فینالا ئیراقێ دێ ل هەولێرێ بیت و سەنحاریب نوونەرا پارێزگەهێ یە
قەیس وەیس:
ب فەرمی بڕیار هاتە دان یاریێن دووماهییا قارەمانییا ڤۆلی بۆلێ ل سەر ئاستێ یانەیێن ئیراقێ بۆ كچان ل هەولێرا پایتەخت ل دووماهییا ڤێ مەهێ ب پشكدارییا شەش یانەیێن دەربازبووی بهێتە كرن.
د داخویانیەكێ دا حەبیب عەلی ئەللاوەندی سەرۆكێ فدراسیۆنا ڤۆلی بۆلا ئیراقێ دیار كر ب فەرمی هۆلا یانەیا ئەكاد ل هەولێرێ ل هەرێما كوردستانێ دێ مێڤاندارییا قووناغا دووماهیێ یا قارەمانییا ئیراقێ ل سەر ئاستێ یانەیان بۆ كچان كەت ئەوا شەش یانە ژ قووناغا ئێكێ دەربازبووینە ڤێ قووناغێ ئەو ژی، سەنحاریب، ئەكاد عەنكاوە، ئەمانەت بەغدا، ئەفرۆدێت، دەربەندیخان و قەرەقووش، پشتی د سیستەمێ گرۆپان د قووناغا ئێكێ ژ كۆمێن خوە دەربازبووین كو 10 یانە بوون هەر كۆمەكێ سێ دەربازبووینە.
هەروەسان ناڤهاتی گۆت: بڕیارە قارەمانی ل 25ێ هەتا 29ێ ڤێ مەهێ یا بەردەوامبیت، كو هەر رۆژەكێ سێ یاری دێ هێنە كرن، رۆژا ئێكێ سەنحاریب- قەرەقووش، دەربەندیخان- ئەفرۆدێت و ئەكاد- ئەمانەت بەغدا، یاریێن وان ب شێوەیی خول ئێك قوونە یا پتر سەركەڤتنان بینت دێ بیتە قارەمان.
