پەیدابوون
شەمال ئاکرەیی
من خۆ دیت ئەز یێ ل سەر لێڤا نەبوونێ راوەستییایم، نە دەم هەیە و نە جهـ، هیچ هزرەك ژی سەبارەت ب رۆناهیێ و تاریێ نەبوو. ژ نشكاڤە، ئەو نەبوونی هژییا! چریسكەكا گەلەک تیژ، كو نە د شییانا من دا بوو لێ بنێڕم، برسقی و پاشڕا ب رەنگەکێ ئێکجار ب هێز پەقی، هەر وەكی بۆشاییێ بریار دا بیت، ژ وێ نەبوونێ هەبوونەك هەبیت. گورزەك ژ رۆناهیێ و گەرمێ ژ هەمی رەخانڤە ژێ پەشی و برسقی و ب دەنگەكێ بلند و گۆت: «ها ئەڤە ئەزم»!
ل دەستپێکێ، هەر تشت د خالەكا تەمەت قەبارەیێ سەرێ دەرزیكەكێ دا، یێ پەستی و گڤاشتی بوو، بەلێ تەڤ گالاكسی و ستێر و هەسارە.. تد، ئەز و تو ژی د هناڤێن خۆ دا هلگرتبووین.
من گەردۆن دیت، بۆ جارا ئێكێ هەناسەیێ هلدكێشیت، بێ راوەستییان بەرفرەهـ دبیت، چەنگێن خۆ ل سەر ڤالاتییەكێ، كو بەری گاڤەكێ ژی هەبوونا وێ نەبوو ڤەدكەت.
د وی دیمەنی دا، من زانی، كو ئەو نە پەقینا مەزن بوو، بەلكو پەیدابوونەكا هەتاهەتایی بوو.
*: تیۆرا (پەقینا مەزن The Big Bang)، سروشێ نڤیسینا ئەڤێ کنەچیڕۆکێ
