دهۆك و زاخۆ بەرهەڤییان دكەن و چارەنڤیسێ نەورۆز دیار نینە
قەیس وەیس:
بۆ حەفتییا سێیێ ل دووڤ ئێك بەرهەڤیێن یانەیێن پشكدار د خولا ستێرێن ئیراقێ یا فوتبۆلێ دا بەردەوامن بەری دەستپێكرنا وەرزێ نوو 2025-2026ێ ئەوا بڕیارە هەڤڕكیێن وێ ل 13ێ مەها بهێت ب پشكدارییا 20 یانەیان بهێتە كرن، یانەیێن كوردستانی ل سەر پلان و بەرنامەیێن خوە یێن ڕاهێنانێ و ئینانا یاریزانان بەردەوامن.
دهۆك د قووناغەكا باش دایە
تیما یانەیا دهۆك ئەوا نوكە د كەمپێ ڕاهێنانێ دا ل باژێرێ پیرمام ل هەولێرا پایتەخت بەردەوامە ل سەر ڕاهێنانێن خوە ب سەرپەرشتییا ڕاهێنەرێ بەرازیلی سێرجیو ڤاراس، دو یاریێن هەڤالینی دگەل هەلبژارتیێ لاوێن ئیراقێ كریە، دووماهی یاریزانێ پەیوەندی ب دهۆكێ كری یێ هێلا ناڤین یێ بەرازیلی نیتۆ كۆستایە و بڕیارە زووترین دەم بگەهیتە دناڤ ڕێزێن تیمێ دا د بیتە یاریزانێ 12ێ گرێبەستێن نوو ئیمزاكرین، دبەرانبەر 14 یاریزان نەماینە دناڤ ڕێزێن تیمێ دا، 10 یاریزانان گرێبەستا خوە نووكرییە، بڕیارە پیتەر گۆرگیس ژی ڤەگەڕیتە تیمێ، پشتی دەست بەردانا خوە ژ یانەیێ نەوەرگرت و ل سەر هاتیە مەرج كرن ب 800 ملیۆن دیناران هەكە بڤێت بچیت.
زاخۆ چاڤ ل كۆپا كەنداڤی یە
ژلایەكێ دووڤە تیما یانەیا زاخۆ ل یاریگەها دەلال بەردەوامە ل سەر ڕاهێنانێن خوە ب سەرپەرشتیا یێ قەتەری ویسام ڕزق، چاڤێ وان ل هەڤڕكییەكا دەرڤەیە ئەوژی كۆپا كەنداڤی، دهێتە پێشبینیكرن تیما زاخۆ دڤێ حەفتیێ دا بەر ب وەلاتێ توركیا بچیت بۆ دانانا كەمپەكێ دەرڤە، ل دووڤ ژێدەرێن باوەرپێكری بتنێ دو یاریزانێن پیشەكار ماینە دێ پێكهاتیێ زاخۆ هێتە ئێكلاكرن، ژبەرهەبوونا كۆمەكا یاریزانێن دناڤا هەلبژارتیێ ئیراقێ دا، ل پێنچ شەمبییا بۆریی گرهام ئارنۆلد ڕاهێنەرێ هەلبژارتیێ ئیراقێ سەرەدانا كەمپێ نافخوە یێ تیما زاخۆ دا، كوڕێن خابۆری گرێبەستا 12 یاریزانێن خوە نووكرییە، هەشت یاریزانێن نوو هاتینە و نەهـ یاریزان نەماینە دگەل تیمێ.
هەولێر ژی بەردەوامە
یانەیا هەولێر ب سەركێشیا ڕاهێنەرێ خوە باسم قاسم وەكو هەر یانەیەكا دی بەرهەڤیێن خوە بۆ خولێ دكەت ئەوا هەتا نوكە گرێبەستا 10 یاریزانان ئیمزاكرینە، هەشت یاریزانان گرێبەستا خوە نووكرییە و 14 یاریزان چووینە، یانەیا كەلهەوە منارە گوهۆرینێن مەزن كرینە تایبەت پشتی هاتنا دەستەكا نوو یا كارگێریێ.
چارەنڤیسێ نەورۆز ئالۆزە
پشتی ئەوێ دەنگۆباسێن سیاسی ل پارێزگەها سلێمانیێ و دەستەسەركرنا خودانێ یانەیا نەورۆز لاهۆر شێخ جەنگی، چارەنڤیسێ ڤێ یانەیێ ئالۆز و نە دیارە، هەرچەندە دەنگۆباسێن نە فەرمی بەلاڤبووی كو دێ دەستهەلاتێن باژێرێ سلێمانیێ پشتەڤانییا ڤێ یانەیێ كەت لێ پشتی گوهۆڕینا هەموو ئەندام و كارگێرییا یانەیێ، بۆ دو رۆژە ڕاهێنانێن تیما وان هاتبوو ڕاوەستاندن و بڕیارە ئەڤرۆ هەتا سوبەهی ڤەگەڕینە ڕاهێنانێن خوە، لێ ئەو ئالۆزیێن ڤێ داویێ ل سلێمانیێ پەیدابووین دودلی دناڤبەرا یاریزانان داپەیدابوویە، جەماوەر و یاریزانێن یانەیا نەورۆز دخوازن یانەیا وان تێكەلی سیاسەتێ نەبن.
كۆپا سۆپەرا ئیراقێ
ل دووڤ دەنگۆباسێن هاتینە بەلاڤكرن كو دبیت كۆپا سۆپەرا ئیراقێ یا وەرزێ ئەڤ سالە دناڤبەرا یانەیا دهۆك قارەمانا كۆپا ئیراقێ و یانەیا شورتە قارەمانا كولا ستێرێن ئیراقێ، سەرباری پێشتر هاتبوو ڕاگەهاندن كۆپا سۆپەر ب پشكدارییا شەش یانەیان بیت ئەوژی، شورتە، دهۆك، زاخۆ، زەورا، تەلەبە و جەوییە، لێ ژبەر نێزكبوونا خولێ و بەرهەڤیێن تیما بۆ وەرزێ نوو وەكریە داخوازا پاشئێخستنێ بهێتە كرن، لێ دهێتە پێشبینیكرن د حەفتییا بهێت دا دناڤبەرا هەردو یانەیێن دهۆك و شورتە بتنێ بیت.
