مالا مە وەكی بنگەهەكێ ساخلەمیێ بوو، بریندارێن پێشمەرگەی دەرمان دکـرن
دیدار: رەمەزان دەشتمری / زاخۆ
4-6
لەشكرێ حكومەتا ئیراقێ تەقە ل پێشمەرگەیی دكر و هەر وەسا فروكەیێن هەلیكوپتەران ژی ل سەر سەرێ پێشمەرگەیی دزڤرین و تەقە ل پێشمەرگەیی دكرن، ئەڤی شەڕی هەتا دەمژمێر چواری ئیڤاری ڤەكێشا و لەشكرێ حكومەتا ئیراقێ پاشدا زڤڕی و جارەكادیتر بۆ فرقەیا زاخۆ چوون. بەلێ ب مختابنی ڤە د ئەڤی شەڕێ سینگ و سینگ دا پێشمەرگەیەك ب ناڤێ ئیسماعیل مچولی هات شەهید كرن. هەر وەسا هەژمارا پازدە پێشمەرگەیان ژی هاتن برینداركرن، بەلێ بریندارێن پێشمەرگەیی بۆ ئەوان گوندێن دەڤەرا بەر ئاڤا ڕویبارێ خابیری ئینان و ل ناف مالان دا دابەشكرن. پێشمەرگەیەك ب ناڤێ فازل عەلی چەمباهیڤی بریندارێ ئەوی شەڕی بی و بۆ مالا مە ئینان، ئەڤ پێشمەرگەیێ بریندار و دگەل نوشدارێ شۆڕشێ و دگەل پێشمەرگەیەك دیتر ئەڤێ دگەل فازل عەلی دناڤ مالا مەدا مان و مەژی سەرەگوهیا ئەوان دكرن و ڕۆژانە برینا لاشێ ئەوان دهات دەرمانكرن. هەر وەسا مالا مە وەكی دایكا من و خێزان وخویشك و ژنبرایێن من خوارن هەرسێ دانان بەرهەڤ دكرن و جل و بەرگێن پێشمەرگەیی دشویشتن. مە هوسا خزمەتا بریندارێن پێشمەرگەیی بۆ ماوێ چل و شەش ڕۆژان ئەڤ پێشمەرگە ما دناڤ مالا مەدا. ڤێجا دەمێ ژ مالامە چووین و خاترا خۆە ژ مە خواستین باوەربكەن مە وەسا هیێ خۆە دابی ئەڤان مروڤان و ئەم بۆ ئێك و دوو گرین. هەر وەسا ل بهارا سالا 1984ی پێشمەرگەیەك دیتر ب ناڤێ حەسەن ئەحمەد هەورێزێ بۆ ماوێ بیست و پێنج ڕۆژان ل مالا مەبی ئەوژی مە سەرگوهیا ئەوی دكر هەتا برینێن لاشێ وی ساخبین.
هەر دیسان پێشمەرگەیێ شۆڕشا گولانێ محەمەد تاهر بەرزیركی دبێژت: ل ڕۆژا 24/8/1984ی هێزەكا مەزن ژ لەشكرێ حكومەتا ئیراقێ و ب هاریكاریا فەوجێن جاشان هێرش بۆ سەر بارەگایێ لیژنا زاخۆ و بارەگایێ لیژنا ناوچا دهوكێ ڤە ئینان و شەرێ هەری مەزن كەفتە گوندێ ئەرمشتێ و پشتا گوندێ زێوكا عەبو و گوندێ ناڤشكێ و بانیا گونجێ ئوزمانا و ئەڤێ شەڕی هەتا ڕۆژا 29/8/1984ێ ڤەكێشا و بریندارێن پێشمەرگەیی بۆ دەڤەرێ ئینان و ئێك ژ پێشمەرگەیێن بریندار ب ناڤێ حسێن رەمەزان یێ ناسیار ب ئەبو شەعبو ئینان مالا مە دا چارەسەریا ئەوی بێت كرن. ئەڤ پێشمەرگەیێ بریندار ئەبو شەعبو بۆ ماوێ بیست و هەشت ڕۆژان ل ناڤ مالامەدا ما و هەتا برینێن لاشێ وی ساخبین و هەروەسا خەلكێ دەڤەرێ ئەوێن ل ناڤ شۆڕشێ دا ماین خزمەتا پێشمەرگەیێ بریندار دكرن و دناڤ مالێن خۆە دا ڤەدحواندندن. هەر وەسا دەما پێشمەرگەیەك نەخوش كەتبا ماوێ دوو هەتا پێنج ڕۆژان دا ل ناڤ مالێن مەدا دمان و مە سەرەگوهیا ئەوان دكرن و مە دگوت: ئەڤە پێشمەرگەینە و یێ خزمەتێ بۆ ئەڤی مللەتی دكەن و هەر وەسا ئەمژی دێ خزمەتا ئەوان كین دا هەست ب چ كێماتی و خەربیا مالێ نەكن و هەمی دەمان مورالا ئەوان یا بەرز و بلند بیت. ئەڤجا مە هندی خزمەت و تێكەلیا