كەلوپەلێن كۆمپانیێن هەرێمێ ل بەندەرێ ئوم قەسر هاتینە ڕاگرتن
دهۆك، دلۆڤان ئاكرەیی:
سەرۆكێ ژوورا بازرگانییا دهۆكێ دیاركرن ل 1ی كانوونا دووێ یا 2026ـێ و پێڤە، هەر بازڕگانەكێ هەرێما كوردستانێ خۆ د سیستەمێ ئەسیكۆدێ دا تۆمار نەكەت، دێ ژ وەرگرتنا دۆلاری ب بهایێ فەرمی بێ بەهر بیت و نەشێت كەلوپەلان بینیتە ئیراقێ و هەرێما كوردستانێ.
شوكری جەمیل، سەرۆكێ ژوورا بازرگانییا دهۆكێ بۆ رۆژنامەیا ئەڤرۆ گۆت: «بەری نوكە داخواز ژ بازرگانان دهاتە كرن، پشتگیریێ ژ بەغدا بینن، لێ سەرباری تەمامكرنا ڕێكاران، تێبینی دهێتە كرن، كو ئەڤ بڕیارە بڕیارەكا سیاسی یە و ئارمانج ژێ سنۆرداركرنا ئابوورییا هەرێما كوردستانێ یە».
ناڤبری ئاشكرا ژی كر، ل 3ی كانوونا ئێکێ وەرە كەلوپەلێن كۆمپانیێن هەرێمێ ل بەندەرێ ئوم قەسر هاتینە ڕاگرتن، لەوڕا داخوازێ ژ حوكمەتا هەرێما كوردستانێ و حوكمەتا ئیراقێ دكەن ل سەر ڤێ پرسێ بگەهنە ڕێككەفتنێ، دا كو بازڕگان تووشی زیانێن زێدەتر نەبن.
