حەسەن شەریفی كلیپا (عیسێ دەلا) بەلاڤكر
زنار تۆڤی:
هونەرمەند حەسەن شەریفی، كلیپا عیسێ دەلا بەلاڤكر، كو بۆ دەمەكێ درێژبوو وی كار ل سەر كلیپكرنا وێ سترانێ كرییە، د دیدارەكێ دا بۆ رۆژناما ئەڤرۆ دیاركر: پەیڤێن سترانا عیسێ دەلا یێن هەلبەستڤان ئەدیب چەلكی نە، ئاوازا وێ سترانێ من دانایە و ب رەنگەكێ گەلەك جوان من ئەو سترانە گۆتیە، هەروەسا ستۆدیۆ و كارێ میكسێ و ماسترینكێ و ئارانژێ ژ لایێ هونەرمەند هارۆن ئەلكی ڤە هاتینە كرن، كارێ دەرهێنانا كلیپێ ژی ژلایێ دەرهێنەر كامیران بێتاسی ڤە هاتییە و گۆڤەند ژی ژلایێ كۆما باتیفا یا هونەری ڤە هاتیە كرن و سۆپاسیێن بێ سنۆر بۆ سپۆنسەرێن ڤی كاری دكەم.
ناڤهاتی گۆت: وەلات شەریف و شامیران چەلكی و كازم حاجی، وەكو ئەكتەر پشكداری د ڤێ كلیپێ دا كریە، هەروەسا حەسەن حاجی و بێوار نوری و محەمەد ماجدی كارێ وێنەگرتنێ بۆ ڤێ كلیپێ كریە، كلیپ ب رەنگەكێ گەلەك جوان و ب رەنگەكێ داستانی ل دەڤەرا ئامێدیێ هاتیە چێكرن و ئەڤ سترانە ل سەر مەقامێ بەیات من چێكریە، ریتمێ سترانێ سی چار جاران دهێتە گۆهاڕتن، لاوكەك ژی تێدا هەیە، كو ژ بۆ خاترا حەمكێ تۆڤی و دەنگبێژیا ڤێ دەڤەرێ بهێتە بیرا مە من گۆتیە، ئەز هیڤیدارم من شیابیت خزمەتا كلتۆرێ كوردی و یێ ڤێ دەڤەرێ كربیت، دیسان هونەرمەند هاۆن ئەلكی گەلەك هایكاریا من كریە و سۆپاسیا وان هەموو هونەرمەند و ئەكتەران دكەم، یێن كو پشكداری د ڤی كاری دا كری.
