عەمار حەكیم: هەتا نوكە مە دەستوورێ ئیراقێ ب تەمامی بجهنەئینایە
سەرۆكێ باسكێ حیكمە یێ نیشتمانی ل ئیراقێ ئاماژە ب وێ چەندێ كر، هەتا نوكە دەستوورێ ئیراقێ ب تمامی نەهاتیە بجهئینان، رێككەفتنا ڤێ دووماهیێ د ناڤبەرا هەولێرێ و بەغدایێ ژی ل دۆر پەترۆلێ ب كلیلا دەركرنا قانوونا پەترۆل و غازێ و چارەسەرییا كێشەیێن هەلاویستی یێن دی هەژمارت.
عەمار ئەلحەكیم، سەرۆكێ باسكێ حیكمە یێ نیشتمانیێ ئیراقی، ل دیدارا مێری ئاخڤت و گوت» دەستوور گرێبەستەكا جڤاكییە و ل 20 سالێن بۆری ئالییان زێدەتر دوپاتی ل سەر مافێن خوە كریە، نەك ئەركێن خوە و پێدڤییە دەستووری وەك پاكێچ قەبوول بكەین، ئەڤە بۆ مەیە و ئەڤەژ بۆ بەرامبەری مەیە، ئەڤە دێ بیتە بنەما».
سەرۆكێ باسكێ حیكمە گوت ژی» نوكە كو ئیراق د ئارامییەكا سیاسی، ئەمنی و جڤاكیدایە و دەستپێكا رێكخستنا كاروبارایە، دەمەكێ گەنجایە بۆ راستڤەكرنا دەستووری».
عەمار ئەلحەكیم دوپاتی ل وێ چەندێ كر» پشكەكا مەزن ژ دەستووری هاتیە بجهئینان، بەلێ پشكەكا دی نەهاتیە بجهئینان و ناكۆكی ل سەر هەیە، هەبوونا ناكۆكییان عەیب نینە، بەلێ عەیب ئەوە د شیاندا نەبیت ئیدارەیا وان ناكۆكییان بهێتە كرن، دڤێت بگەهینە شێوەیەكی كو جهێ رازیبوونا هەموویان بیت».
ل دۆر پرسا پەترۆلێ، عەمار ئەلحەكیم رێككەفتنا ڤێ دووماهیێ د ناڤبەرا حوكمەتا فیدرالی و حوكمەتا هەرێما كوردستانێ ب ئاماژەیەكا مەزن هەژمارت و راگەهاند» بابەتەكە كو زێدەترە ژ 10 سالان دهێتە باسكرن، ژ سالا 2008 ناكۆكی ل سەرە، بەلێ ل 2024 گەهشتینە بۆچوونەكێ ل دۆر چاوانییا تمامكرنا رۆلی د ناڤبەرا حوكمەتا فیدرالی و حوكمەتا هەرێما كوردستانێ، تایبەت ب كەرتێ پەترۆلێ».
ب باوەرییا عەمار ئەلحەكیم»دەمێ رێككەفتن هاتیە كرن و سیمایێ هەڤپشك دەركەفت كو هەردو ئالی پێ د رازینە، دشیاندایە بێژین كلیلا دەركرنا قانوونا پەترۆل و غازێ ل بەردەستە».
ڤی سیاسەتمەدارێ ئیراقی پێشبینی كر» دەربازكرنا قانوونا پەترۆل و غازێ ب ساناهیتر بیت، كو ئەو چەندە دێ بیتە بنەمایەك بۆ بۆچوونەكا هەڤپشك بۆ بڕێڤەبرنا كەرتێ پەترۆلێ ل هەرێما كوردستانێ و جهێن دی، دێ هاریكار بیت ژی بۆ دەربازكرنا قانوونا پەترۆل و غازێ».
عەمار ئەلحەكیمی باس ل وێ چەندێ ژی كر» ل دەمێ نڤیسینا دەستووری، سەركردەیان زێدەتر ژ حەفتییەكێ دانوستاندن ل سەر مادەیێن تایبەت ب پەترۆلێ و غازێڤە كر، د دەمەكیدا بابەتێن دی یێن گرێدای هەرێما كوردستانێ تنێ دو ساتان ڤەكێشا، ئەڤە ژی رامانا وێ چەندێیە بابەتێ پەترۆلێ كلیلا سەرەكییا گەلەك كێشەیێن دی یە».
سەبارەت ب كێشەیا دارایی ل گەل هەرێما كوردستانێ، عەمار ئەلحەكیم رۆناهێ ئێخستە سەر وێ چەندێ كو 94% ژ بودجەیا ئیراقێ ژێدەرێ وێ ژ داهاتێ پەترۆلێیە، هەروەسا پێشنیازكر» داهاتێ هەموو جهان بهێتە كۆمكرن د سەبەتەیەكێدا و پاشی ب گۆڕەی رێژەیا ئاكنجییان ب شێوەیەكێ دادپەروەرانە بهێتە بەلاڤكرن».
