بەغدا ب هێزبوونا هەرێما كوردستانێ ب لاوازبوونا خوە دزانیت
ئەندامەكێ مەكتەبا سیاسی یا پارتی دیموكراتی كوردستان راگەهاند: كورد ل ئیراقێ فاكتەرێ ئارامیێیە و هەكە دانپێدان ب مافێن وان یێن رەوا نەهێتە كرن، ئارامی ل ئیراقێ پەیدا نابیت.
عەلی حسێن، ئەندامەكێ مەكتەبا سیاسی و بەرپرسێ مەكتەبا رێكخستنا پارتی دیموكراتی كوردستان ل سلێمانیێ و هەلەبجە گوت» پشتی سالا 2014 رۆژانە دەستهەلاتدارێن حوكمەتا فیدرالی ب پیلان و داڕێشتنا بەرنامە، بزاڤا لاوازكرنا پێگەهێ هەرێما كوردستانێ دكەن».
ئاماژەكر» پشتی پرۆسەیا ئازادییا ئیراقێ، سەرۆك بارزانی رۆلەكێ كاریگەر هەبوو د نڤیسینا دەستووریدا و دامەزراندنا حوكمەتێ، بەلێ مخابن ئەوێن نوكە حوكمڕانیێ ل ئیراقێ دكەن ئەزموون ژ بۆری وەرنەگرتیە، نزانن ئەوێن ل بۆری دژایەتییا كوردان دكر ئەو بخوە ژ ناڤچوون و كورد ب هێز مان، و دڤێت وێ چەندێ ژی بزانن كورد ل ئیراقێ هێمایێ بەرقرەراكرنا ئارامیێ و ئاشتیێ نە».
گوت ژی» ئەو ب هێزبوونا مە ب لاوازبوونا خوە دزانن و بەردەوام كوردستانێ و ب تایبەتی پارتی دكەنە ئارمانج، بەلێ بێگومان هەر دەمەكێ كوردستان، پارتی و سەرۆك بارزانی كریە ئارمانج، نیشانا وێ چەندێ بوو كو پێگەهێ هەرێما كوردستانێ پێشڤەچوون بخوەڤە دیتییە».
عەلی حسێن ئەوژی خویاكر» بێگومان گوهۆڕینێن مەزن ب رێڤەنە، ئاسۆیێ گوهۆڕینا دەڤەرێ و پێشڤەچوونا هەرێما كوردستانێ یێ رۆهنە، ئەم ژی پێخەمەت پاراستنا بەرژەوەندییا گەلێ خوە، هەر چ د شیانێن مەدا بیت دێ كەین».
وی ئەندامێ مەكتەبا سیاسی یا پارتی دوپاتی ل سەر وێ چەندێ كر كو» پێدڤییە ئالیێن سیاسی یێن كوردستانی بەرامبەر بەغدایێ ئێكڕێز بن و بزاڤێ بكەین ئەم هەموو پێكڤە داكۆكیكارێن مافێن گەلێ كورد بین».
د پشكەكا دی یا ئاخڤتنێن خوە دا، عەلی حسێن باسێ پێكئینانا كابینەیا دەهێ یا حوكمەتا هەرێما كوردستانێ كر و گوت» كارێن شاندێن دانوستانكارێن پارتی و ئێكەتیێ بۆ پێكئینانا كابینەیا نوو یا حوكمەتا هەرێما كوردستانێ ب باشی چووینە پێش و ئەنجامێ دووماهی كۆمبوون ژی ئەوبوو كو بزاڤێ بكەین ل مەها ئیلۆنێ سەرۆكایەتییا پەرلەمانێ كوردستانێ بهێتە هەلبژارتن، هەكە ئەو بهێتە كرن پێنگاڤەكا باشە».
ل رۆژا 20/10/2024 هەلبژارتنێن خولا شەشێ یا پەرلەمانێ كوردستانێ هاتنە ئەنجامدان، بەلێ هەتا نوكە كابینەیا دەهێ یا حوكمەتا هەرێمێ نەهاتیە پێكئینان، عەلی حسێن ئەوژی بەرچاڤكر» هەلبژارتنا سەرۆكایەتییا پەرلەمانێ كوردستانێ دێ رێكخوەشكەر بیت بۆ هەلبژارتنا سەرۆكێ هەرێما كوردستانێ و پێكئینانا كابینەیا نوو یا حوكمەتا هەرێمێ».
