بـوونـا سـەرۆك بـارزانـی و خـالێن چـارەنڤیسساز
سـەبـاح بیتوللا
ل سالا (1946) ل بن سێبەرا ئالایێ پیرۆزێ كوردستانێ هاتیە سەر دونیایێ و تو دبێژی ئەزێ ئامادەمە ل بن سێبەرا وی ئالایی ژی بمرم.
ل سالا (1947) ێ دویر ل بارزانیێ نەمر كو (11) سالا ماڤە ل ئێكەتیا سۆفیەتا بەرێ فێری وانەیێن بەرخودانێ و دلسۆزیێ و فیداكاریێ بووی، ل ڤان سالان دا خۆراگربووی، پڕ هیڤی بووی و چاڤەرێی ئەلندەكا گەش بووی.
– ل (20/5/1962) بۆ بەرەڤانیكرن ل ئاخ و مللەتی چەكێ شەرەف و كەرامەتێ كرە ملێ خۆ و ناڤێ پیرۆزێ پێشمەرگایەتیێ هەلگرت و هەتا ئەڤرۆ ژی مەزنترین مەدالیا سەرفەرازیێ ل دەڤ جەنابێ هەوە پێشمەرگایەتی یە.
– پشكداربووی ل خەبات و تێكۆشینێ ل شۆرشا ئیلۆنا مەزن و پڕ بزاڤ و چالاك بووی ل گەل ئیدریسێ نەمر، بارێ مەزن هنگۆ هەلگرت و قەت ماندی نەبوون، چونكی پەیاما مللەتەكێ زولم لێكری هەوە هەلگرت بوو.
– ل رێكەفتنا (11) ئادارا دیرۆكی جەنابێ هەوەیێ قەدر گران ل گەل شەهیدێ هەردەم ساخ ئیدریسێ نەمر رۆلەكێ مەزن و كاریگەر هەبوو و ئێكەم جار بوو دان ب مافێن مللەتێ كورد بهێتە دانان و بۆ پاشەرۆژا گەلێ كورد بوو شەنگست.
– بەرانبەر وێ پیلانا خیانەتكاریا جەزائیر ل 6/3/1975، هەوە خۆ راگرت و تەسلیم ب ئیرادەیا دوژمن و داگیر كەرێن كوردستانێ نەبوون.
– هوین هەلگرێن چریسكا شۆرەشا (26 ی گولانا 1976) ل گەل شەهیدێ هەردەم ساخ ئیدریسێ نەمر و هەڤالێن دیتر و جارەكا دی هیڤی و ئومێد هاتنە زڤڕاندن و گرنژین كەفتە سەر لێڤێن شۆرشگێر و قەهرەمان و دلسۆز و كەسوكارێن شەهیدێن سەربلند.
– هوین ئەندازیارێن پێكڤەژیانێ و تەباهیێ و برایەتیێ و وەكهەڤیێ بوون ل گەل شەهیدێ نەمر ئیدریس بارزانی.
– هەوە سەر پەرشتیا داستانێن مەزنێن شۆرشا گولانێ كرن و پشتا دوژمنی هاتە شكاندن و پیلانێن قڕكرنا گەلێ كوردستانێ هاتنە بنئاخكرن.
– هوینێن هێژا و ئیدریسێ نەمر بنەمایێ بەرەیێ كوردستانی دانا و رەشمالا كوردی رێكخستەڤە كو هەر ئەڤ بەرەیێ كوردستانێ بوو و بۆ هێڤێنێ سەرهلدانا جەماوەرێ كوردستانێ ل بهارا سالا (1991) ێ.
– خۆراگربوون ل بەرانبەر لێهمشتێن كریارێن بەد ناڤێن ئەنفالا و كێمیا بارانێ و جینۆسایدكرنێ و قەت تەسلیم ب ئیرادەیا دوژمن و داگیركەران نەبوون، چونكو هەوە باوەریەكا مەزن ب دۆزا رەوایا مللەتێ كورد هەبوو.
– رژدتربوون ل سەر خەبات و فیداریێ و خۆ گوریكرنێ ژ بوونا سەرفەرازیێ و سەربەستیێ.
– سەركێشا سەرهلدانا جەماوەری یا بهارا سالا (1991) هەوەكر و كۆچك و دیوانخانەیێن زۆلم و زۆرداریێ هاتنە هەڕفاندن و ژناڤچوون.
– بەرەڤ هەلبژارتنان داخوازیا هەوە بوو ل باژێرێ (كۆیێ) ل سالا (1991)، كو ل شەرعیەتا شۆرشگێری ڤە بچین بەرەڤ شەرعیەتا قانوونی و دەستووری، لەوما ئەڤرۆ بووینە خودان سەرۆكایەتیا هەرێما كوردستانێ و پەرلەمان و حوكمەتا هەرێما كوردستانێ.
– فیدرالیەت گازیا هەوە بوو و بێگومان گازیەك ب جورئەت و وێرەك بوو.
– بلندكرنا ئالایێ پیرۆزێ كوردستانێ ل سەر تاسەری كوردستانێ و ئەو ئالایێ كو ب سەدان سالە خەبات بۆ هاتیەكرن و ب هەزاران شەهید ل پێناڤ دایی بریارا هەوە یێن قەدرگران بوو و ئەڤرۆ ئەو ئالا ل سەرتاسەری كوردستانێ هاتیە هەلدان و بوویە پێناسەیا كوردستانێ ل دونیایێ.
