لەشكرێ ئیراقێ هەر خولەكەكێ 20 تۆپ ل گوندێ مە ددان ئەم نەچاربووین مە گوند چۆل كر
سالار محەمەد دۆسكی:
1- 3
پێشمەرگێ شۆڕەشا گولانێ( سالح حەسەن ئەرەدنی) ل دەسپێكا شۆڕەشا گولانا پێشكەفتنخواز پەیوەندی ب شۆڕەشێ كریە، و بوویە پێشمەرگە ل گەل بابێ خوە و (حەسەن ئەرەدنی) بابێ وی بەرپرسەكێ پێشمەرگەی بوو ل شۆڕەشا ئیلۆنێ و بەرپرسێ دیاركرنا (مینا و هەندەسێ) بوویە ل دەڤەرێ، و رۆلەكێ مەزن هەبوو ل شۆڕەشا گولانێ ژی.
پێشمەرگەیێ شۆڕەشا گولانێ( سالح حەسەن ئەرەدنی) دژیانا خوە یا شۆڕەشێ دا هەڤژین و سێ زارۆك و خویشكا خوە كرینە قوربانی ڤێ رێكێ و بابێ شەهیدەكی یە و دیسا ل شەرێ برا كوژیێ هەر دو چاڤێن خوە ژ دەست داینە و نوكە نابینە، د دیدارەكێ دا ل گەل رۆژناما ئەڤرۆ بەحسێ چەندین لاپەرێن ژین و ژیارا خوە كرن و گۆت: دەمێ من چەكێ شەرەفێ هەلگرتی گەلەكێ بچویك بووم و ژیێ من بتنێ 17 سال بوون و برایەك من هەبوو ژ من بچوویكتر بوو پولا پێنجێ بوو و دەمێ 1975 نسكۆ دروست بووی، ئەم سالەكێ رونشتینە خوار و ئەم ل گوندی بووین و گوندێ مە نێزیكی سنوری بوو و هاتن و چوون هەبوو، و بابێ هەلبوونا ئاگرێ شۆڕەشا گولانێ مە ژ ئەوا زانی گۆت پێشمەرگە دەركەفتی یە و دەست ب شۆڕەشێ هاتیەكرن، و ئەڤە بۆ دەلیڤەك ئێكسەر مە پەیوەندی ب شۆڕەشێ كر وی دەمی كادرێن چالاكێن پارتی ل دەڤەرێ(مستەفا مزیری، فوئاد میرانی، عەبدوللا سالح، ئەبو عنتەر) بوون، (مستەفا مزیری) كادرێ ئێكێ یێ پارتی بوو ل دەڤەرێ و مرۆڤەكێ گەلەكێ زیرەك و چالاك بوو و پشتی مە پەیوەندی ب شۆڕەشێ كرین و كاودانێن مە ل گەل حوكمەتا ئیراقێ تێكچوون و ئەم گەهشتینە وێ باوەریێ ئەم ئێدی نەشێین ژیانێ ل گوندی دەرباز بكەین، و نەچاربووین ئەم مالێن خوە ژ ئەرەدنی بەرەف كوردستانا باكور چووین و ئەم سێ رۆژا گەهشتینە كوردستانا باكور و ئەم دو شەڤا ئاسێ بووین، و چووینە مالا (حەجی سالحێ) كانی مەزنی و زارۆكێن مە حەواندن و فرۆكە ب دیف مە كەفتن و شكائێت ل مە هاتەكرن و خالێت من ل (ئەدنا) بەرواری بوون و مە هەوارا خوە گەهاندێ كو تەورا مە بهێن و مە دەرباز بكەن، وی دەمی ئورەیا ژی هندەك قاچاخ هەبوون دهەوارا مە هاتن و ئەم هاتینە دەربازكرن بۆ ناڤ (ئاشیتێ) چوینە ناڤ شۆڕەشێ وی دەمی مە بارەگایەكێ پێشمەرگەی ل (پرا بلبل) ڤەكر، و سالا 1977ێ و مە مالێن خوە برنە گوندەكی ل نێزیك (چەلێ) ل دەڤەرا هەكاری وی دەمی خێزاندار بووم، من ل سالا 1975 من ژیانا هەڤژینێ پێك ئینا بو وی دەمی گەنج بووم و هێشتا من ریهێن خوە نەتراشی بوون، دوڤدا (زەعیم عەلی) هات و (جەوهەر نامق) وی دەمی دگۆتنێ (سەلیم سۆرانی) و (كریم شنگالی) ئەم بوینە، وی دەمی پێشمەرگە گەلەك كێم وبوون، و ئەم هەمی نەدبوینە (12) كەس و ئەڤە مەفرازا مە بوو.
