پێدڤیە مەدیاكار پەیاما خوە ب دروستی بگەهینیت
دلۆڤان هالۆ:
هونەر عەبۆش، بێژەر و پێشكێشكار ل رادیۆیا زاخۆ، د دیدارەكێ دا بۆ رۆژنامەیا ئەڤرۆ گۆت: ل سالا 2020 من پشكا راگەهاندنێ ل كولیژا تەكنیكی كارگێڕی ل زانكۆیا پۆلیتەكنیكی یا دهۆك ب دووماهی ئینایە، ل دەمێ بۆری هژمارەكا كەنالێن راگەهاندنێ داخواز ژ من كرن بچم ل گەل وان كاربكەم، لێ ئەز نەچووم، هەتا لڤێ دووماهیێ ب پشتەڤانیا (د.عادل خێركی) بەرپرسێ ناڤەندا زاخۆ یا رەوشەنبیری ئەز هاتمە رادیۆیێ و من بڕیاردا ئێدی ژ سفرێ دەستپێبكەم.
هەروەسا گۆت: دا كو وەكو رۆژنامەكێ ئەكادیمی و پرۆفیشنال جهێ خوە دناڤ راگەهاندنا كوردی دا بكەم، ئەز چوومە پشكا راگەهاندنێ، و هەردەم ئەز دبێژم پێدڤیە مەدیكار پەیاما خوە ب دروستی بگەهینیت، هەروەسا كارێ نڤیسینێ ژی دكەم و من هژمارەكا گۆتار و بابەتان ل رۆژنامە و گۆڤارێن كوردی دا بەلاڤكرینە و من پەرتووكەك ژی ب ناڤێ (جەنگاوەر و شەهیدێن مالباتا عەبۆشی) چاپكریە.
