پشكدارییا گرۆپێن چەكدار د حوكمەتا نوو دا دێ ئیراقێ تووشی سزایێن ئابۆری یێن ئەمریكا كەت
ل دووڤ راپۆرتەكا تۆرا رووسی، ئەمریكا هۆشدارییەكا توند ئاراستەی بەغدایێ كریە و گەفا سەپاندنا سزایێ ئابۆریێ گشتگیر دكەت هەكە گرۆپێن چەكدارێن سەر ب ئیرانێ ڤە د حوكمەتا داهاتییا ئیراقێدا جه هەبیت.
واشنتۆنێ دوپات كریە كو هێلا سۆر یا وان پشكداریپێكرنا هەر كەسایەتییەكێ وەلائییە د كابینەیا نوو یا حوكمەتا ئیراقێدا و بۆ ڤێ مەبەستێ ژی یا بەرهەڤە دەست ب سەر داهاتێن پەترۆلی یێن ئیراقێ بگریت كو ل بەنكا یەدەكا فیدرالی ل نیویۆرك د پاراستی نە، ئەڤە ژی وەك لێدانەك ل شادەمارێ سەرەكیێ دارایێ وەلاتی دهێتە هەژمارتن.
ئەڤ گڤاشتێن ئەمریكا د وەختەكیدایە كو ناڤمالا شیعی گوهۆڕینێن دراماتیكی ب خوەڤە دیتینە، محەمەد شیاع سوودانی ب شێوەیەكێ چاڤەڕێنەكری و بۆ كێمكرنا ناكۆكیێن د ناڤا چارچۆڤەیێ هەماهەنگیێدا، دەستبەرداری مافێ پێكئینانا حوكمەتا نوو بوویە بۆ نووری مالكی وەك بەربژارێ نوو.
ئەڤ پێنگاڤا محەمەد شیاع سوودانی، سەرەرای هەڤڕكیێن دیرۆكی یێن وی ل گەل نووری مالكی، ئالۆزیێن ل پێشبەری بەغدایێ زێدەتر كرینە، چونكە ئیراق د ناڤبەرا مەرجێن توند یێن ئیدارەیا دۆنالد ترەمپی و بزاڤێن ئالیێن نیزێك ژ تەهرانێ بۆ كۆنترۆلكرنا دەستهەلاتێ دایە، ئەڤە ژی مەترسییەكا راستەوخوە ل سەر ئارامییا ئابۆری و سیاسییا ئیراقێ ل سالا 2026 دروست دكەت».
