13 سالان ئەز د زیندانێن حوكمەتا بەعس دا مام و نەیێ پەشێمانم
سالار محەمەد دۆسكی:
2-7
جەلال حەسەنی گۆت: ئەڤ روودانێن زارۆكینی و گەنجاتیا مە ل دەسپێكێ دروست بووین هێشتا ئەم زارۆك بووین و ئەڤ كوردینی و زیرەكی هەر تشتەكێ مە وەرگرت بیت مە ژ رەحمەتیێ باب و باپیرێن خوە وەرگرتن.
زیندانیێ سیاسی جەلال حەسەن ڕەشوی گۆت: پشتی سالا 1975 هیڤی و ئومێدێن خەلكی نەمابوون و هوسا بوو هەجكو تشتەكێ تە بەرزەبیت و تو لێ بكەی و ئەم هەمی ل هیڤیا چریسكەكێ بووین و دووبارە شۆرەش نووی بیتە ڤە، ئەم هوسا هاتبووینە پەروەردەكرن، كو ئەم بەرهەڤ بووین بچین و سینگێ خوە داینە بەر توپەكێ و ئێك ژ تشتێن گەلەك ئەم پالداین بۆ كوردینیێ پشتی 75ێ گوهداریكرنا كاسێتێن شڤان پەروەری بوون، و مە دگۆت نوكە دێ چین ب دوژمنی ڤە پەقینین و بیرا من دهێت ئێك ژ هەڤالێن مە قوتابی بوو ل پولا پێجێ و ناڤێ وی(خودێ دا عیدو) گەلەك هەستەكێ بلند بوو چێ بوو و ئەوی خوە ل چەیخانا گوندی دا كاسێتێن شڤان پەروەری دانانە سەر و خەلكی گوهداری لێ دكر، و ئەگەر تەماشە بكەیێ وی دەمی هێزا حوكمەتێ چەند بوو ئەگەر گرتبا بەلێ هوسا جورعەت بۆ دروست بوو ئێدی هەست ب ترسێ نەكر، و مەترسی ئێخستە سەر ژیانا خوە سەخمراتی تام و ڤیانا كوردینیێ وی دەمی ئەم سێ هەڤال ل گەل ئێك دابووین، و رێكخستی بووین و پشتی بورینا چەند رۆژا ژ ئەڤێ روودانا دانا كاێستێ ل چەیخانێ ئەمنا ئێسفنێ گازی كر، و مە هندەك شیرەت لێكرن بەری بچیت و مە گۆتێ دڤێـ بخە رێكەكێ بینی چونكە تو دێ مە هەمی یا ئاشكەراكەی و پشتی چوویە ئەمنێ زڤری ڤە و گۆت من چ رێك نین و ئەڤان گەلەكێ نەخوشكریم و من چ رێك نین و دڤێت دانپیدانێ بكەم و پرسیار ژ مەكر كا چ بكەت و مە گۆتێ دانپیدانا تە ئاشكەراكرنا مەیە و دڤێت ئەم هەمی بچین ببینە پێشمەرگە پەیوەندیێ ب شۆرشا گولانێ بكەین، یان دڤێـت ئەم هەمی بهێنە دەستەسەركرن و مە گۆتێ تە دو رێك هەنە یان دێ قوتابخانا خوە كەیە قوربانی مە هەمیان یان دێ ئەم بینە قوربانی ڤێ چەندێ و ئەو قوتابیەكێ گەلەك زیرەك بوو و ئەوی گۆت دێ قوربانیێ ب قوتابخانا خوە دەم وی دەمی ئەم شەش گەل بووین ئەز ب رێكا (حسێن شەمۆ) چووبوو مە ناڤ رێكخستنێن پارتی دیموكراتی كوردستان دا، و بەرپرسێ مە (حسێن شەمۆ) پەیوەند ل گەل رێكخستنێن باعەردێ و مەهەتێ هەبوون، و مە نەهێلا ببیتە رۆژ و مە گۆتێ دڤێت قەستا ناڤ پێشمەرگەی بكەی و ب شەڤ دەربازبی و مە نەڤێـت دناڤ گوندان دا دەربازبی و مە نەڤێت دناڤ باعەدرێ ڕا دەربازبی و مە دڤێت تو دناڤ دەشتێ ڕا بچی هەتا بگەهیە گوندێ(بوزێ) كەسەكێ چ ژێ نەزانی و مە ب شەڤ دەربازكر و دەمێ بوویە سپێدە مە دیت برایێ ویێ مەزن هات، و مەزانی ئەو چ ژێ نوزان و یێ لێدگەرن و قوتابیێ قوناغا دوماهیێ ئامادەیی و نەچوویە قوتابخانێ ئەڤرۆ و چ دەنگوباسێن وی نینن و نەچارن لێ بگەرن وێ سحارێ مە دیت هەر ترۆمبێلا قوتابیان یا دچوو ئێسفنێ ئەوا سەحكرە برایێ خوە و تێدا نەبوو، و من ژی نەدڤیا ل سەر بابەتی ئاگەهدار بكەم، و پشتی بورینا نێزیكی دەمژمێرەك و نیڤا چوومە بەرە ب بنی چووم و من هندەك بەر دیتن و من هزر كر نەچوویە و ل بەر ئەڤان