پێشمەرگەیێ شۆڕەشا گولانا پێشكەفتنخواز گۆتژی: جارەكێ گۆتە مە ئەگەر هون چالاكیەكێ بكەن دێ گەلەك باشە داكو حوكمەت ژی بزانیت پێشمەرگە هەیە، و هەم دا خەلك ژی بزانیت پێشمەرگە دەركەفتیە وی دەمی ئەم (5) كەس بووین، و بتنێ ئەم سێ پێشمەرگە ب چەك بووینە و چەكێ مە ژی كلاشینكوف بوون، و ئەم دەمژمێر دەهی شەڤێ هاتینە گوندێ (ئاسها) بەروارییا و كەرەكێ پەزی مە دیت و مە داخازا خوارنێ ژێ كر، وی شڤانی گیسكەك بوومە ڤەكوشت و خوارنەكا باش دامە و ناڤێ وی شڤانی (عەباس ) بوو، و مە پرسیارا ژین و ژیار خەلكی و كاودانان كر و ئەوی گۆت مە چ خوەشی ژ بەر لەشكرێ ئیراقێ نینە، بەردەوامێ دهێنە گوندی و پرسیار دكەن و دیفچوونێ دكەن و گەلەك جارا تەعدایێ ل مە دكەن، و مە گۆتێ ئەو لەشكرە دكیڤە ڕا دهێن گوتی ل (ڕاڤینا) ڕا دهێن و دهێنە گوندی دا و مە چ حالێ خوە ژ بەر نینە و پشتی مە خوارنا خوە خواری و شەڤبێریا خوە كری ئەم هاتینە لایێ گوندی بۆ دەمژمێر دوی شەڤێ و هەمان دەم چەندین رەبیێن دوژمنی ل هنداڤ گوندی نە ئەم چووینە سەر رێكێ و مە بخوە جهەك دروستكر، وئەم ماین هەتا بوویە دەمژمێر حەفتی سپێدێ دونیا بهارە و هەیڤا گولانێ یە و گیا هار بوویە و مە هەر پێنچ هەڤالان خوە كرنە دو پشك هەڤالەكێ مە یێ دانعەمر بوو، مە ئێك دا ل گەل چوونە هنداڤ (خانكێ) ئەم سێ ماینە ل سەرێ رێ وەك پێشتر مە ئاماژە پێكری ژ نشكەكێ ڤە مە سێ جندی دیتن هاتن و دو ەوار ل گەل دا بووینە، و دوڤدا جندیەك ما و دو هاتن بەرەف گوندی و هەتا نێزیك بوون مە هاڤێتێ و مە كوشتن و ئێكسەر ئەم چووینە سەر كەلەخێن وان و مە چەكێ وان هەلگرت، و مە زانی مە چەك هەلگرت بەلێ یا مە دیتی گولە ژ رەبیان وەك بارانێ هاتنە سەر سەرێ مە و ئەم ئێكسەر بەرەف (خانكێ) ڤە چووین، و چووینە چیایێ(مەتینا) پاشی ئەم زڤرینە ڤە، و دوڤدا (زەعیم عەلی) ئەو هاتن و مەفرەزێن پێشمەرگەی هاتنە دروستكرن، و سالا 1977 (زەعیم عەلی) ژ سوریێ هاتو پشتی مەفرەزە هاتینە دروستكرن ئەم ماینە ل گەل مەفرەزا و هاتن و چوون ل دەڤەرێ هاتەكرن، هەتا سالا 1979 و دوڤدا كونگرێ نەهێ یێ پارتی دیموكراتی كوردستان هاتە ئەنجامدا.
