جەماوەرێ دلسۆزێ دهۆكێ دێ دیاربیت
حاجی دۆسكی
هەبوونا جەماوەری د ناڤ گورەپانی دا ڕەوشەكا مەزنتر ددەتە وێ یاریێ ب تایبەت ئەگەر فوتبۆل بیت، ئەڤە نێزیكی دو وەرزانە ناڤێ یانەیا دهۆك گەهشتییە دناڤا پترییا خێزانێن پارێزگەها دهۆكی، ژ هەمی ژییان بووینە پشتەڤان كو بۆ جارا ئێكی بوو رێگا یانەیا دهوكێ خێزان ژی قەستا گورەپانێ بكەن ب دەمژمێرا ماینە ل بەردەرگەهێ یانەیێ هەڤڕكی دگەل گەرمێ و سارمایێ كریە پێخەمەت ناڤێ باژیرێ خو، لڤی وەرزی وەكۆ یا دیار ئەنجامێن یانەیێ نە لدووف حەزا وی جەماوەری نە، دەمی گورپانا یانەیا دهۆك د پڕببوو ژ پشتەڤانا ڤێ چەندێ كارتێكرنەكا ئەرینی ل سەر ئاست و دەرونێ یاریزانا هەبوو ئەف هژمارا زور یا جەماوەری د ڤی وەرزی دا ناهێتە دیتن ئەڤە ژی خالەكا نورمالە د ناڤ وەرزشێ دا ب تایبەت یارییا فوتبۆلێ، چەند ئەنجامێن خرابن بەرانبەر دێ ئامادەبوونا پشتەڤانا كێمتر بیت و وەرخنە ژی دی زورتربن، پترییا ڕەخنەین دهێنە ئاراستەكرن دێ خراب بن ژبەر كو ئەو جەماوەرێ ڤان دو وەرزا پەیدابووی حەز دكەت تیما وی هیچ خالەكێ ژ دەست نەدەت ئەڤە ژی مافی وانەیە، ئەو جەماوەر وان كاودانا نزانیت یێ یانە تێدا د بورینیت، هەر چ ئاریشە بیت ئابوری بیت یان شاشیێن كارگێریێ بن لڤێرێ من دڤێت ئاماژێ خالەكێ بدەم ئەو دەستكەفێن بۆ یانەیا دهۆك هاتین ل وەرزێ بوری جەماوەری رولەكێ مەزن هەبوو هەر یانەیەكا ئەڤ پشتەڤانە هەبیت زەحمەت ب كەڤیت، وەكۆ مە ئاماژە پێ دایی ئەنجامێن خراب كارتێكرن ل سەر جەماوەری كریە، تنێ پشكەك هەر یێ ئامادەیە پشتەڤانیا یانەیا خۆ بكەن ئەگەر یانە ل خولا پلا چارێ ژ یاریێ بكەت، ئەڤ پشكا جەماوەری ئەم دشێن بێژینێ دلسۆزێن یانێ ژبەر كو ئەڤ جورە دلسوزە یێن دناڤ هەمی یانەیان دا هەین، هەروسا ئەو كاودانێن یانەیا دهوكی كەتیە تێدا زوربەیا یانەیێن ئیراقێ تێدا دەربازبووینە، لێ مفا ژ وان شاشیان كریە و چارەسەركرینە و دوبارە كەفتینە ل سەر ڕێیەكا دروست نموونە یانەیا شورتە، لڤێری یا فەرە كارگێریا یانەیا دهۆك ئەو ڕەوشا كەتییە تێدا ب رۆنی بۆ جەماوەرێ خۆ ئاشكەرا بكەت هەروسا دیار بكەت ل ڤەگوهاستنێن زڤستانێ دێ چ هێتە كرن.