بەرا نڤستی یە و دەمێ بوویە پشتی نیڤرۆ بوو مە دەنگوباسێن وی هاتن، كو گەهشتیە جهێ مەدڤیا بچیتێ و دلێ مە ئارام بوو و هەر مە مالا وا ئاگەهدار نەكر، و بنەمالا وان گەلەك شەپلین و گەلەك دڤیا تشتەكی ژێ بزانن و لێگەریان و پرسیاركرن، یا بەردەوام بوو و ئەم نەچاربووین ئاگەهداریا بنەمالا وی بكەین، و مە گۆتێ بلا دلێ هەوە پێڤە نەبیت گەهشتیە شۆڕشێ و ئەگەر نەچووبا دڤیابا ئەم هەمی هاتباینە زیندانكرن، و رەنگە ئەم هاتباینە سێدارەدان و بلا دلێ هەوە پێڤەنەبیت، و ئەو هەڤالێ مە گەهشت بوو گوندێ (بوزا) و هەر دو پێشمەرگە (سەلمان و میرزا) ل وێرە بوون، و ئەوا پەیوەندی ل گەل رێكخستیێن پارتی دناڤ باژێران دا هەبوون، و دیسا پەیوەندیا مە و شۆرشێ ب رێكا ئەڤان هەر دو كەسان بوون، و هەر پەیامەك یان نامەك هەبا ئەوا دگەهاند و دەنگوباس ل ناڤخوە دگەهاندنە شۆرشێ و ئەوان هەر دو كەسان نەددشیا ب ئازادی بهێنە ناڤ باژێری، و مە ب نهێنی كار دكر بەلێ ئەو دئاشكرا بوون، و ماتۆرەكی هاتن و چوون دكر، بۆ وی گوندی و گەلەك جاران ب رێكا وی ماتۆری دەنگوباس و یان هەر تشتەك مە دگەهاندە ئێك و دوو، رۆژ بۆ رۆژێ كاودانێن ئیراقێ تێكچوون و ئێدی شەڕێ ئیراق و ئیرانێ دەستپێكر، و هێدی هێدی گەنج و لاو بەرە ب شەری برن و رۆژانە كوشتی بۆ دایك و بابا ڤەدگوهاستنە ناڤ باژێری و ئێدی چ تام ل ژیانێ دا نەما و گەلەك خەلك رەڤین و قەستا چیاكرن، و چوونە ناڤ پێشمەرگەی و سەقایێ دنیایێ گەلەك نەخوش بوو، بیرا من دهێت وی دەمی ئەم هەر ل سەر بزاڤ و چالاكیێن خوە دبەردەوام بووین، و گەلەك جاران مە ل سەر جادێ دروشم نڤێسین و بەلاڤۆك دهاڤێـنە ئەردی و گەلەك جاران ل هەلكەفتێن خوشی و نەخوشیان دەمێ مە سەردان بۆ دكر، مە بەلاڤووكێن خوە ل گەل خوە دبرن و ئەو بەلاڤووك مە دهاڤێتن وی جهی و ئارمانجا مە هەر هەمی ئەو بوو سەهمەك بۆ حوكمەتێ چ دبیت و بزانیت، بزاڤەكا هەی و پێشمەرگە نەچوویە، بەلكو كوردستان هەر هەمی پێشمەرگەنە، بیرا من دهێت هندەكێن گوندێ مە چەكێ جێش شەعبی دابوونێ وی دەمی دڤیابا چووبایە عەسكەریێ یان جێش شەعبی و ئەوێن گوندێ مە چەك دابوونێ وی دەمی مە رێكخەریەك ل گەل شۆرشێ چێ كر و مە ئاگەهداركرن، ل سەر بابەتی و مە گۆتێ ئەگەر هوون بهێنە ناڤ گوندی هوون دشێن ئەڤان مرۆڤان ژ چەك بكەن، و پێزانین ل سەر هاتن و چوونا ئەوا كەسان هەر هەمی هاتنە كومكرن و دشەڤەكێ دا فەرماندە (سلۆ خدر) خودێ ژێ رازیبت هات و هەر هەمی ژ چەككرن، و كەیفا ئەوان كەسێن ژ چەكرین گەلەك هات، چونكە دناڤ گوندی گەلەك نە محبوب بوون، و دیسا ئەگەر چەك نەراكربان دا حوكمەت بێژیتێ هوون خائینن و راكربان ژی دڤێت چووبانە شەری، و ئەڤجا هاتن (سلو خدر) برنا چەكی گەلەك ئەوان كەیفا وانا پێ هات و گەلەك ژ ئەوان كەسان دمەمنوون بوون، چەكێ وا ژێ هاتیە وەرگرتن، ئەڤە ل سالا 1982 بوو و هەتا (9) تڤەنگان بوون و بتنێ حوكمەتێ چەك كربوو دەستێ ئەڤان كەسان دا، و چ بزاڤێن لەشكری نەبوون، بەلكو دەست نیشانكر بوون بۆ هەر ئەگەرەكێ یان پێدڤیەكێ و ئەڤ كارە هاتەكرن ب هاریاریا كورێ موختارێ گوندی و ئەڤ چالاكیا پێشمەرگەی ب شەڤ هاتە ئەنجامدان.
