وەزارەتا دەرڤەیا ئەمریكا چار گرۆپێن ب سەر حەشدا شەعبی ڤە ئێخستنە د ناڤ لیستا تیرۆرێ دا
وەزارەتا دەرڤەیا ئەمریكا هەر ئێك ژ كەتائیبێن سەیدولشوهەدا، بزاڤا نوجەبا، بزاڤا ئەنسارولاوفیا و كەتائبێن ئیمام عەلی، ئێخستنە د ناڤ لیستا ( رێكخراوێن تیرۆرستی یێن بیانی) دا.
وەزارەتا دەرڤەیا ئەمریكا د بەیاننامەیەكێدا، ب فەرمی چار گرۆپێن ب سەر هێزێن حەشدا شەعبیڤە، كو ب هاریكاریكرنا ئیرانێ د تاوانبارن، ئێخستنە د ناڤ لیستا ( رێكخراوێن تیرۆرستی یێن بیانی) دا، ئەڤە ژی وەك پشكەك ژ بزاڤێن وێ یێن بەردەوام بۆ بەرهنگاربوونا وان گرۆپان كو پێكهاتبوون ژ كەتائیب سویدولشوهەدا، بزاڤا نوجەبا، بزاڤا ئەنسارولاوفیا و كەتائبێن ئیمام عەلی.
ب گۆڕەی وەزارەتا دەرڤەیا ئەمریكا»ئارمانج ژ ڤێ پێنگاڤێ ژناڤبرنا تۆرێن دارایی و لۆجستی یێن ڤان گرۆپانە، كو ئەمریكا وان ب بەرپرسیار دزانیت د هێرشكرنێ ل سەر كارمەند و دەزگەهێن ئەمریكی ل دەڤەرێ، سزایێن وان ژی بلوككرنا سامانێن وانە ل ئەمریكا و دێ هەر جۆرە مامەلەیەك ژ ئالیێ وەلاتیێن ئەمریكی ژی ل گەل وان هێتە قەدەغەكرن» .
ئەو هەر چار گرۆپە پێشتر د لیستا ( تیرۆرستێن دیاركری یێن جیهانێ) هاتبوونە دانان ب ڤان سزایێن نوو ژی دێ ئەنجامێن قانوونی و دارایی گرانتر بن.
هەڤدەم جۆ وێلسن، ئەندامێ گۆنگرێسێ ئەمریكی ل تۆرا جڤاكییا (ئێكس) نڤیسی» پێشوازیێ ل بەیاننامەیا وەزارەتا دەرڤەیا ئەمریكا یا ئێخستنا ناڤێ وان گرۆپان د ناڤ لیستا تیرۆرێ دا، كو ل دەستپێكا ئەڤسالە د نامەیەكێدا من داخوازا وێ چەندێ كربوو».
ئەڤە د دەمەكیدایە، ل رۆژا 16 ڤێ مەهێ، نڤیسینگەها كونترۆلكرنا سامانێ بیانی یا ب سەر وەزارەتا گەنجینەیا ئەمریكاڤە، سزا ب سەر دو تۆرێن هاریكارییا داراییا ئیرانێ و زێدەتر ژ 12 كەس و دەزگەهێن دی ل هۆنگ كۆنگ و ئیماراتێ سەپاندبوو. كو تۆمەتبارن ب سپیكرنا ملیۆنان دۆلاران ژ داهاتێ فرۆتنا پەترۆلا ئیرانێ بۆ بەرژەوەندییا هێزا قودس یا ب سەر لەشكرێ پاسدارێن ئیرانێ ڤە و وەزارەتا بەرگریێ و پشتەڤانییا هێزێن چەكدارێن ئیرانێ بكار هاتبوون.
هەروەسا پێشتر وەزارەتا دەرڤەیا ئەمریكا هەر ئێك ژ كەتائیب حزبوللا و عەسائیب ئەهلولحەق وەك ( رێكخراوێن تیرۆرستی یێن بیانی) دابوونە نیاسین. ڤێ چەندێ ژی وەكربوو كو گرۆپێن چەكدار و سەركردەیێن وان بكەڤنە بن سزایێن گران ب مەبەستا رێگریكرنێ ل گەهشتنا وان ب سیستەمێ داراییێ ئەمریكی. سزایێن ئەمریكا ژی ل سەر وان هەردو گرۆپان پێكهاتبوون ژ بلۆككرنا سامانێن وان ل ئەمریكا، قەدەغەكرنا مامەلەیا بازرگانی ل گەل وان، هەر تاكەك یان ئالییەك مامەلێ ل گەل وان گرۆپان بكەت، دێ روو ب روویێ سزایان بن.
ژ ئالیێ خوەڤە نزار حەیدەر، چاڤدێرێ سیاسی وسەرۆكێ سەنتەرێ راگەهاندنا ئیراقی ل واشنتۆنێ، ناڤێ وان گرۆپان ئاشكراكر كو هێرشێن درۆنی ل سەر زەڤیێن پەترۆلی ل هەرێما كوردستانێ ئەنجامدابوون، نوكە ئەو هەردو گرۆپە چووینە د ناڤ لیستا ئەمریكا یا تیرۆرێ دا.
وی دەمی حوكمەتا هەرێما كوردستانێ و حوكمەتا فیدرالییا ئیراقێ د دانوستاندنان دابوون بۆ وێ چەندێ ل سەر پرسێن پەیوەندیدار ب پەترۆلێ و داهاتێ ناڤخوەیی و مووچەی رێك بكەڤن، ژ دەڤەرێن بن دەستهەلاتا حوكمەتا فیدرالییا ئیراقێ زەڤیێن پەترۆلی ل هەرێما كوردستانێ هاتنە تۆپبارانكرن و ژئەگەرێ وێ چەندێ بەرهەمێ پەترۆلا هەرێما كوردستانێ هەتا ئاستێ (سفر) كێمبوو.
ل دۆر ڤێ چەندێ هەر وی دەمی نزار حەیدەر، چاڤدێرێ سیاسیێ ئیراقی و سەرۆكێ سەنتەرێ راگەهاندنا ئیراقی ل واشنتۆنێ راگەهاندبوو» ئەوێن درۆن ئاراستەی زەڤیێن پەترۆلی یێن هەرێما كوردستانێ دكەن، هەردو میلیشیێن سەیدولشوهەدا و ئەنسارولئەوفیا) نە».