سەرۆكێ باسكێ حیكمە جوداهێ ئێخستە د ناڤبەرا رەفتاركرنێ ل گەل پارێزگەهان و هەرێما كوردستانێ و گوت» دەمێ وەزارەتا دارایی رەفتارێ ل گەل هەرێما كوردستانێ دكەت، تشتەك ل پێشبەری نینە ب ناڤێ فەرمانبەر و مووچە، بەلكو رێژەیەك ژ بودجەیێ تەرخانكری بۆ هەرێما كوردستانێ، لەوما پێدڤییە وێ رێژەیێ بدەتە حوكمەتا هەرێما كوردستانێ ئەوژی بۆ مووچەی و پێدڤییە دی بەلاڤ بكەت».
گوت ژی» دەمێ داهاتێ پەترۆلی و نە پەترۆلی هەبیت، تشتەكێ سروشتییە بهێتە مقاسەكرن، بهێتە زانین ئەو داهاتە چەندە و پاشی ب هەمان ئەندازە ژ پشكا هەرێما كوردستانێ بهێتە بڕین».
ناڤبری هیڤی خواست ب رێكخستنا هاتنا پەترۆلا هەرێما كوردستانێ ب رێیا سۆمۆ، بەلاڤكرنا داهاتێ ب شێوەیەكێ رێكۆپێك بیت.
سەرۆكێ باسكێ حیكمە دانپێدان ب هەبوونا گەندەلیێ ل ئیراقێ كر و گوت» د رێیەكا شاش دا دچین د چارەسەركرنا گەندەلیێ، پێدڤییە ژێرخانەیا گەندەلیێ ب شێوەیەكێ بنەڕەتی بهێتە چارەسەركرن».
سەبارەت هەلبژارتنان ژی، عەمار ئەلحەكیم هۆشداری ژ وێ چەندا دا كو ب دیتنا هندەكان هەلبژارتن و هەڤڕكییا سیاسی هەیە، ئانكو ئاساییە هەر كارەكی بكەت، ئەڤەژی شاشییە، نابیت د ڤێ مەهێدا ب شێوەیەك رەفتار بهێتە كرن، ئەركێ مەزن ب زەحمەتتر لێ بهێت، چونكە دڤێت ئەو سەركردە پشتی هەلبژارتنان پێكڤە رونن، رۆژا 11/11/ 2025 دوماهییا دیرۆكێ نینە، بەلكو دەستپێكا قووناغەكا نوویە».
د بەرسڤا پرسیارەكێدا سەبارەت ب دروستكرنا هەرێمەكا شیعی و هەبوونا حەشدا شەعبی هەڤشێوەی پێشمەرگەی ل وێ هەرێمێ، عەمار ئەلحەكیم گوت» بابەتێ هەرێمێ بابەتەكێ كارگێرییە، ئەم ل گەل هەرێمێن نەتەوەیی و ئایینی نینین، بەلكو ل گەل هەرێمێن دەڤەری و كارگێری داینە هەكە بهێنە دروستكرن، دەستوورێ ئیراقێ ماف دایە سێ پارێزگەهان یان زێدەتر دشێن هەرێمەكێ دروست بكەن ل بن رۆناهییا كارگێری نەك ئایینزایی».
گوت ژی» ل قووناغا نوكە دڤێت دەستهەلاتا كارگێری ل پارێزگەهان بهێتە ب هێزكرن، دەمێ رەوش ئارام دبیت، وی دەمی ئەڤ راستییا دەستووری هەر وەك خوە دێ مینیت بۆ ئەوێ دڤێت ڤێ بجهبینیت و د بەرژەوەندیدا بیت».
عەمار ئەلحەكیم دوپاتی ل سەر پێدڤییا گرێدانا گرێبەستەكا جڤاكی و سیاسی یا نوو كر بۆ پێداچوونی ل دەستووری و دوپاتكرنا تێگەهشتنێ ل سەر، ئەڤ چەمكێ دەستووری یێ هەڤڕێ بیت ل گەل وان پێشهاتێن ل 20 سالێن بۆری ئیراقێ ب خوەڤە دیتین، گرنگترین مەرجێ ڤێ گرێبەستێ هەڤسەنگییا سیاسی و جڤاكی و ئارامی ل وەلاتی».
گوت ژی» نابیت ئەو گرێبەستە بۆ شكاندنێ و بەزاندنا ئالییەكی بیت، نابیت ئالییەك ئەجیندایێن خوە ب سەر ئالییەكێ دی ب سەپینیت، دڤێت ب لهەڤهاتن بیت.
