ڕەڤین ژ دۆژەها ڕەش
خانم حسێن
ل وێ سالێ، دەردەکێ نەدیار وەک سێلەکا ڕەش ب سەر گوندی دا هات. فایرۆسەکێ بێ ڕەحم گیانێ زارۆکێن بێگونەھ دکێشا. گوندیان، ژ ترسا مرنێ و ژبەر نەزانینێ، هزر دکر ئەڤە (نەعلەتەکا ئەسمانییە). بریارەکا درندەیی ل ناڤ گوندی بەلاڤ بوو: «هەر مالەکا زارۆکێ وێ تووش ببیت، دڤێت ئەو زارۆک بهێتە ژناڤبرن دا کو فایرۆس نەگەهیتە یێن دی». گوند ببوو دۆژەها، هەمیان ب شک و ترس تەماشەی ئێکودو دکر.
ئەڤ جارە، قەدەر گەهشتە بەر دەرگەهێ شێروان و کەوێ. کوڕی وان یێ ئێكانە «بەیار»، تایا وی گەلەک بلند ببوو و گیانێ وی دسۆت. دەنگۆیێ نەساخییا بەیاری د ناڤ گوندی دا بەلاڤ ببوو. ل دەرڤە، دەنگێ هندەک گوندیان دهات کو ب چەق و مەشخەلان ڤە ل بەر دەرگەهێ وان کۆم ببوون و دگۆتن: «شێروان.. کوڕی خۆ بدە مە، یان دێ هەمی مالا تە پێکڤە سۆژین! ئەم ناهێلین ئەڤ نەعلەتە ل ناڤ مە بمینیت»!.
شێروان ب دەربڕینەکا سار و بێدەنگ، بەرەڤ دەرگەهی چوو. دەمێ دەرگەهـ ڤەکری، تاریاتی و کینا گوندیان رەشاتی دا ناڤ مالێ. مەزنێ گوندی ب تووڕەیی گۆت: شێروان! کوڕی تە یێ بوویە مەترسی، نەعلەت دێ مە هەمیان گریت، بدە مە!». شێروانی ب وێرەکی تەماشەی چاڤێن وان کر و گۆت: «هوین راست دبێژن، ئەز ناهێلم ئەڤ نەعلەتە ل ناڤ مە بمینیت. بەلێ نوکە شەڤە و بارانە، کێمەکێ بێهنێ بدەنە مە… ئەز سویند دخۆم، سوبەهی سپێدێ، ئەز دێ ب دەستێن خۆ کوڕی خۆ دەمە هەوە!».
گوندیان ب ڤێ ئاخفتنێ باوەر کر و کێمەکێ پاشڤەچوون. شێروانی دەرگەهـ گرت و زڤڕی. کەوێ ب هێستر و هاوار دەستێن وی گرتن و گۆت: «تو د چ بێژی شێروان؟ دێ چەوا دلدەی کوڕی مە بدەیە دەستێ وان بکوژن؟ تو ب خودێ نەکە، ئەو پچەکا جەگەرا مەیە!».
شێروانی ب دەنگەکێ نزم و تژی پلان گۆتێ: «کەوێ، هێمن ببە! من ب تنێ گوندی مژیل کرن دا کو دەمەکێ بۆ مە پەیدا بکەم. ئەز نوکە دێ خەبەرێ گەهینمە مامۆستا حەسەنی؛ ئەو دشێت مە ژ ڤێرێ ببت. دەم نینە، زی بەیاری ئامادە بکە، دێ کوڕی خۆ بەیەنە نک نۆژداری و ژ ڤی گوندی ڕەڤین».
پشتی بۆرینا چه ند دەمژمیران شیروان ژدەرڤە کۆنترۆل دکر تهنی ددیت کو، شەڤەکا سار و تژی باران بوو، بێدەنگییەکا ترسناک بال ب سەر هەمی تشتان دا کێشابوو. ل ناڤ ژۆرەکا بچووک، بەیار ل سەر جهێ نڤستنێ کەتێ بوو، نەساخییەکا گران گیانێ وی دسۆت. کەوێ ب دلەکێ بریندار، ل کێلەکا سەرێ کوڕێ خۆ دانیشتبوو، جاران ب پەڕۆکێن تەزی و جاران ب فرمێسکێن گەرم بزاڤ دکر تایا وی بشکێنیت. د وێ گاڤێ دا، شێروان ب خەمباری هاتە ژۆر؛ تەماشەی بەیاری کر و دەستێ خۆ بێچارەیی کێشا سەر چاڤێن خۆ. وی دزانی چەریەکا رەش یا بەرەڤ وان دهێت و چو چەق د دەستێن وی دا نینن. ل گۆشەکا ژۆرێ، پشیکەکێ ب چاڤێن زەق تەماشەی لەرزینا دەستێن کەوێ دکر.
