خـەلکێ باژێـران هـەژارترە ژ یێ گـوندان
هه‌رهین محه‌مه‌د:
مامۆستایه‌كێ زانكۆیێ د دیدارەکێ دا بۆ ڕوژنامەیا ئەڤرۆ دیار کر کو ئەو کەسێن ل گۆندان دژین ژلایێ ساخلەمیا لەشی و دەروونیڤە ژ کەسێن باژێران ساخلەمترن و گوت؛ ژیانا گۆندان یا جیاوازە ژ ژیانا باژێران.
نزار نوری نێروه‌یی، مامۆستایێ زانكۆیا دهۆك، لدور جیاوازیا ده‌روونێ مرۆڤێن گوندان ژ مرۆڤێن باژێران ب ڤەگێڕانا نمۆنەیەکێ دیار کر کو بابه‌كێ زه‌نگین ل باژێری دژیا گۆتە كورێ خو كورێ من ئه‌م دێ بو ماوێ حه‌فتییه‌كێ چینه گوندی ل ده‌ف كه‌سوكارێن مه یێن هەژار، مه‌ره‌م و مه‌به‌ستا بابێ وی ئه‌وه بزانیت زه‌نگینی ل باژێری چ نیعمه‌ته‌كا مه‌زنه، كورێ وی گوتێ باشه باب، چوونه گوندی بۆ ماوێ حه‌فتیه‌كێ و پاشی ڤه‌گه‌ریانە باژێریڤە، بابی گوته كورێ خۆ ته چ دیت كورێ من، كورێ وی گوتێ، یا من دیتی ل گوندی په‌یوه‌ندیێن جڤاكی گه‌له‌ك بهێز بوون، هه‌موو كه‌سێن گوندی پێكڤه كووم دبوون و د كه‌یفخوش بوون و دانوستاندن دكرن مروڤ بونه‌وه‌ره‌كێ جڤاكییه و پێدڤی ب ئێك هه‌یه.
کورێ گەنج هێشتا گۆت؛ خه‌لك ل گوندی ب رێكا ڤان په‌یوه‌ندییان فێری گه‌له‌ك كه‌لتور و داب و نه‌ریتان و ره‌وشتێن جوان و رێز و ڤیانێ دبیت، هەکە به‌رێ خو بده‌ینه كه‌سێن ل گوندان دژین ره‌فتارێن باش و خه‌له‌ت هه‌ر زوی هه‌ست پێدكه‌ن.
کۆڕی هێشتا گۆته بابێ خۆ، هه‌موو پێكڤه یێ كار دكه‌ن و خزمه‌تا ئێكدو دكه‌ن، به‌لێ باب ل باژێری ئه‌ڤ جوره په‌یوه‌ندیه نینن ئه‌ڤه بو ماوێ (20) سالایا ئه‌م ل باژێری هێشتا ئەم جیرانێ خو نانیاسین و دلوڤانی مه دگه‌ل ئێك نینه، باب ته بو مه خزمه‌تكاره‌كا فلپینی یا ئینای دا خزمه‌تا مه بكه‌ت و زاروكێن مه ژی ئه‌و یا خودان و په‌روه‌رده‌دكه‌ت لدووڤ كه‌لتورێ وه‌لاتێ خو.
گەنجی د بەردەوامیا ئاخفتنێن خۆدا گۆت؛ مه برکەکا ئاڤێ یا هه‌ی قه‌باری وێ (6 ب 12)یه به‌لێ ل گوندی ئه‌وان روباره‌كێ پاقژ یێ هه‌ی و ژێدەرێ وێ ئاڤێ كانیكن و مروڤ دووماهیا وی روباری نابینیت و ئه‌و ژ وێ ئاڤا پاقژ ڤه‌دخون و ئه‌م ل باژێری ئاڤا پلاستیكا یا ب سالا ل به‌ر گه‌رمێ دمینیت ڤه‌دخوین.