هەمان پێشمەرگەیێ شۆڕەشا گولانا پێشكەفتنخواز ئەو ژی گۆت: دەمێ ملا مستەفا بارزانی وەغەرا دوماهیێ كری ئەم ل دەڤەرا هەكاریێ بووین و ب رێكا ئێزگێ دەنگێ كوردستانێ ئەڤ نووچێ نەخوش مە زانی و ئەم گەلەك عاجز بووین، و شین و تازی كەفتە ناڤ مە وەكی بچیكا پێشمەرگەی كرە گری و مە گۆت مالا مە كوردان خراب بوو، و دەمێ كونگرێ نەهێ هاتیە بەستن سەركردایەتی یا بەروەخت ب مەرەما كونگرەی بەرەف ئیرانێ چوون، و ئەژی ل گەل (كەریم شنگاری) بەرەف ئیرانێ چووم و پشكداری كونگرەی بووم، ل ئیرانێ پێشمەرگەیێ شۆڕەشا ئیلۆنێ هاتنە ل گەل مە وەك (شەعبان غەفار، د. جەرگیس، سەید سالح، هەجەر سندی) ئەڤە هاتنە جهێ سەركردایەتیا بەروەخت، و ئەم بەرەف سالا 1980 و 1981 و ئەم كرینە مەفرەزە و جار بۆ جار چووینە دەستیردانێ و هەمان دەم بابێ من ژی ئێك ژ سەركردێن گولانێ بوو ل دەڤەرێ و دەمێ دهاتمە دەستیردانێ و ئەرك ل سەر ملێ من بوون، ئێك دڤیابا من مال ژی ب خودان كربا ب رێكێن نەقانوونی و ئینانا توڤچایی و مە بربا هەكاریێ فرۆتبا هەتا ئەم دشیاین بخوە نانەكی پەیدا بكەین، و ئەف كارە مە دكر بۆ ب دەست ڤە ئینانا پاریێ ژیانێ بۆ زارۆكێن خوە، و ژیان گەلەك یا بزحمەت بوو و هەتا بوویە سالا 1981 ئەفجا رێكخراوێن لەشكری هاتنە دروستكرن، و سێ رێكخراو هاتنە دروستكرن، و بابێ من بۆ وەكیلێ رێكخراوەكێ بوو، ل سالا 1981 ێ بەرپرسێ رێكخروەكێ شەهید بوو و بابێ من حەسەن ئەرەدنی جهێ وی هاتەدانان و هەمان سال ئەم چووینە سەرێ حەمێ ب سەركردایەتی یا (سەید سالحی) بوو، دو هەڤالێن مە شەهید بوون و ئەڤان هاتن و چوونێن لەشكری دا هەمی گاڤا ل گەل بابێ خوە بووم ل گولا شەهیدان ل سەر و ئەم ژ جهێ چالاكیێ دور كەفت بووین، ئەگەر دا فرۆكە هێن و ئەم ب كلاشینكوفا دا چل فرۆكا كەین، و هوسا ئەم بەردەوام بووین هەتا سالا 1981 مە هێرشەكا دی برە سەر رەبیا (مایێ) و هەڤالێ مە (شەعبان هدێنەی) شەهید بوو، و ئەو شەهید مە برە گوندێ( ئورە) ڤەشارت، ئەم بەردەوام بووین هەتا سالا 1982 شەرێ ئیراق و ئیرانێ دروست بووی.
