ئێكەمین فێستیڤالا فلمێن مۆبایلێ ل كەركووكێ دێ هێتە گێڕان
زنار تۆڤی:
ل سەنتەرێ رەوشەنبیری یێ كەركووكێ، پشتی برێڤەچوونا ووركشۆپەكا ئێك هەیڤی بۆ فلمسازان، ئێكەمین فێستیڤالا فلمێن مۆبایلێ بۆ چەندین فلمێن هەلبژارتی ب مۆبایلێ دێ هێتە گێڕان.
نەژاد نەجم، سەرپەرشتێ وێ فێستیڤالێ، بۆ رۆژناما ئەڤرۆ دیار كركو پشكا چالاكییان ل سەنتەرێ رەوشەنبیری یێ كەركووكێ، پشتی نێزیكی هەیڤەكێ ژ ئەنجامدانا ووركشۆپەكێ، ژلایێ فلمساز سەركەوت تارق، كو ژ دەرڤەیی وەلاتی ڤەگەریایە كوردستانێ، ووركشۆپەك بۆ 21 قوتابیان ڤەكربوو، كو سێ ژ وان قوتابیان ب شێوێ ئۆنلاین ژ ئیرانێ و باژێرێن دی یێن كوردستانێ پشكدار بووینە، هەروەسا 17 قوتابیان د ماوێ هەیڤەكێ دا ب شێوەكێ راستی و رۆژانە پتر ژ 35 فلمان دروست كرینە، ژ وان 35 فلمان، 25 فلم هاتینە جوداكرن، دێ هندەك فلمێن دیتر ژی هێنە لادان داكو ب تنێ باشترین فلم بۆ وێ فێستیڤالێ هێنە هەلبژارتن، د وێ فێستیڤالێ دا ئەم دێ فەرشێ سۆر بۆ قوتابیان دانین و ئاهەنگەكێ ژی دێ بۆ وان گێڕین، دێ پشتەڤانیا وان كەین داكو ل پاشەرۆژێ د بەردەوام بن ل سەر چیكرنا فلمێن مۆبایلێ، چونكی ئەو فلم ب مۆبایلێ هاتینە وێنەكرن و هەموو ئەكتەری ژی ژلایێ وان ب خۆ ڤە هاتییە كرن.
هەروەسا گۆت: د ڤێ فێستیڤالێ دا ل ژێر درۆشمێ (دا كەركووكێ بكەینە جوانترین باژێر) كار ل سەر شوینوار و ژینگەهێ دهێتە كرن، ئەم وەكو هونەرمەند ژی پشتەڤانییا پاقژیا كەركووكێ دكەین بۆ جوانتركرنا باژێری، هەروەسا فلمساز ژی ب گرنگیەكا مەزنڤە بەرێ خۆ ددەنە ڤێ فێستیڤالێ و هیڤیدارین مفا تێدا هەبیت، وەسا بڕیارە ل رۆژا دوشەمبی 19 كانوونا دویێ یا 2026 ێ، ل سەنتەرێ رەوشەنبیری یێ كەركووكێ بهێتە گێڕان.