– چاوا ل شۆرشا مەزنا ئیلۆنێ و گولانا پێشكەفتنخواز وەكو پێشمەرگە د سەنگەر و چەپەرا دا بووی و بۆ بەرسینگ گرتنا رێكخراوا تیرۆرستێن داعش دیسان هەر د چەپەران دا بووی سەرۆك بارزانی.
– بەلێ سەروك تۆ بووی تە كێشا گەلێ كورد بریە سەر مەحافلێن نێڤدەولەتی و جیهانێ و ئێش و ئازارێن گەلێ كوردستانێ گەهاندیە دونیایێ.
– بەلێ سەرۆك جەنابێ تەبوو كو دونیا شانازیێ ب كورد و كوردستانێ بكەت.
– بەلێ سەرۆك تو بووی تە هەمی دەرگەهێن وەلاتان لێدان و ئەزموونا كوردستانێ بەرەڤ پێشڤەبری.
– بەلێ سیاسیەتا حەكیمانەیا هەوە بوو كو نێزیكی 40 وەلات كونسۆلێن خۆ ل پایتەختێ كوردستانێ ڤەكەن.
دیبلۆماسیا مەزنا تە بوو پشتەڤان و هاریكاریی بۆ گەلێ كورد پەیدا كرن.
– هەلوەستێ تە یێ نەتەوەیی و نیشتمانی و مرۆڤایەتی بوو كو دونیا د هەوارا گەلێ كورد هاتن و كوردستان هاتە پاراستن.
– ب سیاسەتا حەكیمانەیا جەنابێ هەوە دونیا ب ڤی رەنگی پێشوازیێ ل جەنابێ تە و گەلێ كورد دكەت.
– راشكاوی و راستگۆیی و سیاسەت و دیبلۆماسیەت بهێن فرەهی و بەرخودان هەلوەستێن هەوەنە كوردستان بەرەڤ ئەلندا دوماهیێ و دەولەت و سەربخۆبوونێ ڤە دبەت.
– ل سەر داخوازیا جەنابێ هەوە بوو پێشمەرگە بچیتە كۆبانێ هەڤپەیمانان هاریكاری بۆ كر و كۆبانێ ل داگیركرنێ رزگاركر. – ب جەنابێ هەوە د سەرفەرازبن ب سەرۆكاتیا هەوە پشتراستین كو كورد و كوردستانی د دەستەكێ ئەمین دانە و چ جاران كورد و كوردستان و بارزانی ژێك ناهێنە جوداكرن و بەرەڤ دەولەتبوونێ ئەم هەمی ل گەل تەینە و ئەم هەمی ژی ل گەل تە پێشمەرگەینە، چونكی جەنابێ هەوە پێشمەرگەیە سەرۆك بارزانی.
مێژوویا سەربلندیێ رێبەر و سەركردەیان خۆیا دكەت و دهەلبژێریت و ئەم باش دزانین تە كورسی نەڤێت و تە رزگاریا كورد و كوردستانێ دڤێت، تە سەربلندیا گەلێ كورد و كوردستانیان دڤێت.
بەلێ كورد و كوردستانیان بۆ مانا خۆ بۆ پاراستنا خۆ بۆ گەهشتن ب ئەلندا سەرفەرازیێ تو دڤێی سەرۆك مسعود بارزانی.
تو ئومێدا مللەتێ كورد و (سەمام ئەمان) بۆ پاراستنا كوردستانێ، نەك ب تنێ گەلێ كورد بەلكو هەمی ئازادیخواز و رزگاریخواز و ئاشتیخوازان شانازیێ ب تە دبەن و جەنابێ تە ئەڤرۆ مەرجعێ نەتەوەیا كوردە، لەوا ئەڤرۆ دبینین پارتی حزبا ژمارە ئێكە ل ئیراقێ و كوردستانێ دێ و مللەتی باوەریەكا موكم پێ هەیە كو ئەلندا ئاڤاكرنێ و دەولەتبوونا كوردستانێ دێ ل سەر دەستێ هەوەیێن هێژا و قەدرگران هەلێت و گەلێ كوردستانێ دێ گەهیتە هەمی مافێن خۆ یێن رەوا.
بەلێ جەنابێ سەرۆك بارزانی خۆیا بوو كو هوینێن قەدرگران مەرجعێن نەتەوەیا كوردن بەرێز پاپا فرانسیس كو سەرەدانا كوردستانێ كر بەری هەر تشتەكی داخوازا وی دیتنا جەنابێ هەوە بوو، ئەڤە ژی وێ چەندێ ئاشكرا دكەت كو مەرجعێ نەتەوەیا كورد و سەنگا بەلانسا سیاسی یە ل دەڤەرێ و سەمام ئەمانە بۆ پاراستنا هەمی نەتەوە و ئایینان ل كوردستانێ.
سەرۆك مسعود بارزانی خەمخۆر و پارێزەر و پشتەڤانێ وانە، ئەم سەربلندین كو مە كوردان ژی وەكو رێبەرێن دونیایێ رێبەر و سەرۆك و مەرجعەك هەیە كو نە بتنێ كوردستانێ بەلكی هەمی شۆرشگێر و ئازادیخواز و ئاشتیخوازێن دونیایێ شانازیێ پێ دكەن ل دوماهیێ ژی دبێژن كورد و كوردستان و بارزانی پێكڤە د گرێداینە و ژێك ناهێنە جوداكرن و بارزانی بوویە هێما و ناسنامە و مەرجعێ نەتەوەیا كوردستانێ.