پێشمەركەیی دكر و من گەلەك حەز كر كو ئەز ژی بچم ببمە پێشمەرگە و خەباتێ بۆ مللەتێ خۆە بكەین، ل پایزا سالا 1983ی ئەز بۆ بابەگایێ لیژنا ناوچا زاخۆ چووم، ل ئەوی دەمی بارەگایێ لیژنا ناوچا زاخۆ ژ دەڤەرا حەفتەنینێ بۆ گەلیێ هاروینا ل چیایێ سپی هاتبی ڤەگوهاستن. دەمێ ئەز گەهشتیم بارەگایێ لیژنا زاخۆ ل ئەوی دەمی بەرێز فوئاد میرانی بەرپرسێ لیژنا ناوچا زاخۆ بی. دەمێ من فورما پێشمەرگایەتیێ پڕكری و ژبەر خزمەتا من یا ڕێكخستنا نهێنی و بەرنیاسی یا بنەمالامە ل ناڤ شۆڕشێ هەر ئێكسەر ئەز وەك پێشمەرگە هاتم وەرگرتن و ئەركێ من یێ پێشمەرگایەتیێ دگەل ڕێكخراوا بارەگایێ لیژنێ و هەر وەسا لیژنا ناوچا زاخۆ چەكەك ژ جورێ سمینوف دگەل ڕەختەك فیشەكان دانە من ئەز ل بارەگایێ لیژنێ مام. پشتی بورینا هەیڤەكێ شەهید محو گەودا بۆ بارەگایێ لیژنێ هات كو ئەز دیتم كو پێشمەرگە مە. هەر ئێكەسەر شەهید محو گەودا داخواز ژ لیژنێ كر و گوتە كاك فوئاد میرانی دڤێت هوین ئەڤی پێشمەرگەیی كو بەحسێ من كو هوین بۆ رێكخراوا مە ڤەگوهێزن. ئەوبی لیژنا ناوچا زاخۆ بڕیاردا كو ئەز ژ بارەگایێ لیژنا ناوچا زاخۆ بۆ ڕێكخراوا سەهید مەحمود یوسف یا بەرپرسێ وێ شەهید محو گەودا هاتم ڤەگوهاستن. هەر دەملدەست ئەز ب چەكا خۆ یا سمینوفێ ڤە هاتم ڤەگوهاستن و ئەم بۆ جەولێ هاتین ڤێجا دا ب شەڤێ بۆ ناڤ گوندێن دەڤەرێ چین و هەر دوو پێشمەرگە ل مالەكێ دبینە مێهڤان و ل دەمێ خەوێ دا جهەكێ خڕڤەبین و نوبەتێ گرین هەتا بەری سپێدێ دا ژ ناڤ گوندی دەركەڤین و بۆ هەشارێ چین. ڤێجا ئەو مالا پێشمەرگە لێ ببایە مێهڤان دا خوارنا تێشت و فراڤینا بۆ بەرهەڤ بكەن و ئەوێ مە دكرە دجانتێ خۆەدا و دەمێ ئەم ژ ناڤ گوندێ دەركەفتبان و دا هەر پێشمەرگەیك جانتێ خۆە یێ نانی دەتە ملێ خۆە بۆ جهێ خۆە یێ هشارێ چین و دوو پێشمەرگە دا هنداڤی پێشمەرگەیی زێرەڤانیێ گرن و تەماشەیی ڕەوشا دەڤەرێ كەن. ژبەر كو هندەك جاران هێرشا لەشكرێ حكومەتا ئیراقێ یان فروكەیێن هەلیكوپتەر بۆ سەر دەڤەرێ دهاتن و پێشمەرگەیی ب ئەوی چەكێ ل بەر دەست بەرسینگا هێرشێن لەشكرێ حكومەتا ئیراقێ دگرتن و بەرڤانی ژ ئاخا كوردستانێ دكرن. هەر وەسا پێشمەرگەیێ شۆڕشا گولانێ محەمەد تاهر گوت: پشتی بورینا ماوێ هەیڤەكێ ژ ئەركێ پێشمەرگایەتیێ من ئەو چەكا سمینوف یا شۆڕشێ تەسلیمی ڕیكخراوێ كر و من تفەنگەك ژ جورێ كلاشینكوف سیخو ڕوسی ڕكێب ب كوژمێ هزار و پێنج سەد دینارێن ل ئەوی سەردەمی ژ كیسنێ بەریكا خۆە كری و مە دەست ب خزمەت و خەباتا پێشمەرگایەیتێ كر، بەلێ ئێكەم چالاكیا لەشكرێ ئەز تێدا پشكدار بووم ئەویی ل بهارا سالا 1984ی دەینانا بوسەیەكێ ل سەر جادا گشتی ئەوا دكەڤیتە دناڤبەرا گوندێ ئاڤگەنیێ و گوندێ داسیكێ دا و د ئەڤێ چالاكیێ دا زیانێن گیانی گەهاندن هێزێن لەشكری یێن حكومەت ئیراقێ كەفتن و سۆپاس بۆ خودایێ مەزن كو پێشمەرگە د ئەڤێ چالاكیێ دا بێ زیان ئەڤ چالاكیە هات تۆماركرن.
