تیپا دهۆكێ یا هونەرێ مللی پشکداری فیستەڤالەکا هندستانێ بوو
زاخۆ، دلۆڤان هالۆ:
ئەحمەد مشەختی، بەرپرسێ تیپا دهۆك یا هونەرێ مللی د دیدارەکێ دا بۆ ڕۆژناما ئەڤرۆ دیارکر کو ل دووڤ داخوازنامەکا تایبەت ژ وەلاتێ هندستانێ و ل دووڤ بریارا وەزارەتا ڕەوشەنبیری یا حکومەتا هەرێما کوردستانێ و ڕێڤەبەریا گشتی یا ڕەوشەنبیری و هونەری یا دهۆك، ب خۆشحالی ڤە ئەم وەکو تیپا دهۆك یا هونەرێ مللی ب نوونەراتیا ئیراقێ هاتینە هەلبژارتن کو پشکداریێ د 39ەمین ڤیستەڤالا سۆراجکۆند ل باژێڕێ فریاد ئاباد ل وەلاتێ هندستانێ دا بکەین، کو ئەڤ ڤیستەڤالە بۆ ماوێ 15 ڕۆژان یا بەردەوام بوو.
ناڤهاتی ئاماژە ب وێ چەندێ ژی کر کو شاندێ تیپا مە بۆ وەلاتێ هندستانێ ژ 13 کەسان پێك هاتبوو کو نوونەرێ حکومەتا هەرێما کوردستانێ و نوونەرێ وەزارەتا رەوشەنبیری ژی لگەل مە بوون، ٤٤ وەلات و 600 هونەرمەندێن ئاست بلند ل سەر ئاستێ جیهانێ دڤێ ڤیستەڤالێ دا پشکداربوون، و ئەڤ ڤیستەڤالە ژ دوو بەشێن سەرەکی پێك هاتبوو کو بەشەکێ وێ نیشاندانا پێرفۆنمانسابوو ل سەر دەپێ شانوویێ کو تابلۆیێن هەمەجۆر و جلوبەرگ و مۆزیك و سەمایێن تایبەت دهاتنە نیشاندان، و بەشێ دووێ ژی ڕێپیڤان بوو کو هەموو ڕۆژان دهاتە ئەنجامدان، و ڕێژەکا زۆر یا خەلکی پشکداری ڤان ڕێپیڤانان بوون، هەم هونەرمەند و هەم خەلکێ گشتی، هەتا ١٥/٢/٢٠٢٦ چالاکیێن مە د ڤێ ڤیستەڤالێ دا بەردەوام بوون، کو ب پرۆگرامەکێ تێرو تەسەل ژ دەمژمێر ٨ی سپێدێ هەتا کو ٨ی شەڤ بەردەوام بزاڤ و چالاکیێن جۆراو جۆر دهاتنە ئەنجامدان.
گۆت ژی:»ل دووڤ بریارا ڤیستەڤالێ تیپا مە ب کارێن دەستی یێن مافۆرێن ڕێڤەبەریا مەحفیرێن دەستکرد یێ سەر ب ڕێڤەبەریا ڕەشەنبیری و هونەری یا دهۆکێ پشکداری د بازارەکێ ڤەکری یێ ڤیستەڤالێ دا کر، بێ گۆمان هەر ڤیستەڤالەکێ تایبەتمەندیا خۆ هەیە، لەورا ڤێ ڤیستەڤالێ ژی دوو تایبەتمەندی هەبوون، کو ئەڤ ڤیستەڤالە ژ هەموو ڤیستەڤالێن دی یێن جیهانێ جوودا کربوو، یا ئێکێ جهێ سەرسورمانێ و سەرنج ڕاکێشانێ بوو کو ڕێژەکا زۆر یا تیپێن هونەری ب شێوەیەکێ برێك و پێك و ڕێکخستی د ڤێ ڤیستەڤالێ پشکداربوون، لەورا ب ڕێکا ڕۆژناما ئەڤرۆ ئەم سۆپاسیەکا تایبەت ئاراستەی ڕێکخەرێن ڤێ ڤیستەڤالێ دکەین، خالا دووێ یا سەرنجا مە ڕاکێشایی ئەڤە ئێکەم ڤیستەڤال و وەلاتە ئەم بشێن وەکو کورد گەلەك ب ئازادانە سەرەدەریێ بکەین و ئالایێ کوردستانێ بلند بکەین، کو ئەم پەیاما کوردبوونا خۆ بگەهینین، ژبەر هندێ وەلاتێ هندستانێ ب تایبەت ڤێ ڤیستەڤالێ سەلماند کو ڤیستەڤالەکا پڕی ئازادی یا ڕادەربرینێ یە کو هەموو ئۆل و نەتەوە و پێکهاتەیان بێ جیاوازی خۆ تێدا د دیت».
زێدەتر ژی گۆت:»ئەم سۆپاسیا حکومەتا هەرێما کوردستانێ و ڕێڤەبەریا گشتی یا ڕەوشەنبیری و هونەری یا دهۆکێ دکەین، هەر دیسان سۆپاسیەکا بێ سنۆر بۆ دکتۆر عەلی تەتەر پارێزگارێ دهۆکێ بۆ پشتەڤانیا وی یا بەردەوام لگەل تیپا مە کو ژبەری ئەم بچینە وەلاتێ هندستانێ پێشوازی ل مە کربوو و ئەم پێکڤە ڕوونشتبووین، هەموو دەرگەهێن هاریکاریێ ل مە ڤەکرن و دیارکر کو پشتەڤانێ مەیە و دووپات ل وێ چەندێ ژی کر کو تیپا دهۆك یا هونەرێ مللی جهێ شانازیا پارێزگەها دهۆکێ یە و هەر تشتێ پێدڤی دێ بۆ وان کەین، و جامێری تەخسیری نەکریە».
