میلێ تەمبەل
مێهڤان چێی
ئاها ئەڤە ئەو كۆلانە، ئەو كولانا هەمی تشت تێدا د بەرەڤاژی، ل ڤێرێ خوە دەمژمێر ژی ب ئێك ریتم كارناكەن، هندەك بلەزن، هندەك ب لڤینەكا ناڤین دمەشن، هندەك ژی هند د گرانن ب زۆری میلێن تەمبەل یێن هژمارتنا چركەیان ژ جهێن خوە د لڤن.
ئەڤە ئەو كۆلانە یا تێدا مرۆڤایەتی و هەر بهایەكێ خودان ڕویمەت وەكی تاوانبارەكێ داخازكری سەرەدەری دگەلدا دهێتە كرن، لەورا ژی ب ترس و لەرز و ب نهێنی ڤە ژ پشت ڤی دیواری بو پشت یێ دی و ل دویری مرۆڤان هەبونا خوە د دومینن.
ئەڤە نە رەوشەكا تایبەتە ب ڤێ كۆلانێڤە ، بەلكو ئەگەر چاڤێن وژدانا د كۆرە نەبن دێ ل هەمی واران راستەرێی میناكێن ڤان كۆلانا بن.
ئەڤ كۆلانە دناڤ خوە دا چەند تەخەكێن زیندی یا یێن جودا د هەستپێكرنێدا دحەوینن، هندەك ژ وان ب تنێ چاڤێن وان د ڤەكرینە و مرادا وانە دێمەكێ ب گڕنژین ببینن، هندەكا بتنێ گوهێن وان كار دكەن و ل هیڤییا گوهلێبونا دەنگێ مەكینێن ترۆمبێلانن ب هیڤیا هندێ كو جارەكا دی بەرچێلكێن خوە ب خارنەكا سادە ب گڕنژینن، هندەكێن دی وەكی بەرخێن بربوویی هەر ژ سپێدێ تاكو ئێڤاری ب دەنگەكێ مەلویل دهارێن و هەوارێن خوە بو گوهێن كەر دشینن.
ژبلی ڤانە، دڤێ كۆلانێ دا هەرگاڤ خودانێن زكێن مەزن، رویباتێن شۆڕ و دفنێن درێژ یێن كو خوە ب رزگاركەر دزانن دهێنە دیتن، بەلێ دناڤ ڤێ خەپسێ هەمییێ دا، كەسەك نەدشیا گازیێن د چاڤێن وێ دایكا گەنج یا ل بنێ كۆلانێ تەنشت وی دیوارێ تەزی و ل سەر پێیێن وێ سێ زارۆكێن نیڤ زیندی و برسی د ڕازایی گوهلێ ببن.
ب دەمژمێرایە چاڤێن وێ ل رێكێ، كا دێ كەنگی ئەو كارتۆنێن تژی كەل و پەل و ئەو نانێن نەرم ل سەر وان ئێنە پارڤەكرن، كەسێ نەدزانی ئەڤ هەمی ترۆمبێل، رێكخراو، سازیێن میری و دەزگەهێن خێرخوازی چاڤەرێی كێ نە و بۆچی هاریكاریان دابەش ناكەن، تا كو ئەو ژنا گەنج ب رێكەفت بوویە دیدەڤانا پەیوەندییەكا تەلەفۆنی یا كو ل نێزیك وێ دهاتە كرن، هەر چەندە خودانێ پەیوەندییێ ب دەنگەكێ نزم دئاخفت بەلێ وێ شیا گوه ل ڤان رستەیێن دژوار ببیت: “سەیدا رێك نائێتە دان ئەڤرۆ دەزگەهێن راگەهاندنێ، كەنال، وێنەگر و رۆنامەڤان ئامادەببن “
پشتی ڤێ و د دەمەكێ كێم دا ئەو هەمی دەزگەه ، ترۆمبیل، كەنال و بەرپرسێن ل وێرێ ئامادەبووی ئێك ئێكە دەست ب لڤینێن بجه هێلانا كۆلانێ كرن.