پشتی سێ ژڤانان قارەمانی هاتە هەلوەشاندن
كۆمپانییا پیلسیتانگ یا ڕاگەهاندنێ ب ڕازیبوونا فدراسیۆنا فوتبۆلا كوردستانێ سالانە قارەمانییا پیلستانگ ل سەر ئاستێ كچان بۆ یانەیێن كوردستانێ ڕێك دئێخیت، ژ پارێزگەها دهۆكێ سێ یانە بەرهەڤی بۆ پشكدارییا وەرزێ نوو دكرن ئەوا بڕیار بوو ل دەستپێكا ڤێ مەهێ هەولێرا پایتەخت ب شێوەیێ كۆمڤە بوون مێڤان بكەت، هەرسێ یانەیێن ئافرەتێن دهۆك، تیما یانەیا زاخۆ، تیما یانەیا باتیفا، لێ ئەو پتر زیان ڤێكەڤتی یانەیا ئافرەتێن دهۆكێ بوو، لدۆر ڤێ یەكێ ژلایێ كارگێری و هونەری ڤە بەرپرسێن ئەڤێ یانەیێ بۆ رۆژنامەیا ئەڤرۆ دڤێ ڕاپۆرتێ دا دیاركریە.
ل دەستپێكێ سەردار سالح سەرۆكێ یانەیا ئافرەتێن دهۆكێ گۆت: پێنەڤێت وەكو یانە مە بڕیاردابوو هەر قارەمانییەكا ل كوردستانێ بهێتە ڕێكخستن بۆ هەر یارییەكا ل دووڤ شیانێن خوە ئەم پشكداربین و مەرەما مە ژی دو خالن، یا ئێكێ یاریزانێن مە دەلیڤەیا خوە بینن و گرنگیێ پێ بدەین یا دویێ پێشئێخستنا وەرزشا كوردستانێ یە، قارەمانییا پیلسیتانگ ئێك ژ ئەوان قارەمانیانە كو ئەڤە چەندین سالە ئەم پشكداریێ تێدا دكەین، بۆ وەرزێ ئەڤ سالە سەرباری كاودانێن مە یێن دارایی یێن خراب مە بڕیاردا پشكداربین ژبەر هەردو ئەگەرێن مە دیار كرین.
هەروەسان ناڤهاتی گۆت: پشتی مە لیستە و بڕیارا پشكداریێ بۆ لژنەیا ڕێكخستنێ هنارتی و ژڤان هاتە دانان كو ل 23ێ تەمووزا بۆری هاتبا كرن، لێ ژ نشكەكێ ڤە هاتە پاشئێخستن بۆ ناڤەڕاستا مەها تەباخا بۆری دا، پشتی هنگێ ب بوهانێن تەكنیكی پاشئێخستەڤە بۆ دەستپێكا ئەیلۆنا بهێت، لێ یا سەیر ئەوبوو ئەم هاتینە ئاگەهداركرن ژبەر نە گەهشتنا ڕێكەڤتنێ دگەل سپۆنسەران نەچاربوون قارەمانی بهێتە هەلوەشاندن و دبیت بۆ بهێنڤەدانا قوبخانان دناڤبەرا هەردو وەرزان دا، ئەڤە ژی كارەساتەكە و یارییان ب خوە ب یانەیێن پشكدارن و یاریزانێن كچ دكەن.
ل دووماهیێ ناڤهاتی گۆت: یانەیان چ گونەها خوە هەیە رۆژانە ئەم 75 هزار دیناران بۆ ڤەگۆهاستنا یاریزانێن خوە دمەزێخین ژ مال بۆ یاریگەهێ تایبەت ئەوێن دەرڤەیی باژێری، هەروەسان كادرێ ڕاهێنەران و یاریزانان بخوە چ گونەها خوە هەیە بۆ ماوەیێ دو مەهن ڕاهێنانان ب وەستیان دكەن لدووماهیێ بێژنێ قارەمانی هاتە هەلوەشاندن، هیڤییا مە ئەوە فدراسیۆنا فوتبۆلا كوردستانێ دووڤچوونێ بكەت یان نەهێلیت هەر لایەنەك قارەمانیەكێ ڤەكەت بێ دانا گەرەنتیێ.
ژلایێ خوەڤە ئاراز سالح ڕاهێنەرێ یانەیا ئافرەتێن دهۆكێ گۆت: پشتی ب دووماهی هاتنا خولا فوتسالا كوردستانێ و شیاین ببنە قارەمان بۆ وەرزێ دویێ ل دووڤئێك و یا سێیێ د دیرۆكا خوە دا، هەرزوو مە یاریزانێن خوە یێن ل بن 17 سالی بۆ تیما تازەپێگەهشتییان گازیكرن دیسان دەرگەهێ تاقیكرنێ بۆ هەر یاریزانەكا خودان شیان ڤەكر، پێخەمەت تیما خوە دروست بكەین بۆ قارەمانییا پیلستانگ ئێك ژ قارەمانیێن بهێز یێن كوردستانێ، پشتی ژڤان هاتیە دەستینشانكرن ل 23ێ تەمووزێ مە بەری وێ ب دو حەفتیان دەست ب ڕاهێنانان كر، لێ دووڤدا هاتە پاشئێخستن دوبارە پلانێن مە تێكدان نەچاربووین بشێوەكێ دی خۆ بەرهەڤكرن، بۆ جارا سێیێ هاتە پاشئێخستن، ئەڤچەندە ژی كارتیكرن ل سەر بەرنامێ مە كر و دەرۆنێ یاریزانان ژی تێكدا و باری دارایی یێ یانەیێ گرانتر لێكر، نشكەكێ ڤە بەری دو رۆژان هاتینە ئاگەهداركرن قارەمانی هاتە هەلوەشاندن هەتا دەمێ بهێنڤەدانا قوتابخانەیان و هێشتا وەرزێ قوتابخانێ دەستپێنەكری.
هەروەسان ناڤهاتی گۆت: ب ڕاستی ژی سەیرە زێدەتری 12 یانەیێن كوردستانێ چاڤەڕێ قارەمانیێ بن، یاریزان و كادرێ راهێنانێ رۆژانە خۆ ماندیبكەن و كارگێرییا یانەیێ مەزاختیێ رۆژانە بەرهەڤبكەت پێخەمەت پشكداریێ د قارەمانیێ دا لدووماهیێ ڕێكخەرێن قارەمانیێ ب هەلوەشینن! ئەم نزانین ئەڤە چەوا د وەرزشێ دگەهن! دڤیابا زەحمەت و بزاڤێن یانەیان بەرچاڤ وەرگرتبان، هەرچەوابا دگەل سپۆنسەران ڕێكەڤتبان، نە ڕەوایە پشتی ڕاگەهاندنا قارەمانیێ ب دو مەهان و یانە بەرهەڤیان بكەن ژ نوو بێژن ژبەر چەند ئەگەرێن كارگێری قارەمانی هاتە ڕاوەستاندن، فدراسیۆنا فوتبۆلا كوردستانێ و ڕێڤەبەرییا گشتی یا وەرزشی ل هەرێمێ بەرپرسێن ئێكێ نە هیڤییا دۆڤچوونێ بكەن.
