لوبنان: نابینە پشکەک ژ شەڕێ نها ل دەڤەرێ
سەرۆک وەزیرێن لوبنانێ دیار کر، دڤێت حزبوللا چو ئاریشەیان بۆ پاشەرۆژا لوبنانێ دروست نەکەت و چەکێن خوە رادەستی دەولەتێ بکەت، دڤێت چەک تنێ د دەستێ دەولەتێ دا بن و پێدڤیا لوبنانێ ب چو گرۆپێن چەکدار ژی نینە و نابیت حزبوللا و هندەک ئالیێن دی گەفا شەڕەکێ ناڤخوەیی بکەن، ئەو یەک ب چو رەنگەکێ ناهێتە قەبوول کرن، چونکی نها رەوشەکا گەلەک ئالۆز ل رۆژهەلاتا ناڤین هەیە و مە نەڤێت لوبنان ببیتە پشکەک ژ شەڕێ نها ل دەڤەرێ.
نەواف سەلام ئەو یەک ژی دیار کر، وەلاتیێن لوبنانێ دخوازن د ناڤ ئارامیێ دا بژین، ئێدی دڤێت حزبوللا ژی ڤێ راستیێ قەبوول بکەت، ئەم رێ نادەین کەس گەفان ل لوبنانێ بدەت و کەسێ ژی نەڤێت شەرێ ناڤخوەیی ل لوبنانێ روو بدەت، وەکو لوبنان مە نەڤێت ببینە پشکەک ژ ئالۆزیێن نها ل دەڤەرێ و مە دڤێت رەوشا لوبنانێ باش بکەین و رێ نادەین کەس یاریان ب چارەنڤیسێ خەلکێ لوبنانێ بکەت.
