بۆ جارا ئێكێ ل سەر ئاستێ هەرێمێ و ئیراقێ پەرتووكەك ل دۆر كورتە بالایان هاتە چاپكرن
دلۆڤان هالۆ:
نڤیسەر (نەسیبا یاسین نێروەیی) د دیدارەكێ دا بۆ رۆژنامەیا ئەڤرۆ گۆت: پشتی وەستیانەكا زۆر ل رۆژێن بۆری پەرتووكا من یا ئێكێ ل ژێر ناڤێ (كورتە بالا د هەمبێزا ژیانێ دا) كەفتە بەردەستێن خواندەڤان و ئەڤە جارا ئێكێ یە ل سەر ئاستێ هەرێما كوردستانێ و ئیراقێ پەرتووكەكا ژڤی جۆری دهێتە بەلاڤكرن.
هەروەسا گۆت: دڤێ پەرتووكێ دا من ب تێروتەسەلی و ب نموونە و وێنەڤە بەحسێ ئەگەرێن مرۆڤێن كورتە بالا، هەروەسا گیانەوەر و رۆەكێن كورتە بالا ژی كریە، كو بەری نوكە رەنگە كێم كەسان دزانی كو رۆەك و گیانەوەرێن كورتە بالا هەنە، بۆ زانین ل تیرمەها 2023 من دەست ب نڤیسینا ڤێ پەرتووكێ كربوو، د دەمێ دوسالان دا من ب دووماهی ئینا و ل دەستپێكا ئەڤ سالە من چاپكر و بەلاڤكر.
