا مەزن بەرچاڤكر و ژ پێخەمەت چارەسەرییا كێشەیا مووچەی بەرهەڤی نیشادایە بۆ هنارتنا پەترۆلێ ژ وی بەرهەمێ رۆژانە هەی، بەرهەمێ پەترۆلا هەرێما كوردستانێ یێ زەلالە و بەغدا ژی نەشێت بەهانەیان بگریت، لەوما ئەوا گرنگ هنارتنا پەترۆلێ دەست پێ بكەت و بەغدا ژی ب تمامی بەرهەڤ بیت بۆ وێ چەندێ كێشە بهێنە چارەسەركرن».
ژ ئالیێ خوەڤە سروە محەمەد، ئەنداما جڤاتا نوونەرێن ئیراقێ ژ فراكسیۆنا ئێكەتی نیشتمانی كوردستان گوت» چارەسەرییا كێشەیێن د ناڤبەرا هەرێما كوردستانێ وبەغدایێ دا و چارەسەرییا كێشەیا مووچەیێ فەرمانبەرێن هەرێمێ دێ ب هنارتنا پەترۆلا هەرێما كوردستانێ و ئەو داهاتێ ل سەر رێككەفتین بیت، پێدڤییە هەردو ئالی دووماهیێ ب وێ كێشەیێ بینن و ئێدی مووچەیێ فەرمانبەرێن هەرێما كوردستانێ نەهێتە گیرۆكرن، پێدڤییە هەرێما كوردستانێ بەهانەیێن بەغدایێ ببڕیت ژ وی رووییڤە».
ناسر ئیسماعیل، شارەزایێ ئابۆری ژی دبێژیت» هنارتنا پەترۆلا هەرێمێ كاكلكا كێشەیا هەرێمێ و بەغدایە، بەغدا دزانیت ل گەل دەستپێكرنا هنارتنا پەترۆلا هەرێما كوردستانێ، دێ كێشەیا مووچەی ب دووماهی هێت و ئێدی نەشێت بەهانەیان بگریت، بەلێ دخوازیت درێژیێ ب وێ سزادان و سیاسەتا خوە بەرانبەر هەرێمێ بدەت كو د بەرژەوەندییا وێ دایە و موزایەدێ ل سەر دكەت، هنارتنا پەترۆلا هەرێمێ د بەرژەوەندییا هەرێمێ دایە، بەلێ ب رێككەفتن كو هەر ئالییەك رازیبوونا ل سەر بدەت».
دهێتە زانین د دەمێ دو سال و پێنج مەهێن بۆریدا، بەغدا هەر جارێ ب بەهانەیەكێ مووچەیێ فەرمانبەرێن هەرێما كوردستانێ گیرۆكریە، ئەوا بەغدا ژی دكەت بۆ فشارئێخستنێیە ل سەر هەرێما كوردستانێ، چونكە بڕیارا دادگەها بلند یا فیدرالی ل ئیراقێ هەیە بۆ وێ چەندێ مووچە نەهێتە گیرۆكرن، بەلێ ئەو سیاسەتا بەغدا ب وی جۆرییە كو فشارێ ل هەرێمێ بكەت، بۆ وێ چەندێ ژی مووچەیێ فەرمانبەرێن هەرێمێ وەكو ئامرازەكێ بكاردئینیت، لەوما ئەڤ جۆرە سیاسەتا بەغدایێ زێدەتر تۆلڤەكرنە نەك رێككەفتن، چونكە بەغدا تشتەكی نزانیت ب ناڤێ رێككەفتن و بجهئینانا وێ، بەلكو هەموو كارێن وێ بۆ وێ چەندێ نە دژی كورد و كوردستانێ كار بكەت و پێگەهێ هەرێمێ لاواز بكەت.
