ئەمریکا چاڤدێریا رێککەفتنا مە ل گەل شامێ دکەت
فەرماندارێ هەسەدێ دیار دکەت وەزیرێ دەرڤە یێ ئەمریکا پشتەڤانیا خوە بۆ رێککەفتنا وان ل گەل شامێ دیار کریە و داخواز کریە هەر دو ئالی کار بکەن دا رێککەفتن وەکو خوە بهێتە بجهئینان و ئەمریکا ناخوازیت چو ئالۆزیێن نوو ل سووریێ روو بدەن.
مەزلوم عهبدی فهرماندارێ گشتی یێ هێزێن سووریا دیموکرات و مارکۆ رۆبیۆ وهزیرێ دهرڤه یێ ئهمریکا د چارچۆڤەیێ کۆنفرانسێ ئاسایشێ یێ میونشنێ دا ب بهرههڤبوونا ئهسەد شهیبانی وەزیرێ دەرڤە یێ سووریێ کۆمبوون. د کۆمبوونێ دا رهوشا سووریێ و رۆژئاڤایێ کوردستانێ هاته گهنگهشه کرن و بەحسێ رێککەفتنا ڤێ دووماهیێ یا د ناڤبەرا شامێ و هەسەدێ دا هاتە کرن.
مارکۆ رۆبیۆ د کۆمبوونێ دا راگههاند کو وەکو ئەمریکا ئەو پشتەڤانیێ ل رێککەفتنا د ناڤبەرا شامێ و هەسەدێ دا دکەن و ئەمریکا داخواز ژ هەر دو ئالیان ژی دکەت کو ب هەموو هێزا خوە کار بکەن دا رێککەفتن وەکو خوە بهێتە بجهئینان و چو ئاریشە روو نەدەن، چونکی ئەمریکا نەڤێت چو ئاریشەیێن نوو ل سووریێ روو بدەن و گرنگە هەر دو ئالی کار بکەن دا رەوشا سووریێ ئارام بیت.
مەزلوم عەبدی فەرماندارێ گشتی یێ هەسەدێ ژی د کۆمبوونێ دا دیار کر، وان دڤێت رێککەفتن وەکو خوە بهێتە بجهئینان، لێ د هەمان دەمی دا هندەک ئاریشە هەنە کو هێزێن شەر ب شامێ دروست دکەن و دڤێت شام رێگریێ ل وان هێزان بکەت، هەروەسا سازیێن رێڤەبەریا خوەسەر ژی دڤێت وەکو سازی بمینن و کارێن خوە بکەن، گرنگە شام رێزێ ل وان سازیان و کارێ وان بگریت.
ل ئالیێ دی گەلەک ژ دەزگەهێن راگەهاندنا ئەمریکا و ئۆرۆپا پشکداریا فهرماندارێ گشتی یێ هێزێن سووریا دیموکرات و ئیلهام ئەحمەد ههڤسهرۆکا ئۆفیسا دهرڤه یا رێڤهبهریا خوهسهر یا رۆژئاڤایێ کوردستانێ ل کۆنفرانسێ موینشنێ دا وهک دهستپێکا دانپێدانا ئۆرۆپا ب رۆژئاڤایێ کوردستانێ دبینن و دەزگەهێن راگەهاندنا ئەلمانیا ژی دیار دکەن کو هێدی هێدی وەلاتێن ئێکەتیا ئۆرۆپا هەرێما رۆژئاڤایێ کوردستانێ قەبوول دکەن و ئەو یەک ژی بۆ ئارامیا سووریێ گەلەک گرنگە، چونکی بەری نها پەرلەمانێ ئێکەتیا ئۆرۆپا ژی داخواز کربوو کو ب هەموو رەنگەکێ کار بۆ پاراستنا کوردان ل سووریێ بهێتە کرن.
ل ئالیێ دی چاڤدێرێن سیاسی بەحسێ رۆلێ کاریگەر یێ بەرێز نێچیرڤان بارزانی سەرۆکێ هەرێما کوردستانێ د بیاڤێ دبلۆماسیێ دا بۆ رۆژئاڤایێ کوردستانێ دکەن و ئاماژە ب ڤێ یەکێ دکەن، کو سەرۆکێ هەرێما کوردستانێ نها رۆلەک گەلەک مەزن و کاریگەر دگێریت دا ئەمریکا و وەلاتێن ئێکەتیا ئۆرۆپا پشتەڤانیێ ل مافێن کوردان ل سووریێ بکەن و پشکداریا فەرماندارێ هەسەدێ ژی هەر ب پشتەڤانیا سەرۆکێ هەرێما کوردستانێ بوویە و نها پتر ژ هەر دەمەکێ کورد د ناڤ خوە دا ئێکگرتی نە و ئەو یەک ژی بوویە جهێ دلخوەشیا هەموو کوردان ل جیهانێ.