ژ نیشکەکێ ڤە، دەرگەهـ ب توندی هاتە قوتان! مامۆستا حەسەن ب ترس و لەز هاتە ژۆر و گۆت: «شێروان.. دەم نینە، زوی کوڕی خۆ هەلگرە! ئەز نوکە هاتم، من گازی هەڤالەکێ خۆ یێ کەڤن داود شۆفێر کرییە، ئەو ل سەر جاددەیێ ل هیڤییا وەیە. هەرن و خۆ ڕزگار کەن، ئەڤە یێن دهێن!». شێروانی ب بێدەنگی بەلێ ب هێزەکا باوەرنەکرنێ، بەیار کرە سەر پشتا خۆ. وێ گاڤێ، دەنگێ تەقەیا تڤەنگان ل ناڤ گوندی بلند بوو. شێروان و کەوێ دگەل مامۆستای، ب لەز بەرەڤ دارستانا تاری ڕەڤین. ناڤ داران تژی مژ و تاریاتی بوو، بەلێ هیڤییا ڕزگاربوونێ پێنگاڤێن وان ب هێز دکرن.
باران ب بێ ڕەحمی ل دارستانێ دباری. شێروان و کەوێ، د ناڤ مژ و تاریاتییا دارستانێ دا، ب لەز دڕەڤین. ل دووڤ وان، دەنگێ پێنگاڤێن گران و چریسکێن تڤەنگان دهات؛ کۆمەکا زەلامێن تاری ب دووڤ دكەتن. د ناڤ وێ بێ ئۆمێدییێ دا، پشتی ململانێیەکا دژوار دگەل دار و بەرێن دارستانێ، گەهشتنە سەر جاددەیێ. ل وێرێ، ترومبێلەک ب گلۆپێن ڤەمراندنی ڕاوەستابوو. شۆفێرەکێ ب وێرەکی تەماشەی دەرڤە دکر، ئەو داود شۆفێر بوو. مامۆستا حەسەن گۆت: «داود، من گازی تە کربوو، ئەڤێ خێزانێ ژ مرنێ قورتال بکە». داودی ب بێدەنگی دەرگەهـ ڤەکر و گۆت: «زوو بن، کێم مایە ئەو بگەهنە مە!».
داود دناڤ وێ بارانێ و تارییێ دا دهاژۆت، وەک بێژی جادە ژ بەر چاڤێن وی بەرزە نەدبوو. ئەو نەچوونە باژێری؛ چونکی مەتەرسی ل وێرێ هەبوو؛ داودی ئەو برنه مالا خۆ یا ڤەشارتی ل قەراخێ گوندی. ل وێرێ، داودی نۆژدارەک بەری هینگێ ئامادە کربوو.
ژۆرا وان سار بوو، بەلێ زوو سۆپەیا دارا هەلكر و گەرمی دا ناخێ وان. نۆژداری دەست ب چارەسەرییا بەیاری کر. پشیکەکا هێمن تەماشەی بزاڤێن نۆژداری دکر. ئەو شەڤە هەمی مەترسی بوو، بەلێ دەمێ رۆژ هەلاتی، رۆناهییەکا گەش کەتە ژۆرێ. بەیاری چاڤێن خۆ ڤەکرن و نۆژداری گۆت: «مەترسی بۆری، بەیار یێ سلامەتە». وێ سپێدێ، شێروانی و کەوێ زانی کو ب هەڤالینییا مامۆستا حەسەن و داودی، وان شەڤا تاری شکاند و گەهشتنە رۆناهییێ ل ژۆرێ، وێ شەڤێ، شێروانی زانی کو تڤەنگ تشتەکێ بێ هێزە ل بەرامبەر وەفادارییا هەڤالێن وەکی مامۆستا حەسەن و داود شۆفێری. وان ب هێزا هەڤالینییێ، نەساخی و تاری شکاندن. شێروانی و کەوێ زانی، کو جاران ژیان پێدڤی ب چەکی نینە، بەلکو پێدڤی ب هەڤالێن وەفادار و دلێن وێرەک هەیە.
