نڤیسه‌ر بۆ چ تشتی دنڤیسیت؟
عبدولخالق سولتان
گه‌له‌ك جاران، به‌لكو پرانیا جاران ده‌مێ ئه‌ز كورته چیڕۆكه‌كێ دنڤیسم، ئه‌ز نزانم ئه‌و چیڕۆك دێ لسه‌ر چ بابه‌ت بیت! به‌لێ هه‌ر ده‌مێ من ئێكه‌م په‌یڤ نڤیسی هزر و هه‌ستێن من خو تێكدئالینن و د ناڤ مه‌ژیێ من دا دئازرن، دناڤبه‌را په‌یڤان دا دبیته هه‌ڤركیه‌كا دژوار، و به‌ریكانێ دكه‌ن كا دێ كیژان په‌یڤ خۆ گه‌هینته ژ ده‌رڤه و ده‌ربڕینێ ژ وان هزر و هه‌ستا كه‌ت، ئه‌وێن د مێشكێ من دا په‌قین.
ئه‌ڤ پروسێسه هه‌می نڤیسه‌ران ڤه‌نا‌‌گریت، دبیت ئه‌زموونه‌كا كه‌سۆكی بیت، ژبه‌ركو هه‌ر نڤیسه‌رك بۆ تشته‌كی دنڤیسیت، مه‌به‌ستا من ب نڤیسینێ نڤیسینا داهێنه‌ره نه‌ك ره‌گه‌زێن دی یێن نڤیسینێ، ئه‌ڤجا كریارا نڤیسینێ گرێدانه‌كا موكوم یا ب مه‌ره‌ما نڤیسه‌ریڤه هه‌ی، ب گۆتنه‌كا دی؛ ئه‌گه‌ر نڤیسین بۆ ده‌ربڕینێ ژ هزره‌كێ یان هه‌سته‌كی د ناخێ نڤیسه‌ری دا بیت، دێ نڤیسین گه‌له‌ك یا كاریگه‌ر و سه‌رنج راكێش بیت، ژبه‌ركو دێ پتر راستگۆیی تێدا هه‌بیت، له‌ورا پتریا وان به‌رهه‌مێن ئه‌ده‌بی، ئه‌وێن گرێدای ئه‌زموونه‌كا كه‌سۆكی یا نڤیسه‌ری بن دبالكێشن، رامان واتایێن كویر ب خۆڤه دگرن، به‌لێ چێدبیت ئه‌ڤ جۆرێ نڤیسینێ گه‌له‌ك جه‌ماوه‌ر نه‌بیت، چنكو نه هاتیه نڤیسین دا رازیبوونا جه‌ماوه‌ره‌كی ب ده‌ستڤه بینیت، یان ژی هنده‌ك كه‌س ده‌ستخۆشیێ لێبكه‌ن، تنێ یا هاتیه نڤیسین دا ئه‌زموونه‌كا كه‌سایه‌تی یا راست به‌رچاڤ بكه‌ت، ئه‌ڤجا ژ كێماسێن ئه‌ڤی جۆرێ نڤیسنێ ئه‌وه دبیت گه‌له‌ك خه‌لك لدۆر كوم نه‌بیت.
پرانیا نڤیسه‌ران، هه‌ول دده‌ن ره‌فتارێ تنێ وه‌ك ئامرازه‌ك دگه‌ل نڤیسینێ بكه‌ن، بۆ ب ده‌ستڤه‌ئینانا هنده‌ك ئارمانجێن كه‌سۆكی یێن ته‌سك، له‌ورا ئه‌ڤ جۆرێ نڤیسینێ ب شێوه‌یەكێ پیشه‌یی دهێته دارشتن، هه‌ر په‌یڤه‌ك و رسته‌یه‌ك ب هه‌ژمار و پیڤان دهێنه بكارئینان، و لدویڤ پیڤه‌رێن (SIO) گۆتار دهێنه دارشتن، ل ده‌سپێكێ نڤیسه‌ر ناڤونیشانی دیاردكه‌ت، كو پیتێن وی ژ 60 پیتان نه بۆریت و دڤێت په‌یڤێن كلیل تێدابن، هه‌روه‌سا دڤێت رسته دكورت بن، پرگه ژ 4-5 رسته‌یان نه‌بۆریت، ئه‌ڤه وگه‌له‌ك یاسایێن دی یێن د دارشتنێ دا ل به‌رچاڤ وه‌ردگرن، ئه‌ڤه ده‌مێ نڤیسه‌ر تنێ بۆ وه‌رگری وجه‌ماوه‌ری دنڤیسیت، دبیت ئه‌ڤ جۆرێ دارشتنێ یێ تێر خوانده‌ڤان بیت، به‌لێ به‌رداوامیدان ب ئه‌ڤان جۆره نڤیسینان، دێ حه‌زا نڤیسینێ د ناخێ نڤیسه‌ری دا ساركه‌ت! و سه‌ره‌رای كو دێ به‌رهه‌مێ وی یێ پر جه‌ماوه‌ر بیت، به‌لێ ئه‌و دێ پتر یێ ماندی بیت؛ جونكی دێ ژ جیهانا راستگۆیێ دگه‌ل خۆ دویركه‌ڤیت.
لێ یا پێدڤی ئه‌وه، نڤیسه‌ر خۆ نه‌كه‌ته ئێخسیرێ جه‌ماوه‌ری، ژئالیەكێ دیڤه؛ نابیت تنێ خۆ ل به‌رچاڤ ببینیت، به‌لكو فه‌ره به‌لانسه‌كێ د ناڤبه‌را هه‌ردو جۆران دا بكه‌ت، دا بشێت به‌رده‌وامیێ ب شێوه‌یەكێ جوان و داهێنه‌ر كریارا نڤیسینێ ئه‌نجام بده‌ت.