باب یێ گوهداریێ دكه‌ت و كور یێ به‌رده‌وامه د ئاخفتنا خۆدا، کوڕی گۆت؛ ئه‌و كاردكه‌ن بۆ په‌یداكرنا به‌رهه‌مه‌كێ حه‌لال و خومالی كو پێدڤییه ئه‌م هه‌موو ڤان جوره به‌رهه‌مێن خومالی بخوین بۆ ساخله‌میا مه دگرنگن، به‌لێ ل باژێری ئه‌م مادده‌یێن خوارنێ ل ماركێتێ دكڕین و زوربه‌یا وان ئێكسپایه‌رن و ئه‌ون ئه‌وێن ده‌وله‌تێن دوژمن بو مه دروست دكه‌ن، ل باژێری مه باخچه‌یه‌ك هه‌یه و یێ سنوردار كرییه و روینشتن دناڤ جهه‌كێ سنورداركری دێ بیته ئه‌گه‌رێ هندێ تووشی گه‌له‌ك جورێن نه‌خوشیێن ده‌روونی و له‌شی ببین، به‌لێ ل گوندی ئه‌وان ده‌شت و چیا هەنە و سنور ناهێنه دیاركرن هه‌موو وه‌ك برا تێدا ب ئازادی دژین، ئەڤە دبیته ئه‌گه‌رێ هندێ كو مرۆڤ یێ دویر بیت ژ نه‌خوشیێن له‌شی وه‌كو، نه‌خوشیا شه‌كرێ و جه‌لتا دلی و مێشكی و په‌ستانا خوینی و ئێشێن گران و خه‌موكیێ و دودلیێ و ترسێ وگه‌له‌كێن دی، دناڤ باخچێ مالا مه‌دا چه‌ند داره‌كێن كێم هه‌نه و هنده‌ك گول به‌لێ ل گوندی ب ملیونان دار یێن هه‌ین زوربه‌یا وان داران دارچنار و داربه‌روی و دار گویز و دار كه‌زان و جوره‌ها گولو گیا هه‌نه، هه‌م به‌رهه‌مه‌كێ دده‌ن هەم ژی ئوكسجینی به‌رهه‌م دئینن و دوانه‌ئوكسجینی وه‌ردگرن، ژبه‌رهندێ ل گوندی بێهنا مروڤی خوشتره ژبه‌ر زوریا ئوكسجینێ و مروڤ ساخله‌متره، هه‌روه‌رسا دیمه‌نه‌كێ جوان هه‌یه هه‌رجاره‌كا تو ئه‌ڤان دیمه‌نان ببینی (1500) خروكێن سپی زێده دبن دناڤ خوینێ دا، و كارێن ڤان خروكێن سپی ئه‌وه به‌رگریێ بو له‌شێ مروڤی په‌یدا دكه‌ن بو وێ چه‌ندێ مروڤی ب پارێزن ژ نه‌خوشیان به‌لێ ل باژێری ژبه‌ر زوریا ترومبێلا و كارگه‌ها و … یا کێمە.
ئەڤی گەنجی زێدەتر گۆت؛ ئوكسجین گه‌له‌ك یا كێمه ژبه‌ر ڤێ چه‌ندێ خه‌لكه‌ك ل باژێری پتر تووشی نه‌خوشیان دبیت ژلایێ ده‌روونی و له‌شیڤه، ل باژێری مه سه‌یه‌ك هه‌یه ئه‌و ژی یێ دناڤ مالێ دا و دبیته ئه‌گه‌رێ گه‌له‌ك نه‌خوشیان، به‌لێ ل گوندی ب هزاره‌ها جورێن گیانه‌وه‌رێن ب بها و به‌رهه‌مدار هه‌نه بو نموونه، په‌ز به‌رهه‌مه‌كێ خومالی لێ دهێته به‌رهه‌م ئینان و ژ هریا وی په‌زی دوشه‌ك و لحێڤ دهێنه دروستكرن و فایدێ هریێ گەلەکە ژلایێ ته‌ندروستی ڤه وه‌ك نه‌هێلانا ئیلتیهاباتا و خه‌وەکا خۆش و ئارام، هەتا د چه‌ند ڤه‌كولینه‌كا دا دیار بویه كو كاركرن دگه‌ل گیانه‌وه‌ران مروڤی ژ نه‌خوشیێن ده‌روونی دویر دئێخیت و مه‌ژی ل باژێری قه‌سره‌كا ژ كونكرێتی (صبا) یا هه‌ی و ل هاڤینێ گه‌رم و ل زفستانێ سار و دبیته ئەگەرێ گه‌له‌ك نه‌خوشیان، به‌لێ ل گوندا ئه‌وان خانیێن ئاخێ هه‌نه ژلایێ گه‌رمێ و سه‌رمایێ گه‌له‌ك دباشن و مروڤ هه‌ست ب زیانێ ناكه‌ت دناڤ ڤان جوره خانییاندا و ژلایه‌نێن ته‌ندروستی ڤه زور دباشن و مه ل باژێری دیوارێن بلند هه‌نه و كامیره بو وێ چه‌ندێ ئه‌م و تشتێن مه دپاراستی بن، به‌لێ ل گوندان تشتێن وان یێن ل سه‌رێ رێكا و كه‌س نابه‌ت، ژبه‌ركو په‌یوه‌ندیێن وان بهێزن و كارێ وان پاراستنا ئێكه.
ئەڤی گەنجی گۆتژی؛ زاروكێن مه ل باژێری به‌س یێن د ژورڤه لسه‌ر موبایلا و ب یاریێن ئه‌لیكترونیڤه دگرێداینه ئه‌ڤه‌ژی ژلایێ ده‌روونی و له‌شیڤه زور یا خرابه، به‌لێ زاروكێن وان ئه‌وێن ل گوندان دژین جوره‌ها یارییان دكه‌ن و ئه‌و وزه‌یەکا زور وەردگرن، لەوما بشه‌ڤ زوی دنڤن و سپیدێ زی ژ خه‌و رادبن ئانکو زاروكێن وان ساخله‌مترن ژ زاروكێن باژێران .
ل دووماهیێ بابی گۆته كورێ خۆ.. كورێ منێ هێژا من ژنوی زانی كی یێ هەژارە!.
