بۆچی یاریزانێن خولا كوردستانێ كرێكاریێ دكەن؟
حاجی دۆسكی
ڕاستە ئەو كاودانێن ل سەر هەرێما كوردستانی دا هاتین تایبەت پشتی سالا 2014 كارتێكرن ل هەمی سەكتەرێن ژیانێ كر و پشكەكا وێ ژ وەرزشێ ژی گرت، هەمی یانە تووشی ئاریشەیێن دارایی بوون و حكومەتا هەرێما شیانێن خەرجكرنێ نەما، بەری ڤێ قەیرانێ بزاڤا وەرزشی ل كوردستانێ دیمەنەكێ گرنك ل ژیانا یاریزاناندا دروست كربوو تایبەت چالاكیین فدراسیونا فوتبۆلا كوردستانێ و هەڤڕكیێن بهێز دناڤا خولان دا هەبوو، ژیانا پترییا یاریزانان لسەر مووچە و گربەستێن ڤێ خولێ بوون دیسان دەرگەهەكێ پێگەهاندنا یاریزانان بۆ لالیگا ئێراقێ و هەلبژارتیێ ڤی وەلاتی ژی نموونە دزورن وەكو هارون ئەحمەد، ئاكام هاشم، ئەحمەد زێرو و ئاسو روستەم، بەلی ڤان چار سالێن دووماهی خولا كوردستانێ هەیبەتا جاران نەمایە ئێدی جەماوەر ئامەدەنابیت ئاستێ خولێ پاشڤەچوو و گەهشتە وی ڕادەیی یاریزان بەر ب یانەیێن خولا ئێراقێ بچن ل ئاستێ نزم وەكۆ پلا نایاب و ئێك، پشكەك ژی بەر ب كرێكاریێ ئەڤەژی ڕامانا وی ئەو نینە ئێدی یاریێ ناكەت یان ژیێ وی مەزن بوویە، ژئەنجامێ باری، بەلكۆ ئێدی داهاتێ خولا هەرێمێ ژیانا خێزانا دابین ناكەت لەورا نەچارە ببیتە كرێكار وەكۆ هاتیە دیاركرن باشترین گولپارێزەكێ خولا كوردستانێ ل خارنگەهەكێ كاردكەت، پێنەڤێت هەر كارەكی دەستپاكی تێدا جهێ سەربلندیی یە، ئەگەر یاریزان هەست بكەت گریبەستا وی دێ ژیانا وی مسوگەركەت دێ گرنگیێ ب وەرزشێ دەت، ئەڤ كاودانە پەیدابوو ژ ئەگەرێ كێمبوونا گرێبەست و نە پشتەڤانییا یانە و دەزگەهێن وەرزشی لەوارا یاریزان نەچاربیت بەر ب كرێكاریێ بچیت كو كارتیكرنێ ل سەر ئاستێ یاریزان هەبیت ژوانا جەستی، ئەگەر فدارسیونا كوردستانێ حەز هەبیت خولەكا بهێز و ئاستێ یاریزانان باشتر بكەت بێدڤییە گرنگیێ بدەتە داهاتی یاریزانان تایبەت گرێبەستێن وان گەلەك یانە هەنە نەشین مووچێ یاریزانی دابینبكەت یان پارین گەشتەكی بۆ باژێرەكێ دی تەرخانبكەن، ئەڤ خالە دبنە ئەگەر یاریزان بەر ب كرێكاریێ بچیت، دڤێت فدارسیۆنا كوردستانێ هەمی بزاڤان بكەت بودجەیا خۆ مسوگەربكەت پاشی خولەكێ ڕێكبێخیت و دیاریێن دارایی بۆ یاریزانی ل هەر قووناغەكی دا تەرخانبكەت نموونە باشترین یاریزان ،باشترین گولپارێز، جوانترین گول، باشترین دادڤان و باشترین ڕاهێنەر، بڤێ ڕێكێ یاریزان دێ هەست ب پووتەدانێ كەت، دنوكە دا پترییا یاریزانان بێ هیڤیی نە ئەگەر ناسناڤێ خولێ ژی بدەستڤە بینن دبیت دیارییەكا بتنێ 30 هزار دیناران وەربگریت، بلا چو خول نەهێنە برێڤەبرن بێ بودجە و چو یانە پشكدارنەبن كو مەزاختیێ هوتیلێ نەبیت، نموونەك دەف من هەیە یانەك بۆ ئەنجامدانا یارییەكا دەرڤەیی پارێزگەهێ ژبەر نەبوونا پارێ هۆتێلێ ل باخجەكی دا ئاكنجیبوون، ژ دەرڤەی باژێری یاریزان دێ بیتە كریكار دەمێ كارگێری بێژیتە یاریزانێ خۆ ب كۆژمەیێ پێنج هزار دیناران بتنێ مافێ خارنێ یا هەی ئەڤە ژی یاریزان هەست ب كێماسیێ دكەت.
